(vovworld) – ຕອນຄໍ່າວັນທີ 08/09, ຢູ່ທ້ອງຖິ່ນຕ່າງໆໃນທົ່ວປະເທດໄດ້ຈັດຕັ້ງບັນດາການເຄື່ອນໄຫວວັດທະນະທຳສິລະປະ, ມອບຂອງຂວັນໃຫ້ເດັກນ້ອຍ, ພິເສດແມ່ນເດັກນ້ອຍປະສົບກັບຄວາມຫຍຸ້ງຍາກ, ເດັກພິການ, ເດັກກຳພ້າ, ເດັກປະສົບເຄາະຮ້າຍຈາກທາດພິດສີສົ້ມດີໂອຊິນ, ເຂດຫ່າງໄກ່ສອກຫຼິກ… ເນື່ອງໃນໂອກາດວັນບຸນໄຫວ້ພະຈັນປີ 2014. ຢູ່ນະຄອນດ່ານັ້ງ, ມີອະນຸຊົນ, ເດັກທຸກຍາກ, ລູກຫຼານຂອງຊາວປະມົງ ແລະ ກຳລັງກວດກາການປະມົງ, ຕຳຫຼວດທະເລໃນບໍລິເວນແຂວງກວ່າ 1000 ຄົນ ໄດ້ເຂົ້າຮ່ວມລາຍການວັນບຸນໄຫວ້ພະຈັນ ດ້ວຍຫົວຂໍ້ “ອະນຸຊົນຫວຽດນາມ ມຸ່ງໄປສູ່ບ້ານເກີດເມືອງນອນ”. ເນື່ອງໃນໂອກາດນີ້, ຄະນະຊາວໜຸ່ມນະຄອນດ່ານັ້ງ, ບັນດານັກອຸປະຖຳ ໄດ້ມອບຂອງຂວັນ ແລະ ທຶນສຶກສາກວ່າ 200 ພູດ, ດ້ວຍຍອດຈຳນວນເງິນກວ່າ 200 ລ້ານດົງ ໃຫ້ເດັກທຸກຍາກໃນບໍລິເວນນະຄອນ. ນ້ອງ ຫງວຽນຫວູຢ້ຽວລິງ, ຢູ່ເມືອງ ເຊີນຈ່າ, ນະຄອນດ່ານັ້ງ ໃຫ້ຮູ້ວ່າ.
“ສຳລັບລູກແລ້ວ, ງານບຸນໄຫວ້ພະຈັນແມ່ນມ່ວນຫຼາຍ, ລູກມານີ້ໄດ້ພົບປະກັບໝູ່ເພື່ອນຫຼາຍຄົນ, ໄດ້ຊົມການຟ້ອນສິງໂຕ, ສິລະປະ, ລະຫຼິ້ນ ແລະ ຍັງໄດ້ຮັບຂອງຂວັນ ຊ່ວຍລູກໃນການຮໍ່າຮຽນອີກ.”
ທີ່ນະຄອນຮ່າໂນ້ຍ, ໄດ້ຈັດງານພົບປະແລກປ່ຽນສິລະປະພິເສດ “ງານບຸນໄຫວ້ພະຈັນໃຫ້ນ້ອງ”. ໃນຂອບເຂດລາຍການ, ຄະນະຈັດຕັ້ງໄດ້ມອບປື້ມເງິນຟາກປະຢັດ 100 ຫົວໃຫ້ເດັກພິການ, ຂອງຂວັນ 100 ພູດ, ເຄື່ອງໃຊ້ໃນການຮໍ່າຮຽນ.
ທີ່ບັນດາປະເທດໃນໂລກ, ປະຊາຄົມຊາວຫວຽດນາມ ກໍ່ໄດ້ຈັດການເຄື່ອນໄຫວຕ້ອນຮັບບຸນໄຫວ້ພະຈັນ ເພື່ອແນໃສ່ຊ່ວຍໃຫ້ລຸ່ນໜຸ່ມເຂົ້າໃຈກ່ຽວກັບວັດທະນະທຳທີ່ເປັນມູນເຊື້ອຂອງຊາດກວ່າ.
ແລະກໍ່ໃນຕອນຄໍ່າວັນທີ 08/09, ຢູ່ໂຮງຮຽນ ຫງວຽນຢູ, ນະຄອນຫຼວງວຽງຈັນ, ປະເທດລາວ, ເດັກນ້ອຍຊາວຫວຽດນາມ ໄດ້ຕ້ອນຮັບວັນບຸນໄຫວ້ພະຈັນຢ່າງຟົດຟື້ນ ແລະ ອົບອຸ່ນເຊັ່ນດຽວກັນ.