(ພາບ:tuyengiao.vn)
(vovworld)- ຕອນເຊົ້າວັນທີ 24/3, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີຫງວຽນເຕີນຢຸງ ໄດ້ເຮັດວຽກກັບຄະນະບໍລິຫານງານສູນກາງຄະນະຊາວໜຸ່ມກອມມູນິດໂຮ່ຈິມິນ ເພື່ອແນໃສ່ຕີລາຄາໝາກຜົນວຽກງານຊາວໜຸ່ມ, ຂະບວນການຊາວໜຸ່ມ-ເຍົາວະຊົນໃນປີຜ່ານມາ ແລະ ໃນ 3 ເດືອນຕົ້ນປີ. ທ່ານນາຍົກລັດຖະມົນຕີຫງວຽນເຕີນຢຸງ ໄດ້ຝາກຄຳອວຍພອນມາຍັງພະນັກງານ, ສະມາຊິກຊາວໜຸ່ມ, ຊາວໜຸ່ມ, ເຍົາວະຊົນ ແລະ ອະນຸຊົນທົ່ວປະເທດ ເນື່ອງໃນໂອກາດສະເຫຼີມສະຫຼອງ 82 ປີແຫ່ງວັນສ້າງຕັ້ງຄະນະຊາວໜຸ່ມກອມມູນິດໂຮ່ຈິມິນ (26/3/1931-26/3/2013). ທ່ານໄດ້ຕີລາສູງ, ຍ້ອງຍໍຊົມເຊີຍໝາກຜົນແຫ່ງການເຄື່ອນໄຫວຂອງອົງການຊາວໜຸ່ມຂັ້ນຕ່າງໆ, ທ່ານເນັ້ນໜັກວ່າ: ຍິ່ງກ່ວາເວລາໃດໝົດ, ສູນກາງຊາວໜຸ່ມຕ້ອງເອົາໃຈໃສ່ເປັນພິເສດ ປະຕິບັດວຽກງານໂຄສະນາ, ຂົນຂວາຍຊາວໜຸ່ມກ່ຽວກັບນ້ຳໃຈຮັກຊາດ ແລະ ລະບອບ, ສຶກສາອົບຮົມຄວາມຮັບຜິດຊອບຂອງຊາວໜຸ່ມຕໍ່ປະເທດຊາດ, ສືບຕໍ່ຊຸກຍູ້ບັນດາຂະບວນການຂອງຊາວໜຸ່ມ, ຮັບປະກັນລັກສະນະຂະຫຍັນຂັນເຄື່ອນ, ມີຫົວຄິດປະດິດສ້າງ ແລະ ນຳໜ້າຂອງຊາວໜຸ່ມໃນການພັດທະນາເສດຖະກິດສັງຄົມ, ປົກປັກຮັກສາປະເທດຊາດ, ກໍ່ຮ່າງສ້າງຕົວ…
ເນື່ອງໃນໂອກາດສະເຫຼີມສະຫຼອງ 82 ປີແຫ່ງວັນສ້າງຕັ້ງຄະນະຊາວໜຸ່ມກອມມູນິດໂຮ່ຈິມິນ, ໄດ້ຈັດໃຫ້ມີການເຄື່ອນໄຫວຕ່າງໆໃນທົ່ວປະເທດ. ຕອນເຊົ້າຂອງວັນທີ 24/3, ເລຂາຊາວໜູ່ມດີເດັ່ນທົ່ວປະເທດປີ 2013 ລວມ 82 ຄົນໄດ້ຈັດພິທີລາຍງານຜົນງານ ແລະ ເຂົ້າຢ້ຽມຂ່ຳນັບປະທານໂຮ່ຈິມິນ. ໃນໂອກາດນີ້, ເລຂາຊາວໜຸ່ມດີເດັ່ນ 82 ຄົນຈະພົບປະແລກປ່ຽນກັບພະນັກງານຄະນະຊາວໜຸ່ມລຸ້ນຕ່າງໆ, ພົບປະກັບການນຳພັກ, ລັດ, ເຂົ້າຮ່ວມພິທີຍ້ອງຍໍຊົມເຊີຍ ແລະ ມອບລາງວັນ 26/3…..
“ວັນບຸນຊາວໜຸ່ມກັບວັດທະນະທຳຄົມມະນາຄົມ“ ໂດຍສູນກາງຄະນະຊາວໜຸ່ມກອມມູນິດໂຮ່ຈິມິນ ສົມທົບກັບຄະນະກຳມະການຮັບປະກັນຄວາມປອດໄພທາງຄົມມະນາຄົມແຫ່ງຊາດ ຈັດຂຶ້ນໃນຕອນເຊົ້າວັນທີ 24/3 ຢູ່ແຂວງທາຍງວຽນ. ທ່ານລໍ່ກວາງຕູ ຮອງປະທານສູນກາງສະຫະພັນຊາວໜຸ່ມຫວຽດນາມ ເນັ້ນໜັກວ່າ:
“ເສີມຂະຫຍາຍນ້ຳໃຈປະຈັນບານ, ມີຫົວຄິດປະດິດສ້າງຂອງໄວໜຸ່ມ ແລະ ໝາກຜົນບັນລຸໄດ້ໃນຊຸມປີຜ່ານມາ, ປີ 2013, ພະນັກງານອົງການຊາວໜຸ່ມ, ສະຫະພັນຊາວໜຸ່ມຂັ້ນຕ່າງໆ ກຳນົດສືບຕໍ່ຍົກສູງສະຕິຄວາມຮັບຮູ້ຂອງພະນັກງານ, ສະມາຊິກຊາວໜຸ່ມ, ສະມາຊິກສະຫະພັນຊາວໜຸ່ມ ໃນວຽກງານຮັບປະກັນຄວາມເປັນລະບຽບຮຽບຮ້ອຍ, ຄວາມປອດໄພທາງຄົມມະນາຄົມ ແລະ ແກ້ໄຂສະພາບລົດຕິດ, ຖືວ່ານີ້ແມ່ນວຽກງານຈຸດສຸມໃນວຽກງານສຶກສາອົບຮົມຂອງຄະນະຊາວໜຸ່ມ ແລະ ບັນດາອົງການຈັດຕັ້ງຂອງຊາວໜຸ່ມ“