ພ້ອມກັບບັນຍາກາດຕ້ອນຮັບລະດູບານໃໝ່ຢູ່ບ້ານເກີດເມືອງນອນ, ປະຊາຄົມຊາວ ຫວຽດນາມອາໄສຢູ່ຫຼາຍປະເທດ ກໍ່ພວມຕ້ອນຮັບປີໃໝ່ປະຈຳຊາດ ປີມະໂຣງ 2012 ແລະ ສະເຫຼີມສະຫຼອງ 82 ປີແຫ່ງວັນສ້າງຕັ້ງພັກກອມມູນິດຫວຽດນາມ (ຄືວັນທີ 3/2/1930 – 3/2/2012) ຢ່າງຟົດຟື້ນມ່ວນຊື່ນ.
ວັນທີ 20/1, ສະຖານທູດຫວຽດນາມປະຈຳສະຫະພັນລັດເຊຍໄດ້ຈັດຕັ້ງການພົບປະສັງສັນ ”ອວຍພອນພັກ, ອວຍພອນລະດູບານໃໝ່ຢ່າງມ່ວນຊື່ນ” ດ້ວຍການເຂົ້າຮ່ວມຂອງບັນດາຄອບຄົວພະນັກງານ, ພາລະກອນສະຖານທູດ, ຜູ້ຕາງໜ້າບັນດາສະຫະສະມາຄົມ ແລະ ປະຊາຄົມຊາວຫວຽດນາມຢູ່ໂມດສະກູ. ກ່າວຄຳເຫັນອວຍພອນປີໃໝ່ພໍ່ແມ່ນປະຊາຊົນ, ທ່ານເອກອັກຄະລັດຖະທູດ ຟ້າມຊວນເຊີນ ເນັ້ນໜັກວ່າ: ໃນປີທີ່ຜ່ານມາ, ເຖິງວ່າສະພາບເສດຖະກິດປະສົບກັບຄວາມຫຍູ້ງຍາກກໍຕາມ, ແຕ່ປະຊາຄົມຊາວຫວຽດນາມອາໄສຢູ່ສະຫະພັນລັດເຊຍສືບຕໍ່ເສີມຂະຫຍາຍມູນເຊື້ອຊ່ວຍເຫຼືອເຊິ່ງກັນ ແລະ ກັນ, ສ້າງວຽກເຮັດງານທຳໃຫ້ແກ່ ຜູ້ອອກແຮງງານນັບໝື່ນໆຄົນ, ພ້ອມກັນສ້າງປະຊາຄົມນັບມື້ນັບເຕີບໃຫຍ່ເຂັ້ມແຂງ, ປະກອບສ່ວນຊຸກຍູ້ນ້ຳໃຈມິດຕະພາບອັນເປັນມູນເຊື້ອ ແລະ ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ສະຫະພັນລັດເຊຍກ່ວາອີກ. ແລະກໍ່ໃນຕອນຄຳວັນດຽວກັນ ຢູ່ສະຖານທູດຫວຽດນາມປະຈຳ ຟຣັ່ງ, ທ່ານເອກອັກຄະລັດຖະທູດ ເຢືອງຈີ໋ຢູງ ໄດ້ສະແດງຄວາມເຊື່ອໝັ້ນວ່າ: ດ້ວຍມູນເຊື້ອຮັກຊາດ, ອ່ວາຍເມືອຫາເຖິງກົກເຄົ້າເຫງົ້າກໍ, ພໍ່ແມ່ຊາວຫວຽດນາມອາໄສຢູ່ຟຣັ່ງ ຈະສືບຕໍ່ມີການເຄື່ອນໄຫວຫຼາຍຢ່າງເພື່ອຮ່ວມແຮງຮ່ວມໃຈສ້າງສາປະເທດຊາດ.
ສະຖານທູດຫວຽດນາມປະຈຳ ຍີ່ປູ່ນກໍ່ຈັດຕັ້ງການພົບປະສັງສັນຕ້ອນຮັບບູນປີໃໝ່ປະຈຳຊາດ. ທ່ານເອກອັກຄະລັດຖະທູດຫວຽດນາມປະຈຳ ຍີ່ປູ່ນ ດວານຊວນຮືງ ຫວັງວ່າ: ການພົວພັນລະຫວ່າງ 2 ປະເທດຈະມີບັນດາບາດກ້າວພັດທະນາກະໂດດຂັ້ນ. ທ່ານເອກອັກຄະລັດຖະທູດຍັງເນັ້ນໜັກວ່າ: ພະນັກງານສະຖານທູດຫວຽດນາມປະຈຳຍີ່ປູ່ນຈະມານະພະຍາຍາມ ເພື່ອການພັດທະນາການພົວພັນລະຫວ່າງ 2 ປະເທດ, ພ້ອມກັນນັ້ນກໍເຊື້ອໝັ້ນວ່າຈະສືບຕໍ່ໄດ້ຮັບການຮ່ວມມື, ຊ່ວຍເຫຼືອຈາກເພື່ອນມິດຍີ່ປູ່ນ.