(vovworld) - ໂດຍໄດ້ຮັບຄຳເຊີນຂອງຄະນະບໍລິຫານງານສູນກາງພັກກອມມູນິດຝລັ່ງ, ຄະນະຜູ້ແທນພັກກອມມູນິດຫວຽດນາມ ໂດຍທ່ານ ຟ້າມມິງຈິງ, ເລຂາສູນກາງພັກ, ຫົວໜ້າຄະນະຈັດຕັ້ງສູນກາງນຳໜ້າ, ໄດ້ເຂົ້າຮ່ວມກອງປະຊຸມຄັ້ງທີ 37 ຂອງພັກກອມມູນິດຝລັ່ງ ເຊິ່ງຖືກດຳເນີນແຕ່ວັນທີ 02 – 05/06, ຢູ່ນະຄອນຫຼວງປາຣີ, ປະເທດຝລັ່ງ. ທີ່ກອງປະຊຸມໃຫຍ່, ທ່ານ ຟ້າມມິງຈິງ ໄດ້ມອບສານຊົມເຊີຍຂອງຄະນະບໍລິຫານງານສູນກາງພັກກອມມູນິດຫວຽດນາມ ທີ່ສົ່ງເຖິງກອງປະຊຸມໃຫຍ່ຄັ້ງທີ 37 ພັກກອມມູນິດຝລັ່ງ ແລະ ບັນດາຜູ້ແທນເຂົ້າຮ່ວມກອງປະຊຸມ.
ໂດຍຕາງໜ້າໃຫ້ຄະນະການນຳພັກກອມມູນິດຝລັ່ງ, ທ່ານ Pierre Laurent ໄດ້ຂອບອົກຂອບໃຈພັກກອມມູນິດຫວຽດນາມ ໄດ້ຈັດສົ່ງຄະນະຜູ້ແທນຂັ້ນສູງເຂົ້າຮ່ວມກອງປະຊຸມໃຫຍ່, ຖືນີ້ແມ່ນການສະແດງໃຫ້ເຫັນຄວາມສາມັກຄີ, ສະໜິດຕິດພັນລະຫວ່າງ 2 ພັກ ຢ່າງມີຊີວີດຊີວາ.
ກ່ອນໜ້ານັ້ນ, ວັນທີ 01/06, ຢູ່ສຳນັກງານພັກກອມມູນິດຝລັ່ງ, ຄະນະຜູ້ແທນຫວຽດນາມ ໄດ້ພົບປະກັບທ່ານເລຂາທິການໃຫຍ່ພັກກອມມູນິດຝລັ່ງ Pierre Laurent ເພື່ອແລກປ່ຽນສະພາບການຂອງແຕ່ລະພັກ, ແຕ່ລະປະເທດ, ການພົວພັນລະຫວ່າງ 2 ພັກ, 2 ລັດ ແລະ ບາງບັນຫາສາກົນທີ່ຕ່າງຝ່າຍຕ່າງມີຄວາມສົນໃຈ. ເນື່ອງໃນໂອກາດນີ້, ທ່ານ ຟ້າມມິງຈິງ ໄດ້ແຈ້ງໃຫ້ການນຳພັກກອມມູນິດຝລັ່ງ ຊາບກ່ຽວກັບໝາກຜົນກອງປະຊຸມໃຫຍ່ຄັ້ງທີ 12 ແລະ ວຽກງານຜັນຂະຫຍາຍມະຕິກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ, ໝາກຜົນການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນອາຍຸການ 2016 – 2021, ສະພາບການຂອງຫວຽດນາມ ກໍຄືບັນດາການຜັນແປຫວ່າງມໍ່ໆມານີ້ຢູ່ທະເລຕາເວັນອອກ ແລະ ແຜນນະໂຍບາຍ, ທັດສະນະຂອງຫວຽດນາມ ໃນການແກ້ໄຂການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ ບົນພື້ນຖານກົດໝາຍສາກົນ, ໂດຍສະເພາະແມ່ນສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982, ຖະແຫຼງການກ່ຽວກັບການພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແລະ ສູ້ຊົນເພື່ອບັນລຸປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ ໂດຍໄວ.
ສ່ວນທ່ານ Pierre Laurent ໄດ້ຢ້ຳຄືນທັດສະນະຂອງພັກກອມມູນິດຝລັ່ງ ທີ່ສະໜັບສະໜູນຄວາມເສລີໃນການເດີນທະເລ ແລະ ການບິນຢູ່ທະເລຕາເວັນອອກ, ແກ້ໄຂບັນດາການຂັດແຍ້ງກັນໂດຍສັນຕິວິທີ, ບໍ່ນຳໃຊ້ອາວຸດ ແລະ ນາບຂູ່ນຳໃຊ້ອາວຸດ, ເຄົາລົບກົດໝາຍສາກົນ ໃນນັ້ນມີ UNCLOS 1982, ພ້ອມທັງສະໜັບສະໜູນຫຼັກໝັ້ນ, ທັດສະນະ, ມາດຕະການແກ້ໄຂບັນຫາທະເລຕາເວັນອອກຂອງພັກກອມມູນິດຫວຽດນາມ.