ຍາມໃດຫວຽດນາມກໍຖືການພັດທະນາການພົວພັນມິດຕະພາບ,ການຮ່ວມມືກັບແດນມາກເປັນສຳຄັນ
ທ່ານຮອງນາຍົກລັດຖະມົນຕີຟ້າມບີງມີງ ໃນການຕ້ອນຮັບທ່ານນາງ Charlotte Laursen, ເອກອັກຄະລັດຖະທູດ ແດນມາກ
|
(vovworld)- “ຍາມໃດຫວຽດນາມກໍຖືການພັດທະນາການພົວພັນມິດຕະພາບ, ການຮ່ວມມືກັບແດນມາກເປັນສຳຄັນ”, ນັ້ນແມ່ນຄຳຢືນຢັນທ່ານຮອງນາຍົກລັດຖະມົນຕີຟ້າມບີງມີງ ໃນການຕ້ອນຮັບທ່ານນາງ Charlotte Laursen, ເອກອັກຄະລັດຖະທູດ ແດນມາກ ເນື່ອງໃນໂອກາດທ່ານມາຮັບຫນ້າທີ່ການທູດຢູ່ຫວຽດນາມ ໃນວັນທີ 25/02. ຕາງຫນ້າໃຫ້ລັດຖະບານຫວຽດນາມ, ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ໄດ້ຂອບອົກຂອບໃຈລັດຖະບານແດນມາກ ທີ່ໄດ້ຫນູນຊ່ວຍແຫລ່ງທຶນ ODA ໃຫ້ແກ່ ຫວຽດນາມ ແລະ ສະເຫນີ ທ່ານ Charlotte Laursen ຈົ່ງສົມທົບຢ່າງແຫນ້ນແຟ້ນກັບບັນດາກະຊວງ, ຂະແຫນງການ, ທ້ອງຖິ່ນຕ່າງໆຂອງຫວຽດນາມເພື່ອຜັນຂະຫຍາຍບັນດາມາດຕະການເຮັດໃຫ້ການພົວພັນສອງຝ່າຍໃນທຸກຂົງເຂດໃຫ້ເລິກເຊິ່ງກວ່າ. ສ່ວນທ່ານເອກອັກຄະລັດຖະທູດ Charlotte Laursen ຢືນຢັນ: ລັດຖະບານ ແດນມາກ ປາດຖະຫນາຢາກພັດທະນາການພົວພັນ, ການຮ່ວມມື ກັບຫວຽດນາມ ຢ່າງມີປະສິດທິຜົນ ແລະ ໃຫ້ຄຳໝັ້ນໝາຍ ຈະສົມທົບຢ່າງແຫນ້ນແຟ້ນກັບກະຊວງການຕ່າງປະເທດ ແລະ ບັນດາອົງການກ່ຽວຂ້ອງຂອງຫວຽດນາມ ເພື່ອຊຸກຍູ້ການຮ່ວມມືໃນບັນດາຂົງເຂດຊື່ງ ແດນມາກ ມີທ່າແຮງຢ່າງມີປະສິດທິຜົນ ພ້ອມທັງເອົາໃຈໃສ່ເພີ່ມທະວີການເຊື່ອມຕໍ່ວິສາຫະກິດສອງປະເທດ.