(vovworld) – ວັນທີ 11/7, ຊາວໜຸ່ມ, ເຍົາວະຊົນແມ່ນຊາວ ຫວຽດນາມ ອາໄສຢູ່ຕ່າງປະເທດເກືອບ 200 ຄົນ, ທີ່ມີຜົນງານດີເດັ່ນໃນການຮຳ່ຮຽນ ແລະ ອອກແຮງງານເຊິ່ງມາຈາກ 24 ປະເທດໃນທົ່ວໂລກໄດ້ກັບເມືອປະເທດເພື່ອເຂົ້າຮ່ວມລາຍການຄ້າຍພັກແລ້ງ ຫວຽດນາມ ປີ 2013. ທ່ານ ຫງວຽນແທງເຊີນ, ຮອງລັດຖະມົນຕີກະຊວງການຕ່າງປະເທດ ຫວຽດນາມ, ຫົວໜ້າຄະນະກຳມະການແຫ່ງລັດ ກ່ຽວກັບຊາວ ຫວຽດນາມ ອາໄສຢູ່ຕ່າງປະເທດ, ໃຫ້ຮູ້ວ່າ: ຄ້າຍພັກແລ້ງປີນີ້ຖືກຈັດຂຶ້ນແນໃສ່ສະເຫຼີມສະຫຼອງ 68 ປີແຫ່ງວັນປະຕິວັດເດືອນ ສິງຫາ, 66 ປີແຫ່ງວັນທະຫານເສຍອົງຄະນັກຮົບທີ່ເສຍສະຫຼະຊີວິດເພື່ອຊາດ, ພິເສດແມ່ນຂີດໝາຍ 10 ປີແຫ່ງວັນຈັດຕັ້ງຄ້າຍພັກແລ້ງ. ເນື້ອໃນຂອງຄ້າຍພັກແລ້ງປີນີ້ ເພື່ອແນໃສ່ຊ່ວຍໃຫ້ຊາວໜຸ່ມ ຫວຽດນາມ ອາໄສຢູ່ຕ່າງປະເທດໄດ້ສຳພັດ ແລະ ເຂົ້າໃຈຢ່າງເລິກເຊິ່ງກ່ຽວກັບກົກເຂົ້າເຫງົາກໍ່ວັດທະນະທຳ, ຄວາມສາມັກຄີຂອງບັນດາເຜົ່າ ຫວຽດນາມ ກ່ວາອີກ, ຜ່ານນັ້ນ, ຍົກສູງຄວາມຮູ້ບຸນຄູນ, ຕໍ່ບັນພະບຸລຸດ, ຕິດພັນກັບບ້ານເກີດເມືອງນອນ, ປະເທດຊາດ.
ຕອນເຊົ້າວັນທີ 12/7 ຄະນະຜູ້ແທນຊາວໜຸ່ມຫວຽດນາມອາໄສຢູ່ຕ່າງປະເທດໄດ້ໄປຢ້ຽມຢາມເຂດປູຊະນີຍະສະຖານວິຫານຮຸ່ງ ຢູ່ແຂວງຟູ໋ທໍ້. ຄະນະໄດ້ຖະຫວາຍທູບທຽນຢູ່ວິຫານຫ້າ, ວິຫານຈຸງ, ວິຫານເທື້ອງ, ວິຫານຢ໋ຽງ, ແລະ ຮັບຟັງກ່ຽວກັບພາລະກິດກໍ່ສ້າງປະເທດວັນລາງ ຂອງບັນດາເຈົ້າຊີວິດຮຸ່ງ. ດ່າວກິມອວນ, ນັກສຶກສາປີທີ 1, ມະຫາວິທະຍາໄລ ອາເມລິກາ - ຮູມານີ, ຢູ່ຮູມານີ, ແບ່ງປັນວ່າ:
“ນີ້ແມ່ນເທື່ອທຳອິດທີ່ນ້ອງໄດ້ມາຢ້ຽມຢາມວິຫານຮຸ່ງ, ແຂວງຟູ໋ທໍ້. ນ້ອງເຫັນວ່າປູຊະນີຍະສະຖານແຫ່ງນີ້ດັ້ງເດີມ, ບູຮານຫຼາຍ, ນ້ອງໄດ້ຈູດທູບທຽນໄຫວ້ບູຊາບັນດາເຈົ້າຊີວິດຮຸ່ງ. ນ້ອງຄິດວ່ານີ້ຈຶ່ງແມ່ນບ້ານເກີດເມືອງນອນຂອງຕົນ“.
ສ່ວນ ຮ່າເລມິນເຢືອງ, ນັກຮຽນມັດຖະຍົມຕອນຕົ້ນຢູ່ລັດເຊຍ, ກໍ່ເວົ້າວ່າ:
“ປູຊະນີຍະສະຖານແຫ່ງນີ້ງາມຫຼາຍ. ມາວິຫານຮຸ່ງ, ນ້ອງຄິດຮອດຄິດເຖິງບັນພະບຸລຸດຂອງຕົນ ກໍ່ຄືຊາວຫວຽດນາມຜູ້ທີ່ໄດ້ຮັກສາປູຊະນີຍະສະຖານແຫ່ງນີ້“.
ນີ້ແມ່ນການເຄື່ອນໄຫວ ເພື່ອຊ່ວຍໃຫ້ພວກນ້ອງມີຄວາມເຂົ້າໃຈຕື່ມອີກກ່ຽວກັບຫຼັກສິນທຳທີ່ວ່າ “ກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ“ ຂອງຊາດຫວຽດນາມ, ເພື່ອຍົກສູງສະຕິເອກອ້າງທະນົງໃຈຕໍ່ເລືອດເນື້ອເຊື້ອຊາດຂອງຕົນ.
ຕາມລາຍການແລ້ວ, ຄ້າຍພັກແລ້ງຈະດຳເນີນຢູ່ 9 ແຂວງ, ນະຄອນຂອງປະເທດ, ພິທີໄຂຈະຈັດຂຶ້ນຢູ່ແຂວງ ຮ່າຢາງ ແລະ ສິ້ນສຸດຢູ່ແຂວງ ກາເມົາ.