(ທ່ານ ຫງວຽນທ້ຽນເຍີນ ປະທານຄະນະດຳມະການ
ແນວໂຮມປະເທດຊາດ ຫວຽດນາມ)
(vovworld) - ຕອນເຊົ້າວັນທີ 29/12, ຢູ່ ຮ່າໂນ້ຍ, ໄດ້ໄຂກອງປະຊຸມຄັ້ງທີ 7 ຄະນະປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຊຸດທີ 8. ບົດລາຍງານທີ່ກອງປະຊຸມສະແດງໃຫ້ເຫັນວ່າ, ປີ 2015 ບົດບາດ, ທີ່ຕັ້ງຂອງແນວໂຮມປະເທດຊາດ ຫວຽດນາມ ໃນລະບົບການເມືອງ ແລະ ໃນຊີວິດສັງຄົມ ໄດ້ຮັບຢືນຢັນຢ່າງຈະແຈ້ງ. ແນວໂຮມທຸກຂັ້ນໄດ້ລະດົມບົດບາດເຕົ້າໂຮມ, ກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດເປັນຢ່າງດີ; ຈັດຕັ້ງບັນດາຂະບວນການແຂ່ງຂັນ, ແລະການຂົນຂວາຍຢ່າງມີປະສິດທິຜົນ, ພ້ອມກັບລັດເອົາໃຈໃສ່ເບິ່ງແຍງ ແລະ ປົກປັກຮັກສາສິດຜົນປະໂຫຍດອັນຊອບທຳຂອງປະຊາຊົນ; ປະຕິບັດປະຊາທິປະໄຕ; ເພີ່ມທະວີຄວາມເຫັນດີເຫັນພ້ອມໃນສັງຄົມ; ຕິດຕາມກວດກາ ແລະ ໄຈ້ແຍກຕີລາຄາສັງຄົມ; ເຂົ້າຮ່ວມການກໍ່ສ້າງພັກ, ລັດ… ໄດ້ຮັບຄວາມເອົາໃຈໃສ່, ເຊື່ອໝັ້ນ ແລະ ນັບມື້ນັບໄດ້ການສະໜັບສະໜູນຈາກບັນດາອົງການລັດ ແລະ ປະຊາຊົນທຸກຊັ້ນວັນນະ. ທ່ານ ຫງວຽນຕຸກ, ກຳມະການຄະນະປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ, ຖືວ່າ:
“ໂດຍມີການສົມທົບກັນເຄື່ອນໄຫວ, ແນວໂຮມປະເທດຊາດຈຶ່ງລະດົມບັນດາອົງການສະມາຊິກເຂົ້າຮ່ວມການຕິດຕາມກວດກາ ແລະ ໄຈ້ແຍກຕີລາຄາສັງຄົມໄດ້. ປີ 2015, ແນວໂຮມປະເທດຊາດ ໄດ້ຜັນຂະຫຍາຍຂໍ້ຕົກລົງ 218 ກ່ຽວກັບແນວໂຮມເຂົ້າຮ່ວມການກໍ່ສ້າງພັກ, ກໍ່ສ້າງອຳນາດການປົກຄອງ. ແລະໃນເບື້ອງຕົ້ນສາມາດບັນລຸໄດ້ບັນດາຜົນງານທີ່ໜ້າຊື່ນຊົມ, ນັ້ນແມ່ນລະດົມບັນດາກຳລັງປະຕິບັດບົດບາດໜ້າທີ່ເປັນອົງການຮ່ວມສຳພັນດ້ານການເມືອງ, ສະຫະພັນດ້ວຍຄວາມສະໝັກໃຈຢ່າງຖືກຕ້ອງ. ຍ້ອນເຫດນັ້ນຈື່ງໄດ້ຮັບການສະໜັບສະໜູນໃນໝູ່ປະຊາຊົນ“.