ທ່ານນາງ Men sam om, ຮອງນາຍົກລັດຖະມົນຕີຜູ້ປະຈຳການລັດຖະບານກຳປູເຈຍ
( ພາບ: baodongnai.com.vn )
(vovworld) – ວັນທີ 2/8, ຢູ່ແຂວງດົ່ງນາຍ, ສະຫະພັນບັນດາອົງການຈັດຕັ້ງມິດຕະພາບຫວຽດນາມ ສົມທົບກັບສະມາຄົມມິດຕະພາບຂອງສອງປະເທດຫວຽດນາມ - ກຳປູເຈຍ ຈັດຕັ້ງງານພົບປະມິດຕະພາບ ແລະ ການຮ່ວມມືປະຊາຊົນຄັ້ງທີ 3, ເນື່ອງໃນໂອກາດສະເຫຼີມສະຫຼອງ 45 ປີ ແຫ່ງວັນສ້າງຕັ້ງສາຍພົວພັນທາງການທູດຫວຽດນາມ - ກຳປູເຈຍ ແລະ ”ປີມິດຕະພາບຫວຽດນາມ - ກຳປູເຈຍ 2012”. ການນຳສະມາຄົມມິດຕະພາບສອງປະເທດໄດ້ຕີລາຄາສູງໝາກຜົນແຫ່ງການຮ່ວມມືມິດຕະພາບ, ຄວາມສະໜິດຕິດພັນຂອງຫວຽດນາມ ແລະ ກຳປູເຈຍໃນ 45 ປີທີ່ຜ່ານມາ. ສອງປະເທດມີການພົວພັນມິດຕະພາບທີ່ເປັນມູນເຊື້ອມາແຕ່ດົນນານ, ປະຊາຊົນສອງປະເທດແມ່ນອ້າຍນ້ອງທີ່ີມີຄວາມສະໜິດຕິດພັນ, ຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນໃນພາລະກິດປົດປ່ອຍຊາດ ເພື່ອສິດເສລີ, ຄວາມຜາສຸກ ແລະ ສ້າງສາປະເທດໃຫ້ພັດທະນາ. ຕີລາຄາກ່ຽວກັບອາລົມຈິດອັນລ້ຳຄ່າຂອງສອງປະເທດ, ທ່ານນາງ Men sam om, ຮອງນາຍົກລັດຖະມົນຕີຜູ້ປະຈຳການລັດຖະບານລາຊະອານາຈັກກຳປູເຈຍ, ປະທານສະມາຄົມມິດຕະພາບກຳປູເຈຍ - ຫວຽດນາມ ເວົ້າວ່າ: ຂ້າພະເຈົ້າສະແດງຄວາມຮູ້ບຸນຄູນຢ່າງເລິກເຊິ່ງຕໍ່ທະຫານອາສາສະໝັກຫວຽດນາມ ທີ່ໄດ້ຮຽງບ່າຮຽງໄຫຼ່ກັບທະຫານແນວໂຮມສາມັກຄີກຳປູເຈຍສູ້ຮົບກູ້ເອົາປະເທດກຳປູເຈຍໃຫ້ຫຼຸດພົ້ນອອກຈາກລະບອບດັບສູນເຊື້ອຊາດທີ່ໂຫດຮ້າຍສາມານຂອງຂະແມແດງ. ພວກຂ້າພະເຈົ້າຂໍຂອບອົກຂອບໃຈລັດຖະບານ ແລະ ປະຊາຊົນຫວຽດນາມ ທີ່ໄດ້ສືບຕໍ່ຮ່ວມມື ແລະ ສະໜັບສະໜູນການພັດທະນາເສດຖະກິດ, ສັງຄົມຂອງກຳປູເຈຍ. ພ້ອມທັງເຊື່ອໝັ້ນວ່າເລື່ອງສອງປະເທດຈັດຕັ້ງພິທີສະເຫຼີມສະຫຼອງ 45 ປີ ແຫ່ງວັນສ້າງຕັ້ງສາຍພົວພັນທາງການທູດຫວຽດນາມ - ກຳປູເຈຍ ແລະ ປີມິດຕະພາບຫວຽດນາມ - ກຳປູເຈຍ ນີ້ ຈະເປັນການເພີ່ມທະວີ, ເປີດກວ້າງການຮ່ວມມືລະຫວ່າງສອງປະເທດ, ຮັບໃຊ້ຜົນປະໂຫຍດຢ່າງແທດຈິງໃຫ້ທັງສອງປະເທດ, ແລະ ປະກອບສ່ວນຮັກສາສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງໃຫ້ທັງປະຊາຄົມອາຊຽນ.