ຊຸກຍູ້ການຮ່ວມມື ຮອບດ້ານລະຫວ່າງສະພາແຫ່ງຊາດ ຫວຽດນາມ - ລາວ
ທ່ານປະທານສະພາແຫ່ງຊາດຫວຽດນາມ Nguyen Sinh Hung
ແລະ ທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້
( ພາບ nguyensinhhung.net )
( vovworld ) – ພາຍຫຼັງເຮັດວຽກມາເປັນເວລາ 1 ວັນ, ຕອນບ່າຍວັນທີ 23/4, ກອງປະຊຸມ “ ການພົວພັນຮ່ວມມືສະພາແຫ່ງຊາດຫວຽດນາມ - ລາວ, ຄວາມສາມັກຄີ - ມິດຕະພາບ ” ເຊິ່ງດຳເນີນຢູ່ແຂວງ Son La ໃນເຂດພູດອຍ, ທາງພາກເໜືອຫວຽດນາມ ໄດ້ອັດລົງ. ກອງປະຊຸມໄດ້ປຶກສາຫາລືກ່ຽວກັບສະພາບການຮ່ວມມືລະຫວ່າງສອງປະເທດ, ສອງສະພາແຫ່ງຊາດ ແລະ ລະຫວ່າງບັນດາແຂວງຊາຍແດນຂອງສອງປະເທດ ພ້ອມທັງຮັບຮອງເອົາແຈ້ງການຮ່ວມໂດຍຢັ້ງຢືນຈະສືບຕໍ່ປັບປຸງ ແລະ ຊຸກຍູ້ການພົວພັນຮ່ວມມືຮອບດ້ານລະຫວ່າງຫວຽດນາມ - ລາວ ໃນໄລຍະຈະມາເຖິງ.
ທີ່ວາລະອັດກອງປະຊຸມ, ທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້ ຕີລາຄາສູງໝາກຜົນຂອງກອງປະຊຸມຄັ້ງນີ້, ຖືວ່າ ນີ້ແມ່ນກາລະໂອກາດເພື່ອໃຫ້ສອງຝ່າຍທົບທວນຄືນສາຍພົວພັນມິດຕະພາບ, ນ້ຳໃຈສາມັກຄີແບບພິເສດ ແລະ ການຮ່ວມມືຮອບດ້ານລາວ - ຫວຽດນາມ. ຕາມທ່ານນາງ ປານີ ຢາທໍ່ຕູ້ ໃນເງື່ອນໄຂໂລກພວມມີການຜັນແປ່ສັບສົນຫຼາຍຢ່າງຄືປະຈຸບັນ, ສອງຝ່າຍຄວນຕັ້ງໜ້າເພີ່ມທະວີການໂຄສະນາເພື່ອໃຫ້ປະຊາຊົນທຸກຊັ້ນວັນນະ ມີຄວາມເຂົ້າໃຈແຈ້ງກວ່າກ່ຽວກັບການພົວພັນທີ່ເປັນມູນເຊື້ອ ແລະ ຫາຍາກລະຫວ່າງສອງປະເທດ. ກ່າວຄຳເຫັນອັດກອງປະຊຸມ, ທ່ານປະທານສະພາແຫ່ງຊາດຫວຽດນາມ Nguyen Sinh Hung ຢັ້ງຢືນວ່າ.
ທ່ານປະທານສະພາແຫ່ງຊາດ Nguyen Sinh Hung ກ່າວຄຳເຫັນທີ່ກອງປະຊຸມ
( ພາບ nguyensinhhung.net )
“ ພວກເຮົາເຊື້ອໝັ້ນຢ່າງແນ່ວແນ່ວ່າ ໝາກຜົນຂອງກອງປະຊຸມຈະປະກອບສ່ວນສືບຕໍ່ຍົກສູງປະສິດທິຜົນ, ຄຸນນະພາບການຮ່ວມມືຮອບດ້ານລະຫວ່າງສອງປະເທດ, ສອງສະພາແຫ່ງຊາດ. ພັກ, ລັດຫວຽດນາມ ຍາມໃດກໍ່ປະຕິບັດຕາມຄຳສັ່ງສອນຂອງປະທານ ໂຮ່ຈິມິນ, ໝັ້ນໝາຍຈະຮັກສາສາຍພົວພັນສາມັກຄີແບບພິເສດຫວຽດນາມ - ລາວ ຄືດັ່ງຮັກສາແກ່ນຕາຂອງຕົນເອງ. ພວກຂ້າພະເຈົ້າຕັດສິນໃຈພ້ອມກັບພັກ, ລັດ ແລະ ປະຊາຊົນລາວບັນດາເຜົ່າ ພັດທະນາສາຍພົວພັນນັ້ນຢ່າງບໍ່ຢຸດຢັ້ງ ບົນພື້ນຖານເຄົາລົບເອກະລາດ, ເປັນເຈົ້າຕົນເອງ ແລະ ອະທິປະໄຕຂອງແຕ່ລະປະເທດ, ພ້ອມທັງອອກແຮງປ່ຽນໃໝ່ເນື້ອໃນ, ຮູບການເຄື່ອນໄຫວຮ່ວມມື. ການພົວພັນລະຫວ່າງສະພາແຫ່ງຊາດຫວຽດນາມ ແລະ ລາວ ແມ່ນພາກສ່ວນທີ່ມີຄວາມສຳຄັນທີ່ສຸດໃນສາຍພົວພັນລະຫວ່າງສອງປະເທດ. ດັ່ງນັ້ນສອງຝ່າຍຕັ້ງໜ້າປະຕິບັດບັນດາທິດທາງໃນແຈ້ງການຮ່ວມເຊິ່ງກອງປະຊຸມໄດ້ວາງອອກ, ປະກອບສ່ວນນຳການພົວພັນລະຫວ່າງສອງປະເທດ, ສອງສະພາແຫ່ງຊາດໃຫ້ນັບມື້ນັບມີປະສິດທິຜົນ ”.