(ພາບປະກອບ)
(vovworld) – ຫວ່າງແລ້ວນີ້, ຢູ່ນະຄອນຫລວງ Oslo, ປະເທດ ນອກແວ, ສະຖານທູດ ຫວຽດນາມ ສົມທົບກັບສະຖານທູດ ອິນໂດເນເຊຍ, ມຽນມາ, ຟີລິບປິນ ແລະ ໄທ ຈັດຕັ້ງງານລາຕີວັດທະນະທຳ ອາຊຽນ 2015. ລາຍການນີ້ ເພື່ອແນໃສ່ໂຄສະນາກ່ຽວກັບ ອາຊຽນ, ເພີ່ມທະວີຄວາມຮັບຮູ້ກ່ຽວກັບ ອາຊຽນ ຢູ່ ນອກແວ, ປະກອບສ່ວນຊຸກຍູ້ການຮ່ວມມືຫລາຍດ້ານລະຫວ່າງ ນອກແວ ກັບ ອາຊຽນ, ກໍຄືກັບແຕ່ລະປະເທດສະມາຊິກ ອາຊຽນ. ດ້ວຍຖານະເປັນປະທານຄະນະກຳມະການ ອາຊຽນ ຢູ່ Oslo, ຕາງໜ້າໃຫ້ບັນດາເອກອັກຄະລັດຖະທູດປະເທດສະມາຊິກ ອາຊຽນ ປະຈຳ Oslo, ທ່ານນາງເອກອັກຄະລັດຖະທູດ ຫວຽດນາມ ເລທິຕ໋ວຽດມາຍ ໄດ້ກ່າວຄຳປາໄສໄຂງານລາຕີວັດທະນະທຳ ອາຊຽນ 2015, ເນັ້ນໜັກເຖິງບາດກ້າວພັດທະນາໃໝ່ໃນການພົວພັນ ອາຊຽນ ແລະ ນອກແວ ດ້ວຍເລື່ອງບັນດາປະເທດ ອາຊຽນ ຍອບຮັບ ນອກແວ ເປັນຄູ່ເຈລະຈາຂົງເຂດຂອງ ອາຊຽນ ຢ່າງເປັນທາງການ ແຕ່ວັນທີ 5/8/2015, ເປີດກາລະໂອກາດເພື່ອຊຸກຍູ້ການຮ່ວມມືຫລາຍດ້ານກ່ວາອີກ, ໃນນັ້ນ ມີການເພີ່ມທະວີການລົງທຶນ ແລະ ການຄ້າລະຫວ່າງ ນອກແວ ແລະ ອາຊຽນ. ບັນດາເອກອັກຄະລັດຖະທູດ ອາຊຽນ ຢູ່ Oslo ເຊື່ອໝັ້ນວ່າ: ນອກແວ ຈະສົມທົບຢ່າງແໜ້ນແຟ້ນກັບບັນດາປະເທດ ອາຊຽນ ໃນການຜັນຂະຫາຍບັນດາໂຄງການຮ່ວມມືໃນຫລາຍຂົງເຂດ, ເພີ່ມທະວີການພົວພັນຄູ່ຮ່ວມມື ແລະ ປະກອບສ່ວນໃຫ້ການພັດທະນາແບບຍືນຍົງຢູ່ພາກພື້ນ.