ຍາມໃດ ຫວຽດນາມ ກໍ່ເອົາໃຈໃສ່ ແລະ ມີບັນດານະໂຍບາຍໜູນຊ່ວຍແມ່ຍິງພັດທະນາ
ທ່ານຮອງນາຍົກລັດຖະມົນຕີຫງວຽນທ້ຽນເຍີນ ເຂົ້າຮ່ວມກອງປະຊຸມ
(ພາບ: qdnd.vn)
(vovworld) - ໃນໄລຍະ 10 ປີຜ່ານມາ, ບັນດາຂະບວນການ ແລະ ບັ້ນຂົນຂວາຍໂດຍສະຫະພັນແມ່ຍິງ ຫວຽດນາມ ປຸກລະດົມຄື “ແມ່ຍິງຊ່ວຍເຫຼືອເຊິ່ງກັນ ແລະ ກັນເພື່ອພັດທະນາເສດຖະກິດ”, “ຊ່ວຍແມ່ຍິງທຸກຍາກມີເຮືອນຢູ່”, “ເຮືອນແຫ່ງສາຍຈິດມິດໃຈ”... ໄດ້ດຶງດູດແມ່ຍິງເຂົ້າຮ່ວມເປັນຈຳນວນຫຼວງຫຼາຍ, ສ້າງກຳລັງໜູນທີ່ໃຫຍ່ຫຼວງ. ກ່າວຄຳເຫັນທີ່ກອງປະຊຸມຍ້ອງຍໍຊົມເຊີຍແບບຢ່າງແມ່ຍິງສ້າງເສດຖະກິດເກັ່ງທີ່ດີເດັ່ນທົ່ວປະເທດໄລຍະ 2002 – 2013, ເຊິ່ງດຳເນີນໄປໃນຕອນເຊົ້າວັນທີ 02 ຕຸລາ, ຢູ່ຮ່າໂນ້ຍ, ທ່ານຮອງຍາຍົກລັດຖະມົນຕີ ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຫງວຽນທ້ຽນເຍີນ ໄດ້ຍ້ອງຍໍຊົມເຊີຍ ແລະ ອວຍພອນໝາກຜົນທີ່ສະຫະພັນແມ່ນຍິງທຸກຂັ້ນບັນລຸໄດ້ ໃນວຽກງານລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ພັດທະນາເສດຖະກິດໃນໄລຍະຜ່ານມາ. ທ່ານຮອງນາຍົກລັດຖະມົນຕີຫງວຽນທ້ຽນເຍີນ ຢືນຢັນວ່າ.
“ຫວຽດນາມ ໄດ້ຮັບການຕີລາຄາວ່າ ແມ່ນ ຈຸດສະຫວ່າງສະໄຫວກ່ຽວກັບການຫຼຸດຜ່ອນຄວາມທຸກຍາກ, ໄດ້ສຳເລັດການປະຕິບັດຈຸດໝາຍສະຫັດສະວັດກ່ຽວກັບການລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ ກ່ອນກຳນົດເວລາ 3 ປີ. ໃນຜົນງານລວມນັ້ນ ມີການປະກອບສ່ວນຢ່າງຕັ້ງໜ້າຂອງສະຫະພັນແມ່ຍິງຫວຽດນາມ ພ້ອມກັບເອື້ອຍນ້ອງແມ່ຍິງໃນທົ່ວປະເທດ. ສະຫະພັນແມ່ຍິງທຸກຂັ້ນໄດ້ຜັນຂະຫຍາຍບັນດາຂະບວນການຢ່າງແທດຈິງ ແລະ ມີປະສິດທິຜົນ. ການເຄື່ອນໄຫວຂອງສະຫະພັນບໍ່ພຽງແຕ່ດຶງດູດຄວາມສົນໃຈ ແລະ ການເຂົ້າຮ່ວມຂອງແມ່ຍິງເທົ່ານັ້ນ ຫາກຍັງໄດ້ຮັບການສະໜັບສະໜູນຈາກອຳນາດການປົກຄອງທຸກຂັ້ນ, ຂຸດຄົ້ນບັນດາກົນໄກສິນເຊື່ອພາຍໃນປະເທດ ແລະ ສາກົນເປັນຢ່າງດີ ເພື່ອໜູນຊ່ວຍບັນດາຄອບຄົວ ແລະ ແມ່ຍິງເຮັດເສດຖະກິດຢ່າງແທດຈິງອີກດ້ວຍ”.
