ປະທານປະເທດ ເຈືອງເຕີ້ນຊາງ
|
ຮຽນພໍ່ແມ່ພີນ້ອງຮ່ວມຊາດ, ສະຫາຍ, ນັກຮົບໃນທົ່ວປະເທດ ແລະ ຊາວຫວຽດນາມອາໄສຢູ່ຕ່າງປະເທດ !
ເນື່ອງໃນໂອກາດຕ້ອນຮັບລູດບານໃໝ່ປີວອກ 2016, ຂ້າພະເຈົ້າຂໍສົ່ງຄຳຢື້ຢາມຖາມຂ່າວ ແລະ ຄຳອວຍພອນປີໃໝ່ທີ່ຈົບງາມທີ່ສຸດມາຍັງພໍ່ແມ່ພີນ້ອງ, ສະຫາຍ, ນັກຮົບໃນທົ່ວປະເທດ ແລະ ຊາວຫວຽດນາມອາໄສຢູ່ຕ່າງປະເທດ, ບັນດາເພື່ອນຊາວຕ່າງປະເທດພວມດຳລົງຊີວິດ, ເຮັດວຽກ ແລະ ຮ່ຳຮຽນຢູ່ຫວຽດນາມ. ຂ້າພະເຈົ້າກໍຍັງສົ່ງນ້ຳໃຈຄວາມຮັກແພງ, ສາມັກຄີ, ໄມຕີຈິດມິດຕະພາບຂອງປະຊາຊົນຫວຽດນາມໄປຍັງປະຊາຊົນໃນໂລກ ແລະ ເພື່ອນມິດສາກົນ.
ໃນຈຸດເວລາສົ່ງທ້າຍປີເກົ່າຕ້ອນຮັບປິໃໝ່ທີ່ສັກກະລະບູຊານີ້, ພວກເຮົາມີຄວາມເຄົາລົບນັບຖືອາໄລຫາບັນພະບຸລຸດ, ລຸ່ນປູ່ລຸ່ນພໍ່ ນັບແຕ່ໃດໆມາໄດ້ສ້າງສາ, ປົກປັກຮັກສາ ແລະ ສືບທອດໃຫ້ ຄົນລຸ່ນປະຈຸບັນ; ອາໄລຫາປະທານໂຮ່ຈິມິນ ແລະ ບັນດານັກວິລະຊົນທີ່ໄດ້ເສຍສະຫຼະຊີວິດເພື່ອເອກະລາດ, ອິດສະຫຼະພາບ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດ. ພວກເຮົາຄຳນຶງເຖິງປີທີ່ຜ່ານມາ, ຄາດຄະເນໃຫ້ປີໃໝ່ ແລະ ຄາດຫວັງບັນດາສິ່ງທີ່ຈົບງາມກວ່າເກົ່າ.
ປີທີ່ຜ່ານມາ, ປະຊາຊົນຫວຽດນາມມີຄວາມເອກອ້າງທະນົງໃຈສະເຫຼີມສະຫຼອງບັນດາວັນບຸນໃຫຍ່ຂອງຊາດ, ຮ່ວມແຮງຮ່ວມໃຈ, ຜ່ານຜ່າຄວາມຫຍຸ້ງ ຍາກ ສິ່ງທ້າທາຍນາໆປະການເພື່ອພັດທະນາເສດຖະກິດ, ວັດທະນະທຳ, ສັງຄົມ, ປົດປັກຮັກສາເອກະລາດ, ອະທິປະໄຕຜືນແຜ່ນດິນຂອງປະເທດຊາດ, ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ, ຍູ້ແຮງການເຊື່ອມໂຍງເຂົ້າກັບສາກົນ, ນຳປະເທດຊາດກ້າວເຂົ້າສູ່ໄລຍະພັດທະນາໃໝ່ດ້ວຍແງ່ຫວັງ ຫຼາຍຢ່າງທີ່ຈົບງາມ.
ພວກເຮົາພວມດຳລົງຊີວິດໃນຍຸກສະໄໝໂລກາພິວັດ ແລະ ເຊື່ອມໂຍງເຂົ້າກັບສາກົນດ້ວຍບັນດາການປ່ຽນແປງອັນໃຫຍ່ຫຼວງ, ມີທັງໂອກາດພ້ອມກັບສິ່ງທ້າທາຍ. ຢູ່ພາຍໃນປະເທດ, ພ້ອມກັບບັນດາຜົນງານທີ່ຍາດມາໄດ້ນັ້ນ, ພວກເຮົາຍັງມີວຽກງານຫຼາຍຢ່າງທີ່ຈະຕ້ອງເຮັດເພື່ອກໍ່ສ້າງປະເທດຊາດໃຫ້ຮັ່ງມີ ເຂັ້ມແຂງ, ປັກປັກຮັກສາປະເທດຊາດໃຫ້ຍືນຍົງຄົງຕົວ, ສົມກັບຄວາມເຊື່ອໝັ້ນຂອງລຸ່ນປູ່ລຸ່ນພໍ່ ແລະ ເຮັດຫຼ້ອນໜ້າທີ່ສຳລັບລຸ່ນລູກລຸ່ນຫຼານໃນອະນາຄົດ.
ລະດູບານໃໝ່ປີນີ້ ແມ່ນລະດູບານໃໝ່ທຳອິດເພື່ອປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ, ຂ້າພະເຈົ້າຮຽກຮ້ອງມາຍັງ ພໍ່ແມ່ພີນ້ອງ, ສະຫາຍ, ນັກຮົບໃນທົ່ວປະເທດ ແລະ ຊາວຫວຽດນາມອາໄສຢູ່ຕ່າງປະເທດ ຈົ່ງສືບຕໍ່ມານະພະຍາຍາມສູ້ຊົນ, ເສີມຂະຫຍາຍສະຕິປັນຍາ, ຄຸນນະທາດ, ມູນເຊື້ອອະລີຍະທຳ, ນ້ຳໃຈຮັກຊາດ, ອົງອາດກ້າແກ່ນ, ບໍ່ຍອມຈຳນົນຂອງຊາດ, ກຳແໜ້ນກາລະໂອກາດ, ຜ່ານຜ່າທຸກໆຄວາມຫຍຸ້ງຍາກ ສິ່ງທ້າທາຍເພື່ອຍາດເອົາບັນດາໄຊຊະນະໃໝ່ໃນພາລະກິດສ້າງສາ ແລະ ປົກປັກຮັກສາປະເທດຫວຽດນາມທີ່ປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸດຕິທຳ, ສີວິໄລ, ທຽບເທົ່າກັບບັນດາເພື່ອນມິດໃນທົ່ວໂລກ.
ເນື່ອງໃນໂອກາດລະດູບານໃໝ່, ຂ້າພະເຈົ້າຂໍອວຍພອນໃຫ້ທຸກໆຄົນ, ທຸກໆຄອບຄົວໃນທຸກແຖບຖິ່ນຂອງປະເທດຊາດ, ພໍ່ແມ່ພີນ້ອງຊາວຫວຽດນາມອາໄສຢູ່ຕ່າງປະເທດ ຈົ່ງມີຄວາມສຸກ ແລະ ປະສົບຜົນສຳເລັດ; ອວຍພອນທຸກສິ່ງທຸກຢ່າງທີ່ຈົບງາມທີ່ສຸດຈະມາສູ່ປະເທດຊາດຫວຽດນາມ.