ງານວາງສະແດງແຜນທີ່ ແລະ ເອກະສານກ່ຽວກັບ ຮ່ວາງຊາ, ເຈື່ອງຊາ ຂອງຫວຽດນາມ
(ພາບປະກອບ)
(vovworld) – ວັນທີ 16/01, ຢູ່ສູນກອງປະຊຸມແຂວງບິ່ງທ້ວນ, ກະຊວງຖະແຫຼງຂ່າວ ແລະ ສື່ສານສົມທົບກັບຄະນະກຳມະການປະຊາຊົນແຂວງບິ່ງທ້ວນ ໄຂງານວາງສະແດງແຜນທີ່ ແລະ ເອກະສານ “ຮ່ວາງຊາ, ເຈື່ອງຊາ ຂອງຫວຽດນາມ - ພະຍານຫຼັກຖານປະຫວັດສາດ ແລະ ກົດໝາຍ”. ມີແຜນທີ່ເກືອບ 100 ແຜ່ນ ແລະ ເອກະສານ, ວັດຖຸພັນຫຼາຍຢ່າງທີ່ນຳມາວາງສະແດງໃນຄັ້ງນີ້ ແມ່ນພະຍານຫຼັກຖານທີ່ໝັ້ນຄົງກ່ຽວກັບອະທິປະໄຕຂອງຫວຽດນາມ ທີ່ມີຕໍ່ 2 ໝູ່ເກາະຮ່ວາງຊາ ແລະ ເຈື່ອງຊາ. ງານວາງສະແດງລວມມີເອກະສານໂດຍລາດຊະວົງສະໄໝສັກດີນາຫວຽດນາມ ແລະ ອຳນາດການປົກຄອງຝລັ່ງຢູ່ອິນດູຈີນ, ທີ່ຕາງໜ້າລັດຫວຽດນາມ ໃນສະໄໝນັ້ນປະກາດແຕ່ສະຕະວັດທີ່ 17 ຫາຕົ້ນສະຕະວັດທີ 20, ຢືນຢັນວິວັດການກຳນົດ, ປະຕິບັດ ແລະ ປົກປັກຮັກສາອະທິປະໄຕຢ່າງຕໍ່ເນື່ອງຂອງຫວຽດນາມ ທີ່ມີຕໍ່ 2 ໝູ່ເກາະຮ່ວາງຊາ ແລະ ເຈື່ອງຊາ. ພິເສດທີ່ງານວາງສະແດງຍັງມີບັນດາເອກະສານແຕ່ສະໄໝລາດຊະວົງຫງວຽນ ທີ່ປະກາດເຖິງບັນຫາຂຸດຄົ້ນ, ຄຸ້ມຄອງ 2 ໝູ່ເກາະ; ບັນດາເອກະສານແຕ່ໄລຍະປີ 1954 – 1975 ແລະ ແຕ່ປີ 1975 ມາຮອດປະຈຸບັນ ກ່ຽວກັບການສືບຕໍ່ຢືນຢັນປະຕິບັດການປົກປັກຮັກສາອະທິປະໄຕຂອງຫວຽດນາມ ສຳລັບ 2 ໝູ່ເກາະຮ່ວາງຊາ ແລະ ເຈື່ອງຊາ.