ຊຸກຍູ້ການຮ່ວມມືດ້ານແຮງງານລະຫວ່າງຫວຽດນາມ - ຕາເວັນອອກກາງ - ອາບຟຣີກາເໜືອ
ເວທີປາໄສເສດຖະກິດ ຫວຽດນາມ ແລະ ບັນດາຄູ່ຮ່ວມມືຕາເວັນອອກກາງ - ອາບຟຣີກາເໜືອ
(ພາບ: chinhphu.vn)
(vovworld) - ຊຸກຍູ້ການຮ່ວມມືດ້ານແຮງງານລະຫວ່າງຫວຽດນາມ - ຕາເວັນອອກກາງ - ອາບຟຣີກາເໜືອ ແມ່ນເນື້ອໃນຂອງການໂອ້ລົມສົນທະນາກ່ຽວກັບການຮ່ວມມືດ້ານແຮງງານໃນຂອບເຂດເວທີປາໄສເສດຖະກິດ ຫວຽດນາມ ແລະ ບັນດາຄູ່ຮ່ວມມືຕາເວັນອອກກາງ - ອາບຟຣີກາເໜືອ, ເຊິ່ງຖືກໄຂຂຶ້ນໃນຕອນເຊົ້າວັນທີ 05 ພະຈິກ, ຢູ່ຮ່າໂນ້ຍ. ຫວຽດນາມ ມີຄົນງານປະມານ 30.000 ຄົນ ທີ່ພວມເຮັດວຽກຢູ່ບັນດາປະເທດໃນພາກພື້ນ ຕາເວັນອອກກາງ - ອາບຟຣີກາເໜືອ. ໃນຕະຫຼອດກວ່າ 30 ປີຜ່ານມາ, ຜູ້ຊ່ຽວຊານ ແລະ ຄົນງານຫວຽດນາມ ນັບໝື່ນເທື່ອຄົນ ໄດ້ປະກອບສ່ວນດ້ານຄວາມຮູ້ ແລະ ກຳລັງແຮງງານຂອງຕົນເຂົ້າໃນວິວັດການພັດທະນາຢ່າງວ່ອງໄວຂອງຫຼາຍປະເທດຕາເວັນອອກກາງ - ອາບຟຣີກາເໜືອ. ທ່ານຮອງລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ຫງວຽນແທງຮ່ວາ ໃຫ້ຮູ້ວ່າ.
“ມີຫຼາຍປະເທດຕາເວັນອອກກາງ - ອາບຟຣີກາເໜືອ ທີ່ມີກຳລັງສາມາດດ້ານເສດຖະກິດ ແລະ ພວມພັດທະນາຢ່າງຂະຫຍັນຂັນເຄ່ືອນ, ໃນນັ້ນມີບັນດາປະເທດພວມຍູ້ແຮງການລົງທຶນ, ເປີດກວ້າງພື້ນຖານໂຄງລ່າງຄື ອາຣາບີຊາອຸດິ, ສະຫະລັດອາຫຼັບເອມີເລດ, ກວາຕາ... ສະນັ້ນ, ບັນດາປະເທດລ້ວນແຕ່ມີຄວາມຕ້ອງການຮັບຄົນງານຕ່າງປະເທດດ້ວຍຈຳນວນຫຼວງຫຼາຍ ແລະ ວິຊາຊີບຕ່າງໆ... ຕະຫຼາດແຮງງານຢູ່ຕາເວັນອອກກາງ - ອາບຟຣີກາເໜືອ ມີລັກສະນະເປີດ, ເໝາະສົມກັບລະດັບຄວາມຮູ້ ແລະ ເງື່ອນໄຂຂອງຄົນງານຫວຽດນາມ”.
ທ່ານເອກອັກຄະລັດຖະທູດຫວຽດນາມ ປະຈຳອາຣາບີຊາອຸດິ ເຈີນຫງວຽນຕວຽນ ຖືວ່າ, ເພື່ອພັດທະນາຕະຫຼາດແຮງງານຫວຽດນາມຢູ່ຕາເວັນອອກກາງ - ອາບຟຣີກາເໜືອ, ລັດຖະບານຫວຽດນາມຕ້ອງມີນະໂຍບາຍໄລຍະຍາວເພື່ອຊຸກຍຸ້ການຮ່ວມມືດ້ານແຮງງານ.
“ຕ້ອງມີການປ່ຽນໃໝ່ກ່ຽວກັບກົນໄກສົມທົບກັນຄຸ້ມຄອງຄົນງານຢູ່ຕ່າງປະເທດ ຢູ່ຕະຫຼາດຕາເວັນອອກກາງ - ອາບຟຣີກາເໜືອ, ໃນນັ້ນສຸມໃສ່ເຂົ້າໃນບັນດາຈຸດດັ່ງນີ້: ບັນດາບໍລິສັດເມື່ອເຊັນສັນຍາກັບຄົນງານ, ເຮັດວຽກກັບກະຊວງ, ກົມຄຸ້ມຄອງ ແມ່ນຕ້ອງແຈ້ງໃຫ້ສະຖານທູດຮັບຊາບ. ບັນດາປະເທດຕາເວັນອອກກາງ - ອາບຟຣີກາເໜືອ ດ້ວຍຄວາມສາມາດບົມຊ້ອນອັນໃຫຍ່ຫຼວງມາເຮັດວຽກ, ພວກເຮົາຕ້ອງຄິດໄລ່ເຖິງທິດ ຕ້ອງມີຜູ້ຕາງໜ້າບໍລິສັດປະຈຳຖິ່ນຢູ່ທີ່ນີ້.”