ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງກ່າວຄຳເຫັນທີ່ງານລ້ຽງຮອງຮັບແຂກສາກົນ
|
(vovworld)- ເນື່ອງໃນໂອກາດສະເຫຼີມສະຫຼອງ 69 ປີ ແຫ່ງວັນຊາດຫວຽດນາມ 2/9, ຕອນຄ່ຳວັນທີ 28/8, ຢູ່ຮ່າໂນ້ຍ , ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ພ້ອມດ້ວຍພັນລະຍາໄດ້ເປັນເຈົ້າພາບຈັດງານລ້ຽງຮອງຮັບແຂກສາກົນຢ່າງສົມກຽດ.
ກ່າວຄຳເຫັນທີ່ງານລ້ຽງ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ເນັ້ນໜັກວ່າ ໃນຕະຫຼອດ 69 ປີທີ່ຜ່ານມາ, ປະຊາຊົນຫວຽດນາມໄດ້ສາມັກຄີເປັນຈິດໜຶ່ງໃຈດຽວ, ຜ່ານຜ່າທຸກຄວາມຫຍຸ້ງຍາກລຳບາກເພື່ອຮັກສາພື້ນຖານເອກະລາດ, ອິດສະຫຼະພາບຂອງຊາດ, ໂຮມປະເທດຊາດເປັນເອກະພາບ, ສ້າງສາປະເທດຊາດ, ປະກອບສ່ວນຊຸກຍູ້ສັນຕິພາບ, ມິດຕະພາບຄວາມກ້າວໜ້າໃນພາກພື້ນ ແລະ ໃນໂລກ. ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງກ່າວວ່າ :
“ ພວກຂ້າພະເຈົ້າຮັບຮູ້ຢ່າງເລິກເຊິ່ງວ່າ ການພັດທະນາຂອງປະເທດຊາດແມ່ນຕິດພັນກັບສັນຕິພາບ, ສະຖຽນລະພາບ ແລະ ວັດທະນາຖາວອນ ໃນພາກພື້ນ ແລະ ໃນໂລກ. ການສົນທະນາ, ການຮ່ວມມື, ຄວາມເຄົາລົບຜົນປະໂຫຍດຂອງກັນບົນພື້ນຖານຕ່າງຝ່າຍຕ່າງມີຜົນປະໂຫຍດ, ເຄົາລົບກົດໝາຍສາກົນ ແລະ ບັນດາມາດຖານລວມ ແມ່ນພື້ນຖານ, ແບບວິທີພື້ນຖານ ແລະ ມີປະສິດທິຜົນທີ່ສຸດເພື່ອຮັກສາສັນຕິພາບ, ສະຖຽນລະພາບ ແລະ ການພັດທະນາໃຫ້ແກ່ທຸກໆປະເທດ. ຫວຽດນາມຍາມໃດກໍເຮັດຈົນສຸດຄວາມສາມາດຂອງຕົນ ປະກອບສ່ວນຢ່າງຕັ້ງໜ້າ ແລະ ມີຄວາມຮັບຜິດຊອບເຂົ້າໃນບັນດາບັນຫາຄວາມໝັ້ນຄົງ, ການພັດທະນາລວມຂອງພາກພື້ນ ແລະ ໃນໂລກ. ”
ໂດຍຕາງໜ້າບັນດາແຂກສາກົນຜູ້ທີ່ມີກຽດທີ່ມາຮ່ວມງານລ້ຽງ, ທ່ານເອກອັກຄະລັດຖະທູດ ເວເນຊູເອລາ ປະຈຳຫວຽດນາມ Rondon Ucategui ຮັກສາການຫົວໜ້າຄະນະທູຕານຸທູດ ໄດ້ອວຍພອນລັດ ແລະ ປະຊາຊົນຫວຽດນາມເນື່ອງໃນໂອກາດວັນຊາດ ແລະ ເຊື່ອໝັ້ນວ່າ ຫວຽດນາມຈະບັນລຸບັນດາບາດກ້າວເດີນທີ່ຍາວໄກກ່ວາໃນເປົ້າໝາຍກາຍເປັນປະເທດອຸດສາຫະກຳ ແລະ ວັດທະນາຖາວອນໃນປີ 2020, ພ້ອມທັງເຂົ້າຮ່ວມຢ່າງຕັ້ງໜ້າເຂົ້າໃນບັນດາເວທີປາໄສ 2 ຝ່າຍ ແລະ ຫຼາຍຝ່າຍ, ສ້າງພື້ນຖານໃຫ້ໂລກໜຶ່ງຊຶ່ງໃນນັ້ນ, ທຸກໆປະເທດລ້ວນແຕ່ດຳລົງຊີວິດຢູ່ຮ່ວມກັນໃນສັນຕິພາບ.