ທ່ານປະທານປະເທດເຈືອງເຕີນຊາງ ໃນງານໂຮມຊຸມນຸມມິດຕິງ
(ພາບ:vn.news.yahoo.com)
(VOV)- ວັນທີ 29/12, ຢູ່ຮ່າໂນ້ຍ, ໄດ້ຈັດງານໂຮມຊຸມນຸມມິດຕິງຂັ້ນລັດສະເຫຼີມສະຫຼອງ 40 ປີແຫ່ງໄຊຊະນະຮ່າໂນ້ຍ-ດ້ຽນບຽນຝູທາງອາກາດ ໂດຍມີການເຂົ້າຮ່ວມຂອງບັນດາການນຳພັກ, ລັດ, ລັດຖະບານ, ສະພາແຫ່ງຊາດ, ແນວໂຮມປະເທດຊາດ, ຜູ້ຕາງໜ້າກອງທັບ ແລະ ປະຊາຊົນທຸກຊັ້ນຄົນ ແລະ ບັນດາຜູ້ແທນສາກົນ, ທູດທະຫານຂອງຫຼາຍປະເທດ….
ໃນສູນທອນພົດອ່ານທີ່ພິທີ, ທ່ານປະທານປະເທດເຈືອງເຕີນຊາງ ໄດ້ຕີລາຄາສູງໄຊຊະນະຮ່າໂນ້ຍ-ດ້ຽນບຽນຝູທາງອາກາດ, ຖືວ່າ: ນີ້ແມ່ນໄຊຊະນະມີລັກສະນະຍຸກສະໄໝອັນເລິກເຊິ່ງ, ປະກອບສ່ວນສຳຄັນກ້າວໄປເຖິງໄຊຊະນະສົມບູນຂອງການຕໍ່ຕ້ານຕ້ານຈັກກະພັດອາເມລິກາ ຂອງຊາດຫວຽດນາມ. ໃນເວລາພຽງ 12 ວັນ ແລະ ຄືນໄດ້ທຳການຕໍ່ສູ້ຢ່າງອົງອາດກ້າຫານ, ກອງທັບ ແລະ ປະຊາຊົນຫວຽດນາມ ໄດ້ຕີເອົາຊະນະການບຸກໂຈມຕີຍຸດທະສາດທາງອາກາດຂອງກອງທັບອາເມລິກາ, ສ້າງເປັນໄຊຊະນະຮ່າໂນ້ຍ-ດ້ຽນບຽນຝູທາງອາກາດ . ພາຍຫຼັງຖືກປະລາໄຊ, ອຳນາດການປົກຄອງອາເມລິກາ ຕ້ອງຢຸດຕິການຖີ້ມລະເບີດລົງພາກເໜືອຫວຽດນາມ, ຍອມກັບຄືນສູ່ໂຕະເຈລະຈາ ແລະ ເຊັນສັນຍາປາຣີ ກ່ຽວກັບການສ້າງສັນຕິພາບຢູ່ຫວຽດນາມ ຄືນໃໝ່. ທ່ານປະທານປະເທດເຈືອງເຕີນຊາງ ຊີ້ແຈງວ່າ:
“ວັນເວລາຈະລ່ວງເລີຍໄປ, ໄຊຊະນະຮ່າໂນ້ຍ-ດ້ຽນບຽນຝູທາງອາກາດ ຈະແມ່ນສັນຍາລັກແຫ່ງເຈດຈຳນົງອົງອາດກ້າແກ່ນ, ບໍ່ຍອມຈຳນົນ, ສະຫຼຽວສະຫຼາດ, ມີຫົວຄິດປະດິດສ້າງ, ແມ່ນຄວາມເອກອ້າງທະນົງໃຈຂອງກອງທັບ ແລະ ປະຊາຊົນຫວຽດນາມ, ແມ່ນໜຶ່ງໃນບັນດາວິລະກຳອັນສະຫງ່າລາສີໃນປະຫວັດສາດແຫ່ງການຕໍ່ຕ້ານສັດຕູຜູ້ຮຸກຮານຂອງຊາດຫວຽດນາມ ວິລະຊົນ “
ທ່ານປະທານປະເທດເຈືອງເຕີນຊາງ ເນັ້ນໜັກວ່າ: ບັນດາບົດຮຽນຂອງໄຊຊະນະຮ່າໂນ້ຍ-ດ້ຽນບຽນຝູທາງອາກາດ ກ່ອນນີ້ 40 ປີມີຄຸນຄ່າອັນໃຫ່ຍຫຼວງໃນສະພາບປະເທດຫວຽດນາມ ພວມປະຕິບັດພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ. ຕາງໜ້າໃຫ້ພັກ, ລັດ ແລະ ປະຊາຊົນຫວຽດນາມ, ທ່ານສະແດງໃຫ້ເຫັນຄວາມຂອບອົກຂອບໃຈອັນເລິກເຊິ່ງຕໍ່ການສະໜັບສະໜູນຂອງເພື່ອນມິດສາກົນ, ປະຊາຊົນຜູ້ຮັກຫອມສັນຕິພາບ ແລະ ຍຸດຕິທຳໃນໂລກ, ໃນນັ້ນມີປະຊາຊົນອາເມລິກາ ສຳລັບພາລະກິດປົກປັກຮັກສາປະເທດຊາດຂອງຊາດຫວຽດນາມ. ທ່ານປະທານປະເທດເຈືອງເຕີນຊາງ ຢືນຢັນວ່າ:
“ຜ່ານບັນດາການທຳລາຍອັນໜັກໜ່ວງ ແລະ ການເສຍສະຫຼະອັນໃຫ່ຍຫຼວງໃນສົງຄາມ, ຍິ່ງກ່ວາໃຜໝົດ, ປະຊາຊົນຫວຽດນາມ ມີຄວາມຮັກຫອມສັນຕິພາບເພື່ອສ້າງສາ ແລະ ພັດທະນາປະເທດຊາດ. ປະຊາຊົນຫວຽດນາມ ປາດຖະໜາຢາກເພີ່ມທະວີການພົວພັນມິດຕະພາບ, ການຮ່ວມມື, ພ້ອມກັນພັດທະນາພ້ອມກັບປະເທດຕ່າງໆໃນໂລກ, ໃນນັ້ນມີອາເມລິກາ ຕາມຈິດໃຈຫວຽດນາມ ຢາກເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ເປັນສະມາຊິກທີ່ມີຄວາມຮັບຜິດຊອບໃນປະຊາຄົມໂລກ, ຮັກສາສັນຕິພາບ, ສະຖຽນລະພາບໃນໂລກ.“