(VOVWORLD) - ຕອນເຊົ້າວັນທີ 30 ທັນວາ ຢູ່ຮ່າໂນ້ຍ ໄດ້ດຳເນີນກອງປະຊຸມຄັ້ງທີ 38 ຄະນະກຳມະການລະຫວ່າງ ລັດຖະບານ ຫວຽດນາມ ແລະ ກູບາ ທາງອອນລາຍ ໂດຍທ່ານລັດຖະມົນຕີກະຊວງກໍ່ສ້າງ ຫວຽດນາມ ຟ້າມຮົ່ງຮ່າ ແລະ ທ່ານລັດຖະມົນຕີກະຊວງການຄ້າ ແລະ ລົງທຶນ ຕ່າງປະເທດ ກູບາ Rodrigo Malmierca Diaz ເປັນປະທານຮ່ວມ.
 ກອງປະຊຸມຄັ້ງທີ 38 ຄະນະກຳມະການລະຫວ່າງ ລັດຖະບານ ຫວຽດນາມ ແລະ ກູບາ ທາງອອນລາຍ |
ປີ 2020 ເປັນປີທີ່ມີຄວາມໝາຍພິເສດ ເມື່ອ ຫວຽດນາມ ແລະ ກູບາ ຈັດພິທີສະເຫຼີມສະຫຼອງ 60 ປີ ແຫ່ງວັນສ້າງຕັ້ງການພົວພັນທາງການທູດ ຢ່າງເປັນທາງການ - ເຊິ່ງເປັນຂີດໝາຍສຳຄັນໃນປະຫວັດສາດແຫ່ງການພົວພັນມິດຕະພາບ, ຄວາມສາມັກຄີ, ການຮ່ວມມືຮອບດ້ານ. ກ່າວຄໍາເຫັນທີ່ກອງປະຊຸມ, ທ່ານລັດຖະມົນຕີກະຊວງກໍ່ສ້າງ ຫວຽດນາມ ຟ້າມຮົ່ງຮ່າ ຢັ້ງຢືນວ່າ:
“ໃນປີ 2020, ສາມາດເວົ້າໄດ້ວ່າ, ສອງຝ່າຍ ໄດ້ພະຍາຍາມຢ່າງສຸດຂີດ, ຮ່ວມມືກັນຢ່າງແໜ້ນແຟ້ນ ແລະ ບັນລຸໄດ້ຫຼາຍໝາກຜົນຕັ້ງໜ້າໃນການຈັດຕັ້ງປະຕິບັດຄຳໝັ້ນສັນຍາໃນບົດບັນທຶກກອງປະຊຸມຄັ້ງທີ 37. ສອງຝ່າຍສືບຕໍ່ຮັກສາການປະຕິບັດບົດບັນທຶກທີ່ໄດ້ລົງນາມ ແລະ ຊອກຫາເນື້ອໃນໃໝ່ໃນການຮ່ວມມືໃນຂົງເຂດການເງິນ, ທະນາຄານ, ການຄ້າ, ການລົງທຶນ, ການກໍ່ສ້າງ, ຄົມມະນາຄົມຂົນສົ່ງ, ສັງຄົມ, ວັດທະນະທຳກິລາ, ການທ່ອງທ່ຽວ ແລະວິທະຍາສາດເຕັກໂນໂລຢີ”.
ປີ 2021, ສອງຝ່າຍສືບຕໍ່ສົມທົບກັນຢ່າງແໜ້ນແຟ້ນ, ຈັດຕັ້ງປະຕິບັດມາດຕະການຢ່າງລະອຽດ ເພື່ອປະຕິບັດສັນຍາການຄ້າ ຫວຽດນາມ - ກູບາ ໃຫ້ມີປະສິດທິຜົນ,ໃຫ້ບຸລິມະສິດຢ່າງສຸດຂີດ ເພື່ອຍົກສູງວົງເງິນການຄ້າສອງສົ້ນ, ສູ້ຊົນໃຫ້ບັນລຸໄດ້ລະດັບ 500 ລ້ານ USD ໃນປີ 2025.