ການປະຊຸມຂ່າວກ່ຽວກັບພິທີເປີດງານ “ພົບປະແລກປ່ຽນວັດທະນະທຳ,
ກິລາ ແລະ ທ່ອງທ່ຽວເຂດຊາຍແດນຫວຽດນາມ - ລາວ”
( ພາບ: vietnamtourism.gov.vn )
(vovworld) - ພິທີເປີດງານ “ພົບປະແລກປ່ຽນວັດທະນະທຳ, ກິລາ ແລະ ທ່ອງທ່ຽວເຂດຊາຍແດນຫວຽດນາມ - ລາວ” ຈະຖືກໄຂຂຶ້ນໃນວັນທີ 18/8 ທີ່ຈະມາເຖິງຢູ່ແຂວງຮ່າຕິ້ງ. ລາຍການພົບປະແລກປ່ຽນວັດທະນະທຳ, ກິລາ ແລະ ທ່ອງທ່ຽວ ລະຫວ່າງບັນດາແຂວງມີເສັ້ນຊາຍແດນຮ່ວມຫວຽດນາມ - ລາວ ໄດ້ແບ່ງເປັນ 3 ກຸ່ມ: ພາກເໜືອ, ພາກກາງ ແລະ ຕອນກາງພາກກາງຫວຽດນາມ. ແຂວງຮ່າຕິ້ງ ໄດ້ຮັບເລືອກເປັນເຈົ້າພາບຈັດພິທີໄຂງານດັ່ງກ່າວ. ໃນລະຫວ່າງວັນທີ 17 – 19/8 ຈະດຳເນີນບັນດາການເຄື່ອນໄຫວພົບປະແລກປ່ຽນກຸ່ມພາກກາງເຊິ່ງລວມມີ 3 ແຂວງຄື: ເຫ້ງອ່ານ, ຮ່າຕິ້ງ, ກວາງບິ່ງ; ຝ່າຍລາວມີ 3 ແຂວງຄື: ຊຽງຂວາງ, ບໍລິຄຳໄຊ, ຄຳມວນ ດ້ວຍບັນດາການແຂງຂັນກິລາ; ໄຂງານວາງສະແດງ “ບັນດາສີສັນວັດທະນະທຳ” ທີ່ວາງສະແດງບັນດາຮູບພາບກ່ຽວກັບການດຳເນີນຊີວິດວັດທະນະທຳຂອງປະຊາຊົນບັນດາແຂວງເຂດຊາຍແດນຫວຽດນາມ - ລາວ, ເຊິ່ງວາດພາບເຖິງບັນດາການເຄື່ອນໄຫວງານບຸນຂອງປະຊາຊົນສອງຊາດ, ກອງປະຊຸມສຳມະນາວິທະຍາສາດ “ທ່ອງທ່ຽວກັບການພັດທະນາເສດຖະກິດ - ວັດທະນະທຳເຂດຊາຍແດນຫວຽດນາມ - ລາວ”… ທ່ານ Nguyen Thien, ຮອງປະທານຄະນະກຳມະການປະຊາຊົນແຂວງຮ່າຕິ້ງ, ຫົວໜ້າຄະນະຈັດຕັ້ງ ໃຫ້ຮູ້ວ່າ.
“ພວກຂ້າພະເຈົ້າເຫັນວ່າ ນີ້ແມ່ນໜ້າທີ່ຂອງແຂວງເຊິ່ງນອນໃນຂອບເຂດການເຄື່ອນໄຫວຕ່າງໆຂອງສອງປະເທດ ເພື່ອຂໍ່ານັບຮັບຕ້ອນປີສາມັກຄີມິດຕະພາບຫວຽດນາມ - ລາວ ແລະ ກໍແມ່ນວຽກງານອັນແທດຈິງເພື່ອສະເຫຼີມສະຫຼອງ 50 ປີແຫ່ງວັນສ້າງຕັ້ງສາຍພົວພັນທາງການທູດ ແລະ 35 ປີ ແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືຫວຽດນາມ - ລາວ. ໄລ່ມາຮອດຈຸດເວລານີ້ ບັນດາການເຄື່ອນໄຫວໄດ້ຮັບການຜັນຂະຫຍາຍຕາມແຜນການ ແລະ ບັນດາເນື້ອໃນທີ່ຮັບໃຊ້ໃຫ້ແກ່ການເຄື່ອນໄຫວນີ້ກໍ່ໄດ້ຮັບການກະກຽມສຳເລັດໂດຍພື້ນຖານແລ້ວ”.