(vovworld) - ຕອນບ່າຍວັນທີ 05/05, ຢູ່ຮ່າໂນ້ຍ, ກອງປະຊຸມທົ່ວປະເທດກ່ຽວກັບວຽກງານປ້ອງກັນ, ຕ້ານການສໍ້ລາດບັງຫຼວງໄດ້ສຳເລັດດ້ານເນື້ອໃນ, ລາຍການທີ່ໄດ້ວາງອອກ, ພາຍຫຼັງທີ່ເຮັດວຽກຢ່າງຮີບດ່ວນ, ເຂັ້ມງວດ, ມີໜ້າທີ່ຮັບຜິດຊອບມາເປັນ 1 ວັນ. ກ່າວຄຳເຫັນສະຫຼຸບກອງປະຊຸມ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ເນັ້ນໜັກວ່າ.
“ໂດຍອີ່ງໃສ່ກົດລະບຽບ ແລະ ບັນດາມະຕິຂອງພັກ, ຕ້ອງຫັນເປັນລະອຽດສ້າງບັນດາກົດລະບຽບພາຍໃນຂອງພັກ ເພື່ອສ້າງລະບົບບັນດາຂໍ້ກຳນົດກ່ຽວກັບການປ້ອງກັນ, ຕ້ານການສໍ້ລາດບັງຫຼວງຢ່າງມີວິທະຍາສາດເທື່ອລະກ້າວ, ແໜ້ນແຟ້ນ, ຄົບຊຸດ; ລະບົບບັນດາຫຼັກການ ແລະ ຄຸນສົມບັດສຳລັບບັນດາພະນັກງານ, ສະມາຊິກພັກ, ໂດຍສະເພາະແມ່ນຜູ້ນຳ, ໃນການຮັກສາຄຸນນະທາດ, ຄຸນສົມບັດ, ບໍລິສຸດ, ທ່ຽງທຳ, ເປັນແບບຢ່າງ ນຳໜ້າໃນການປ້ອງກັນ, ຕ້ານການສໍ້ລາດບັງຫຼວງ, ຕ້ານການຟຸມເຟືອຍ”.
ທ່ານເລຂາທິການໃຫຍ່ ຫງວຽນຟູຈ້ອງ ຮຽກຮ້ອງເພີ່ມທະວີວຽກງານຕິດຕາມກວດກາຂອງອົງຄະນະພັກ, ຂອງທັງລະບົບການເມືອງ ແລະ ທົ່ວສັງຄົມກວ່າອີກ; ນຳເນື້ອໃນວຽກງານປ້ອງກັນ, ຕ້ານການສໍ້ລາດບັງຫຼວງ ເຂົ້າໃນລາຍການຕິດຕາມກວດກາແຕ່ລະປີ.
“ຄະນະໂຄສະນາສຶກສາສູນກາງ ເປັນເຈົ້າພາບສົມທົບກັບບັນດາອົງການ ກ່ຽວຂ້ອງ, ຄົ້ນຄວ້າ, ເປັນເສນາທິການໃຫ້ພັກ, ລັດ, ແນວໂຮມປະເທດຊາດຫວຽດນາມ ມີແຜນການໂຄສະນາຢ່າງເລິກເຊິ່ງ, ກວ້າງຂວາງໃນທົ່ວພັກ, ທົ່ວກອງທັບ ແລະ ປະຊາຊົນທຸກຊັ້ນວັນນະ ກ່ຽວກັບວຽກງານເຂົ້າຮ່ວມການຄົ້ນພົບ ແລະ ກ່າວໂທດສໍ້ລາດບັງຫຼວງ ຕິດພັນກັບການຍ້ອງຍໍ, ເຊີດຊູ ແລະ ມອບລາງວັນໃຫ້ບັນດາຜູ້ກ່າວໂທດ, ຄົ້ນພົບຢ່າງເໝາະສົມ ແລະທັນການຍ້ອງຍໍບັນດາບົດຮຽນທີ່ດີ, ແບບຢ່າງທີ່ດີ, ພ້ອມທັງກ່າວປະນາມບັນດາການກະທຳຫຍໍ້ທ້ໍ, ການສໍ້ລາດບັງຫຼວງຢ່າງແຮງ”.