ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮຸ່ງ ຕ້ອນຮັບ
ທ່ານຮອງປະທານສະພາສູງ ຍີ່ປຸ່ນ Koshiishi Azuma
(ພາບ: TTXVN)
(vovworld) – ຕອນບ່າຍວັນທີ 15/12, ຢູ່ສຳນັກງານສະພາແຫ່ງຊາດ, ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮຸ່ງ ໄດ້ໃຫ້ການຕ້ອນຮັບຄະນະສະມາຊິກສະພາສູງ ຍີ່ປຸ່ນ ໂດຍທ່ານຮອງປະທານສະພາສູງ ຍີ່ປຸ່ນ Koshiishi Azuma ນຳໜ້າ, ພວມມີການຢ້ຽມຢາມ ແລະ ເຮັດວຽກຢູ່ ຫວຽດນາມ. ນະທີ່ນີ້, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນວ່າ: ພັກ, ລັດ ແລະ ສະພາແຫ່ງຊາດ ຫວຽດນາມ ຍາມໃດກໍຖືເປັນສຳຄັນ ແລະ ຈະເຮັດຈົນສຸດຄວາມສາມາດຂອງຕົນ ເພື່ອຊຸກຍູ້ນ້ຳໃຈມິດຕະພາບ, ການພົວພັນຮ່ວມມືລະຫວ່າງ 2 ລັດ ແລະ ປະຊາຊົນ 2 ປະເທດ ຫວຽດນາມ - ຍີ່ປຸ່ນ ໃຫ້ນັບມື້ນັບພັດທະນາແຂງແຮງໃນອະນາຄົດ, ຕອບສະໜອງຄວາມມຸ່ງມາດປາດຖະໜາຂອງແຕ່ລະຝ່າຍ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ປາດຖະໜາວ່າ: ສະພາແຫ່ງຊາດ 2 ປະເທດສືບຕໍ່ຮັກສາການພົວພັນຮ່ວມມືຢ່າງແໜ້ນແຟ້ນ, ສືບຕໍ່ສະໜັບສະໜູນທັດສະນະຂອງກັນຢູ່ບັນດາເວທີປາໄສນິຕິບັນຍັດໃນພາກພື້ນ ແລະ ໂລກ ເພື່ອສັນຕິພາບ ແລະ ຄວາມວັດທະນາຖາວອນໃຫ້ມວນມະນຸດ.
ສ່ວນທ່ານຮອງປະທານ Koshiishi Azuma ປາດຖະໜາວ່າ: 2 ສະພາແຫ່ງຊາດ 2 ປະເທດສືບຕໍ່ເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ທຸກກຸ່ມສະມາຊິກລັດຖະສະພາມິດຕະພາບ ແລະ ສະມາຊິກສະພາແຫ່ງຊາດ ເພື່ອແບ່ງປັນບົດຮຽນໃນວຽກງານສ້າງກົດໝາຍ; ຍູ້ແຮງການພົບປະແລກປ່ຽນປະຊາຊົນ, ພິເສດແມ່ນບັນດາລຸ່ນໜຸ່ມ. ທ່ານ Koshiishi Azuma ຢືນຢັນວ່າ: ຈະມານະພະຍາຍາມຢ່າງບໍ່ຢຸດຢັ້ງ ເພື່ອສະໜັບສະໜູນ ແລະ ຊຸກຍູ້ການພົວພັນຮ່ວມມື ຫວຽດນາມ - ຍີ່ປຸ່ນ ໃຫ້ນັບມື້ນັບພັດທະນາຢ່າງແຂງແຮງ, ບັນລຸໄດ້ບັນດາຜົນງານໃໝ່ໃນອະນາຄົດ.