(vovworld) - ກອງທຶນໜູນຊ່ວຍຄົ້ນຄວ້າທະເລຕາເວັນອອກແມ່ນກອງທຶນສັງຄົມທີ່ເຄື່ອນໄຫວໂດຍບໍ່ຄິດໄລ່ເຖິງກຳໄລ, ເພື່ອຊຸກຍູ້ການເຄື່ອນໄຫວອຸປະຖຳໃຫ້ແກ່ການຄົ້ນຄວ້າຂອງບັນດານັກຮຽນຮູ້, ນັກສຶກສາ, ບັນດາບຸກຄົນ, ອົງການຈັດຕັ້ງພາຍໃນ ແລະ ຕ່າງປະເທດທີ່ຢາກປະກອບສ່ວນກຳລັງ ແລະ ພຸມປັນຍາໃຫ້ແກ່ພາລະກິດປົກປັກຮັກສາອະທິປະໃຕທະເລໝູ່ເກາະຂອງ ຫວຽດນາມ, ຊຸກຍູ້ບັນດາມາດຕະການປົກປັກຮັກສາສັນຕິພາບ, ຄວາມໝັ້ນຄົງ ແລະ ການຮ່ວມມືຢູ່ເຂດທະເລຕາເວັນອອກ. ກອງທຶນຍັງແມ່ນຊ່ອງເຜີຍແຜ່, ໂຄສະນາ, ຍົກສູງສະຕິປົກປັກຮັກສາອະທິປະໃຕທະເລໝູ່ເກາະແຫ່ງຊາດ, ເໝາະສົມກັບແຜນນະໂຍບາຍ, ແນວທາງຂອງພັກ, ນະໂຍບາຍ, ກົດໝາຍຂອງລັດ ຫວຽດນາມ. ກອງທຶນໄດ້ຮັບການສ້າງຕັ້ງຕາມຂໍ້ລິເລີ່ມຂອງວິທະຍາຄານການທູດ.
ກ່າວຄວາມເຫັນທີ່ພິທີສະເໜີຕົວ, ທ່ານ ດັ້ງດິ່ງກວີ໋, ຜູ້ອຳນວຍການວິທະຍາຄານການທູດ, ທັງເປັນປະທານກອງທຶນດັ່ງກ່າວຢືນຢັນວ່າ:
”ຈຸດປະສົງຂອງກອງທຶນແມ່ນສ້າງກຳລັງຄົ້ນຄ້ວາ, ເຕົ້າໂຮມກຳລັງຄົ້ນຄ້ວາ ແລະ ເຊື່ອມຕໍ່ກຳລັງຄົ້ນຄ້ວາ. ປະຈຸບັນພວກເຮົາມີກຳລັງຄົ້ນຄ້ວາທະເລຕາເວັນອອກກວ້າງຂວາງພໍສົມຄວນແລ້ວ, ແຕ່ຕ້ອງຊຸກຍູ້ວິວັດການປະສານສົມທົບ, ການເຊື່ອມຕໍ່ກັນຢ່າງແຮງກວ່າອີກ”.
ທີ່ພິທີສະເໜີກອງທຶນໜູນຊ່ວຍຄົ້ນຄ້ວາທະເລຕາເວັນອອກ, ທ່ານອະດີດຮອງນາຍົກລັດຖະມົນຕີ ຫວູຄວານ. ທີ່ປຶກສາຂັ້ນສູງຂອງກອງທຶນດັ່ງກ່າວ, ປາຖະໜາວ່າ:
”ພວກຂ້າພະເຈົ້າມີຄວາມຫວັງສອງຢ່າງ, ທີໜຶ່ງແມ່ນຍົກລະດັບທັງດ້ານຂອບຂະໜາດ ແລະ ຄຸນນະພາບການຄົ້ນຄ້ວາພາຍໃນປະເທດ. ທີສອງແມ່ນຊຸກຍູ້ການຄົ້ນຄ້ວານີ້ໃຫ້ຕິດພັນກັບການຄົ້ນຄ້ວາຂອງໂລກ, ເຮັດໃຫ້ຂໍ້ມູນກ່ຽວກັບທະເລຕາເວັນອອກມີຄວາມອຸດົມສົມບູນກວ່າ, ປະກອບສ່ວນເຮັດໃຫ້ໂລກມີຄວາມເຂົ້າໃຈຫຼັກໝັ້ນຂອງພວກເຮົາກວ່າອີກ, ພ້ອມທັງໜູນຊ່ວຍໃຫ້ແກ່ການຕໍ່ສູ້ດ້ານການທູດ, ການເມືອງ, ປົກປັກຮັກສາອະທິປະໄຕທະເລເກາະຂອງຫວຽດນາມ”.