ຄະນະຜູ້ແທນອົງການກວດກາລັດຖະບານຫວຽດນາມຢ້ຽມຢາມແລະເຮັດວຽກຢູ່ສະຫະພັນລັດເຊຍ
ຄະນະຜູ້ແທນອົງການກວດກາລັດຖະບານຫວຽດນາມຢ້ຽມຢາມແລະເຮັດວຽກຢູ່ສະຫະພັນລັດເຊຍ
(vovworld) - ໂດຍໄດ້ຮັບຄຳເຊີນຂອງທ່ານຫົວໜ້າກົມຕ້ານການສໍ້ລາດບັງຫຼວງສະຫະພັນ ລັດເຊຍ Oleg Plokhoi, ຄະນະຜູ້ແທນອົງການກວດກາລັດຖະບານ ຫວຽດນາມ ໂດຍທ່ານຫົວໜ້າອົງການກວດກາ ຮິ່ງຟອງແຈງ ນຳໜ້າ, ໄດ້ໄປຢ້ຽມຢາມ ແລະ ເຮັດວຽກຢູ່ ສະຫະພັນ ລັດເຊຍ ແຕ່ວັນທີ 14/4/2014. ທີ່ການເຮັດວຽກກັບສະຖາບັນໄອຍະການ ສະຫະພັນ ລັດເຊຍ ແລະ ອົງການກວດສອບບັນຊີ ສະຫະພັນ ລັດເຊຍ, ທ່ານນາງ Vera Chistova, ຮອງປະທານສະຖາບັນກວດສອບບັນຊີ ສະຫະພັນ ລັດເຊຍ ໃຫ້ຮູ້ວ່າບົນພື້ນຖານສັນຍາຮ່ວມມືທີ່ໄດ້ລົງນາມແລ້ວ, ອົງການກວດສອບບັນຊີ ສະຫະພັນ ລັດເຊຍ ແລະ ອົງການກວດສອບບັນຊີ ຫວຽດນາມ ພວມພ້ອມກັນຕິດຕາມກວດກາການເຄື່ອນໄຫວສົ່ງອອກສິນໃນນ້ຳ ຫວຽດນາມ ມາສະຫະພັນ ລັດເຊຍ ກໍ່ຄືຕິດຕາມກວດກາງົບປະມານໃນຂົງເຂດຮ່ວມມືການຂຸດຄົ້ນ, ສຳຫຼວດນ້ຳມັນອາຍແກັດ. ການຮ່ວມມືນີ້ໄດ້ປະກອບສ່ວນຍົກສູງປະສິດທິຜົນການເຄື່ອນໄຫວຂອງບໍລິສັດຮ່ວມທຸລະກິດນ້ຳມັນອາຍແກັດ VietsoPetro. ສ່ວນທ່ານຫົວໜ້າອົງການກວດກາລັດຖະບານ ຮິ່ງຟອງແຈງ ຖືວ່າ:
“ ໃນຂອບເຂດການເຮັດວຽກ, ພວກຂ້າພະເຈົ້າຫວັງວ່າສອງຝ່າຍພ້ອມກັນແລກປ່ຽນບົດຮຽນ, ສະໜອງຂໍ້ມູນຂ່າວໃນການຕ້ານສໍ້ລາດບັງຫຼວງຕາມພາລະໜ້າທີ່ຂອງຕົນໃຫ້ກັນ. ເຖິງວ່າສອງອົງການພວກເຮົາມີແບບວິທີເຄື່ອນໄຫວຕ່າງກັນກໍ່ຕາມ, ແຕ່ພັດມີເປົ້າໝາຍດຽວນັ້ນແມ່ນຕ້ານສໍ້ລາດບັງຫຼວງ. ພວກຂ້າພະເຈົ້າປາດຖະໜາວ່າ ຫວຽດນາມ ແລະ ສະຫະພັນ ລັດເຊຍ ມີການພົວພັນໃນຫຼາຍຂົງເຂດຢ່າງຍາວນານ, ໃນນັ້ນມີຂົງເຂດຕ້ານສໍ້ລາດບັງຫຼວງ”.