ຈີນ ປະກາດແຜນການປະຕິຮູບ ໂຄງປະກອບລັດຖະບານ ຄືນໃໝ່
(ພາບປະກອບ)
(vovworld) - ວັນທີ 10/03, ໃນບົດລາຍງານທີກອງປະຊຸມປະຈຳປີ ສະພາປະຊາຊົນແຫ່ງຊາດຈີນ ຊຸດທີ 12, ກຳມະການລັດຖະບານທ່ານ ໝ່າຄາຍ ໃຫ້ຮູ້ວ່າ ລັດຖະບານຂອງປະເທດນີ້ມີແຜນການປ່ຽນໃໝ່ບັນດາບົດບາດໜ້າທີ່ຂອງລັດຖະບານຢູ່ລະດັບກະຊວງຢ່າງແຮງ ເພື່ອຫຼຸດຜ່ອນການແຊກແຊງດ້ານບໍລິຫານເຂົ້າໃນບັນຫາຕະຫຼາດ ແລະ ສັງຄົມ. ທ່ານ ໝ່າຄາຍ ເນັ້ນໜັກວ່າ ບັນດາກະຊວງ, ຂະແໜງການຂອງລັດຖະບານພວມສຸມໃສ່ເຂົ້າໃນບັນດາບັນຫາຈຸລະພາກ ຫຼາຍເກີນໄປ. ນີ້ແມ່ນການປະຕິຮູບໂຄງປະກອບຄັ້ງທີ 7 ຂອງລັດຖະບານຈີນ ໃນໄລຍະ 3 ທົດສະວັດຜ່ານມາ. ຕາມແຜນການແລ້ວ, ຈຳນວນກະຊວງຈະຫຼຸດຈາກ 27 ລົງເຫຼືອພຽງ 25 ກະຊວງ, ໃນຂະນະນັ້ນບາງອົງການ, ຂະແໜງການກໍໄດ້ຮັບການສ້າງໂຄງປະກອບຄືນໃໝ່. ໃນບົດລາຍງານວຽກງານຂອງລັດຖະບານທີ່ພິທີໄຂກອງປະຊຸມສະໄໝສາມັນເທື່ອທີ 1 ສະພາປະຊາຊົນແຫ່ງຊາດຈີນ ຊຸດທີ 12 ເມື່ອວັນທີ 05/03 ຜ່ານມາ, ທ່ານນາຍົກລັດຖະມົນຕີເວີນເຈຍປາວ ໃຫ້ຄຳໝັ້ນສັນຍາວ່າ ຈະສືບຕໍ່ປ່ຽນໃໝ່ບັນດາບົດບາດໜ້າທີຂອງລັດຖະບານ, ຕັດແຍກການຄຸ້ມຄອງດ້ານບໍລິຫານອອກຈາກການຄຸ້ມຄອງວິສາຫະກິດ, ຊັບສິນແຫ່ງຊາດ, ບັນດາວຽກງານຂອງລັດ ແລະ ບັນດາອົງການຈັດຕັ້ງສັງຄົມເພື່ອສ້າງລັດຖະບານໃຫ້ມີປະສິດທິຜົນ.