ງານພົບປະແລກປ່ຽນກັບບັນດາສະໂມສອນຜູ້ຟັງວິທະຍຸກະຈາຍສຽງຫວຽດນາມ
(ທ່ານຮອງຜູ້ອຳນວຍການໃຫຍ່ VOV ຫວູຫາຍ)
(vovworld) - ຕອນເຊົ້າວັນທີ 27/8, ຢູ່ສຳນັກງານກະຈາຍສຽງແຫ່ງຊາດ, 58 ຖະໜົນ ກວ໋ານຊື໋, ຮ່າໂນ້ຍ ໄດ້ຈັດງານພົບປະແລກປ່ຽນກັບບັນດາສະໂມສອນທ່ານຜູ້ຟັງວິທະຍຸກະຈາຍສຽງຫວຽດນາມ ເນື່ອງໃນໂອກາດ 70 ປີ ແຫ່ງວັນສ້າງຕັ້ງວິທະຍຸກະຈາຍສຽງຫວຽດນາມ (VOV). ກ່າວຄວາມເຫັນທີ່ງານພົບປະ, ຕາງໜ້າການນຳ VOV, ທ່ານຮອງຜູ້ອຳນວຍການໃຫຍ່ VOV ຫວູຫາຍ, ໄດ້ຂອບອົກຂອບໃຈຄວາມເອົາໃຈໃສ່, ການສະໜັບສະໜູນ, ຄວາມຮັກແພງຂອງບັນດາທ່ານຜູ້ຟັງ VOV ໃນຕະຫຼອດ 70 ປີຜ່ານມາ. ທ່ານເນັ້ນໜັກວ່າ:
“ໃນຕະຫຼອດວິວັດແຫ່ງການສ້າງຕັ້ງ ແລະ ເຕີບໃຫຍ່, VOV ໄດ້ຮັບການສະໜັບສະໜູນຈາກພັກ, ລັດຖະບານ ແລະ ບັນດາທ່ານຜູ້ຟັງ VOV ໄດ້ມີຄວາມເອົາໃຈໃສ່, ປະກອບຄວາມເຫັນ, ແລະ ເຂົ້າຮ່ວມບັນດາລາຍການກະຈາຍສຽງໂດຍກົງ, ແຕ່ລະປີ VOV ໄດ້ຮັບຈົດໝາຍນັບໝື່ນສະບັບຈາກຜູ້ຟັງ VOV ບໍ່ພຽງແຕ່ຢູ່ພາຍໃນປະເທດ, ຫາກນັບທັງຢູ່ຕ່າງປະເທດອີກ. ອັນໄດ້ເຮັດໃຫ້ລາຍການນັບມື້ນັບອຸດົມສົມບຸນກວ່າ. “
ທ່ານຮອງຜູ້ອຳນວຍການໃຫຍ່ VOV ຫວູຫາຍ ກໍ່ແຈ້ງໃຫ້ທ່ານຜູ້ຟັງຊາບກ່ຽວກັບເລື່ອງໂທລະພາບດີຈີຕອນ VTC ໄດ້ໂອນເຈົ້າ VOV ຢ່າງເປັນທາງການ. ມາຮອດປະຈຸບັນ VOV ມີ 17 ຊ່ອງໂທລະພາບ, 7 ຊ່ອງກະຈາຍສຽງ, ໃນໄຕມາດທີ 4 ຈະມີຊ່ອງກະຈາຍສຽງດ້ວຍພາສາອັງກິດ 24/7 ຕື່ມອີກ, ມີ 2 ສື່ສິ່ງພິມ ແລະ 2 ສື່ເອເລກໂຕນິກ. VOV ມີການພົວພັນກັບ 60 ອົງການ, ວິທະຍຸ - ໂທລະພາບໃນພາກພື້ນ ແລະ ສາກົນ.
ມາຮອດປະຈຸບັນ VOV ໄດ້ຮັບຮອງ 5 ສະໂມສອນທ່ານຜູ້ຟັງ VOV ຢ່າງເປັນທາງການຢູ່ແຂວງຟູ໋ທໍ້, ບັກຢາງ, ບັກນິງ ແລະ ເຊີນລາ ໃນງານພົບປະແລກປ່ຽນນີ້, ສະໂມສອນນັກຮົບເກົ່ານະຄອນຫວຽດຈີ່ ຟັງ VOV ໄດ້ຮັບການສະເໜີຕົວຢ່າງເປັນທາງການ.