(VOVWORLD) -ຕອນຄ່ຳວັນທີ 25 ສິງຫາ, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຟ້າມມິງຈິງ ໄດ້ໂອ້ລົມທາງໂທລະສັບກັບທ່ານນາຍົກລັດຖະມົນຕີ ແບນຊິກ Alexander De Croo.
 ທ່ານນາຍົກລັດຖະມົນຕີ ຟ້າມມິງຈິງ ໂອ້ລົມທາງໂທລະສັບກັບທ່ານນາຍົກລັດຖະມົນຕີ ແບນຊິກ Alexander De Croo |
ທີ່ການໂອ້ລົມທາງໂທລະສັບ, ນາຍົກລັດຖະມົນຕີ ສອງທ່ານໄດ້ຕີລາຄາວ່າ ໃນໄລຍະເກືອບ 50 ປີຜ່ານມາ, ການພົວພັນມິດຕະພາບ ແລະ ເປັນມູນເຊື້ອລະຫວ່າງ ຫວຽດນາມ ແລະ ແບນຊິກ, ໄດ້ພັດທະນາຢ່າງຕັ້ງໜ້າ, ມີຫຼາຍຮູບແບບ ແລະ ແທດຈິງ ດ້ວຍຫຼາຍຂົງເຂດການຮ່ວມມືທີ່ອຸດົມສົມບູນ, ເພີ່ມເຕີມໃຫ້ກັນ ແລະ ເສີມຂະຫຍາຍໄດ້ບັນດາທ່າແຮງຂອງທັງສອງຝ່າຍ, ໃນນັ້ນມີການສ້າງການພົວພັນຄູ່ຮ່ວມມືຍຸດທະສາດ ກ່ຽວກັບກະສິກຳ ໃນປີ 2018.
ຕີລາຄາສູງບັນດາການປະກອບສ່ວນຢ່າງຕັ້ງໜ້າໃນປັດຈຸບັນຂອງ ແບນຊິກ ຕໍ່ກອງທຶນ Covax ທີ່ປະກອບສ່ວນເຂົ້າໃນການໜູນຊ່ວຍບັນດາປະເທດ ໃນການປ້ອງກັນ, ຕ້ານໂລກລະບາດໂຄວິດ - 19, ທ່ານນາຍົກລັດຖະມົນຕີ ຟ້າມມິງຈິງ ໄດ້ສະເໜີໃຫ້ລັດຖະບານ ແບນຊິກ ຈົ່ງເອົາໃຈໃສ່, ສ້າງເງື່ອນໄຂສະດວກຊ່ວຍໃຫ້ ຫວຽດນາມ ສຳຜັດກັບບັນດາແຫຼ່ງວັກຊິນຫຼາຍ ແລະ ໄວທີ່ສຸດ, ຮ່ວມມືກັນຖ່າຍທອດເຕັກໂນໂລຢີຜະວິດວັກຊິນ, ໜູນຊ່ວຍຢາປິ່ນປົວ, ວັດຖຸອຸປະກອນການແພດ ເພື່ອໃຫ້ ຫວຽດນາມ ຄວບຄຸມໂລກລະບາດໂຄວິດ - 19 ທີ່ພວມມີການຜັນແປຢ່າງສັບສົນຢູ່ບາງແຂວງ, ນະຄອນ ໂດຍໄວ.
ນາຍົກລັດຖະມົນຕີສອງທ່ານ ໄດ້ເຫັນດີເປັນເອກະພາບ ຈະສູ້ສົນເພີ່ມການລົງທຶນ, ການຄ້າສອງສົ້ນ, ມຸ່ງໄປເຖິງການຟື້ນຟູແບບຍືນຍົງພາຍຫຼັງໂລກລະບາດໂຄວິດ - 19 ເພື່ອແນໃສ່ນຳການພົວພັນລະຫວ່າງສອງປະເທດຂຶ້ນສູ່ລະດັບສູງໃໝ່ ຕາມທິດແທດຈິງ ແລະ ມີປະສິດທິຜົນກ່ວາອີກ.
ກ່ຽວກັບບັນຫາທະເລຕາເວັນອອກ, ການນຳສອງທ່ານໄດ້ຢັ້ງຢືນເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ ແລະ ຄວາມເສລີໃນການເດີນເຮືອ ແລະ ການບິນ, ແກ້ໄຂການຂັດແຍ້ງກັນໂດຍສັນຕິວິທີໂດຍອີງໃສ່ກົດໝາຍສາກົນ, ໃນນັ້ນມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982, ປະຕິບັດຖະແຫຼງການຮ່ວມກ່ຽວກັບຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ມຸ່ງໄປເຖິງການບັນລຸໄດ້ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ຢ່າງແທດຈິງ, ມີປະສິດທິຜົນ.