(vovworld) - ວັນທີ 24 ສິງຫາ, ທ່ານລັດຖະມົນຕີການຕ່າງປະເທດອີຣານ Mohammad Javad Zarif ໃຫ້ຮູ້ວ່າ ຊີຣີ ຈະອະນຸຍາດໃຫ້ບັນດານັກກວດກາສະຫະປະຊາຊາດ ເຂົ້າໄປສະຖານທີ່ມໍ່ກັບນະຄອນຫຼວງ Damascus, ແມ່ນສະຖານທີ່ຖືກຖືວ່າໄດ້ເກີດເຫດບຸກໂຈມຕີດ້ວຍທາດເຄມີ. ສຳນັກຂ່າວສານທາງການ IRNA ຂອງອີຣານ ໄດ້ຄັດຄຳເວົ້າຂອງທ່ານ Zarif ໂດຍໃຫ້ຮູ້ວ່າ ໃນການແລກປ່ຽນທາງໂທລະສັບ, ທ່ານລັດຖະມົນຕີການຕ່າງປະເທດຊີຣີ Walid al Moallen ຢືນຢັນວ່າ ລັດຖະບານຊີຣີ ພວມຮ່ວມມືກັບຄະນະພັກກວດກາສະຫະປະຊາຊາດ ທີ່ພວມມີໜ້າຢູ່ຊີຣີ ເພື່ອສ້າງເງື່ອນໄຂໃຫ້ແກ່ການຢ້ຽມຢາມເຂດຖືກບັນດາກຸ່ມກໍ່ການຮ້າຍບຸກໂຈມຕີ ດ້ວຍທາດເຄມີ.
ແລະກໍ່ໃນວັນດຽວກັນ, ຊ່ອງໂທລະພາບແຫ່ງຊາດຊີຣີ ໃຫ້ຮູ້ວ່າ ທະຫານລັດຖະບານໄດ້ພົບເຫັນອາວຸດເຄມີ ໃນບັນດາຂຸມໃຕ້ດິນຂອງພວກທະຫານກະບົດຢູ່ເຂດ Jobar ຂຶ້ນກັບຊານນະຄອນ Damascus.
ໃນຂະນະນັ້ນ, ໃນການໂອ້ລົມທາງໂທລະສັບເມື່ອວັນທີ 24 ສິງຫາ, ທ່ານປະທານາທິບໍດີອາເມລິກາ Barack Obama ແລະ ທ່ານນາຍົກລັດຖະມົນຕີອັງກິດ David Cameron ໄດ້ສະແດງຄວາມວິຕົກກັງວົນທີ່ສຸດ ຕໍ່ໜ້າແຫຼ່ງຂ່າວຖືວ່າ ອຳນາດການປົກຄອງຊີຣີ ໄດ້ນຳໃຊ້ອາວຸດເຄມີ ແນໃສ່ສາມັນຊົນ.