ທ່ານປະທານປະເທດ ຫວຽດນາມ ເຈືອງເຕີນຊາງ ພົບປະກັບບັນດາແບບຢ່າງສ້າງເສດຖະກິດເກັ່ງ
(ພາບ: Thống Nhất/TTXVN)
ກ່ອນໜ້ານັ້ນ, ກ່າວຄຳເຫັນທີ່ການພົບປະກັບບັນດາແບບຢ່າງສ້າງເສດຖະກິດເກັ່ງ, ເນື່ອງໃນໂອກາດມານະຄອນຫຼວງ ຮ່າໂນ້ຍ ເຂົ້າຮ່ວມກອງປະຊຸມຍ້ອງຍໍຊົມເຊີຍແມ່ຍິງສ້າງເສດຖະກິດເກັ່ງທົ່ວປະເທດ 2013 ແລະ ວັນແມ່ຍິງປະດິດຄິດສ້າງ 2013, ທ່ານປະທານປະເທດ ຫວຽດນາມ ເຈືອງເຕີນຊາງ ເນັ້ນໜັກວ່າ: ເພື່ອບັນລຸໄດ້ຈຸດໝາຍຫຼຸດພົ້ນອອກຈາກສະພາບປະເທດດ້ອຍພັດທະນາ ເລື່ອງຍູ້ແຮງຂະບວນການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ, ບື່ນຕົວຂຶ້ນສ້າງເສດຖະກິດເກັ່ງຖືກ ຫວຽດນາມ ເອົາໃຈໃສ່ທີ່ສຸດ. ຈາກບັນດາປັດໄຈແບບຢ່າງນີ້, ບັນດາທ້ອງຖິ່ນຄວນທະວີຄຸນຮູບແບບ, ບົດຮຽນດີ, ແບ່ງປັນບົດຮຽນ, ສະເໜີມາດຕະການເພື່ອໃນໄລຍະຈະມາເຖິງມີຫຼາຍແບບຢ່າງແມ່ຍິງສ້າງເສດຖະກິດເກັ່ງຫຼາຍກ່ວາອີກ. ທ່ານປະທານປະເທດ ກໍ່ສະເໜີໃຫ້ສະຫະພັນແມ່ຍິງ ຫວຽດນາມ ຄວນສົມທົບຢ່າງແໜ້ນແຟ້ນກັບບັນດາຂະແໜງການ, ບັນດາທະນາຄານນະໂຍບາຍສັງຄົມ ແລະ ວິສາຫະກິດເພື່ອແກ້ໄຂຄວາມຫຍຸ້ງຍາກກ່ຽວກັບກົນໄກສ້າງເງື່ອນໄຂດີທີ່ສຸດ ບໍ່ພຽງແຕ່ໃຫ້ເອື້ອຍນ້ອງແມ່ຍິງ ເທົ່ານັ້ນ ຫາກຍັງໃຫ້ບັນດາຄອບຄົວບື່ນຕົວຂຶ້ນສ້າງເສດຖະກິດອີກດ້ວຍ. ສ່ວນບັນດາຜູ້ແທນຫວັງວ່າ: ພັກ, ລັດ ຄວນມີກົນໄກນະໂຍບາຍໜູນຊ່ວຍກ່ຽວກັບແຫຼ່ງທຶນບຸລິມະສິດ, ມີມາດຕະການແກ້ໄຂສົ້ນອອກໃຫ້ຜະລິດຕະພັນ, ເພີ່ມທະວີການປຶກສາດ້ານກົດໝາຍໃຫ້ເອື້ອຍນ້ອງແມ່ຍິງ ເພື່ອປະກອບສ່ວນຊ່ວຍເຂົາເຈົ້າ ສາມາດບື່ນຕົວຂຶ້ນສ້າງເສດຖະກິດລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ.