(vovworld) - ຕອນເຊົ້າວັນທີ 28/8, ທ່ານນາຍົກລັດຖະມົນຕີ Nguyen Tan Dung ໄດ້ໃຫ້ການຕ້ອນຮັບທ່ານ ສົມສະຫວາດ ເລັ່ງສະຫວັດ, ກຳມະການກົມການເມືອງ, ຮອງນາຍົກລັດຖະມົນຕີຜູ້ປະຈຳລັດຖະບານ ສປປລາວ, ປະທານອານຸກຳມະການຮ່ວມມືລາວ - ຫວຽດນາມ ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານນາຍົກລັດຖະມົນຕີ Nguyen Tan Dung ໄດ້ເນັ້ນໜັກວ່າ ສອງຝ່າຍຄວນສືບຕໍ່ຜັນຂະຫຍາຍບັນດາຂໍ້ຕົກລົງເຊິ່ງການນຳຂັ້ນສູງຂອງສອງປະເທດໄດ້ເປັນເອກະພາບນຳກັນຢ່າງມີປະສິດທິຜົນ, ໂດຍສະເພາະແມ່ນການຮ່ວມມືດ້ານເສດຖະກິດ, ການຄ້າ, ການລົງທຶນ… ນຳວົງເງິນການຄ້າສອງສົ້ນລະຫວ່າງສອງປະເທດໃຫ້ບັນລຸຕົວເລກສູງກວ່າ ໃນໄລຍະຈະມາເຖິງ. ທ່ານນາຍົກລັດຖະມົນຕີ Nguyen Tan Dung ຫວັງວ່າ ສອງຝ່າຍເພີ່ມທະວີການແລກປ່ຽນຂໍ້ມູນ, ສົມທົບກັນໃນການເຄື່ອນໄຫວ, ສະໜັບສະໜູນເຊິ່ງກັນ ແລະ ກັນ ບົນເວທີປາໄສພາກພື້ນ ແລະ ສາກົນ.
ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ໄດ້ສະແດງຄວາມພາກພູມໃຈເມື່ອມາຢ້ຽມຢາມ ແລະ ເຮັດວຽກຢູ່ຫວຽດນາມ ແລະ ຢືນຢັນວ່າ ລາວ ຈະເຮັດຈົນສຸດຄວາມສາມາດຂອງຕົນ ເພື່ອສືບຕໍ່ເພີ່ມພູນຄຸນສ້າງໃຫ້ສາຍພົວພັນມິດຕະພາບ ແລະ ການຮ່ວມມືແບບພິເສດລະຫວ່າງຫວຽດນາມ - ລາວ.