(vovworld) - ວັນທີ 3/1, ຄະນະປະຈຳຄະນະຊີ້ນຳເຂດຕາເວັນຕົກພາກໃຕ້ ໄດ້ຈັດຕັ້ງການປະຊຸມຂ່າວປະກາດຂໍ້ມູນຂ່າວກ່ຽວກັບສະພາບເສດຖະກິດ - ສັງຄົມ ປີ 2012, ບັນດາຈຸດໝາຍ, ມາດຕະການສຳຄັນພັດທະນາ, ເສດຖະກິດ - ສັງຄົມຢ່າງວ່ອງໄວ ແລະ ໝັ້ນຄົງ, ຮັກສາຄວາມໝັ້ນຄົງດ້ານການເມືອງເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ປີ 2013. ຕາມນັ້ນແລ້ວ, ໃນປີ 2013, ທົ່ວເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ສູ້ຊົນບັນລຸລະດັບເຕີບໂຕເສດຖະກິດ (ຫຼື GDP) ແຕ່ 10 – 11%, ລາຍຮັບສະເລ່ຍໃສ່ຫົວຄົນກ່ວາ 36 ລ້ານດົ່ງ, ຍອດວົງເງິນສົ່ງອອກກ່ວາ 11 ຕື້ USD, ແກ້ໄຂວຽກເຮັດງານທຳໃຫ້ແກ່ຄົນງານປະມານ 400.000 ຄົນ… ເພື່ອບັນລຸໄດ້ບັນດາຈຸດໝາຍດັ່ງກ່າວ, ຄະນະຊີ້ນຳເຂດຕາເວັນຕົກພາກໃຕ້ ໄດ້ສຸມໃສ່ສົມທົບກັບບັນດາກະຊວງ, ຂະແໜງການສູນກາງ ໄດ້ກຳນົດຢ່າງຖືກຕ້ອງກັບທ່າແຮງ, ຄວາມສາມາດບົ່ມຊ້ອນຂອງແຕ່ລະທ້ອງຖິ່ນ ເພື່ອລົງທຶນ ແລະ ສ້າງນະໂຍບາຍດຶງດູດການລົງທຶນເຂົ້າບັນດາຂົງເຂດຈຸດສຸມ. ໄປຄຽງຄູ່ກັນນັ້ນ, ປະຕິບັດແຜນຮ່າງຮ່ວມສຳພັນລະຫວ່າງເຂດ, ສົ່ງເສີມຜັນຂະຫຍາຍທະວີຄຸນບັນດາຮູບແບບຜະລິດກະສິກຳຕາມທິດຮ່ວມສຳພັນຢ່າງແໜ້ນແຟ້ນ, ໝັ້ນຄົງ, ສ້າງມູນຄ່າເພີ່ມສູງ ເພື່ອແນໃສ່ສ້າງການຫັນປ່ຽນຢ່າງແຮງໃນການຜະລິດກະສິກຳ ຕິດພັນກັບການພັດທະນາເສດຖະກິດເຂດຊົນນະບົດ.
ຄະນະຊີ້ນຳເຂດຕາເວັນຕົກພາກໃຕ້ ກໍ່ໄດ້ວາງອອກບັນດາມາດຕະການສຸມໃສ່ແກ້ໄຂວຽກງານລົບລ້າງຄວາມອຶດຫິວຫຼຸດຜ່ອນຄວາມທຸກຍາກ, ຮັບປະກັນຊີວິດສັງຄົມ, ສະຫວັດດີການສັງຄົມ ຢ່າງມີປະສິດທິຜົນ, ປະຕິບັດນະໂຍບາຍທີ່ມີຕໍ່ບັນດາເປົ້າໝາຍນະໂຍບາຍ, ຊາວຊົນເຜົ່າ, ຜູ້ເຊື່ອຖືສາສະໜາໃນບໍລິເວນເປັນຢ່າງດີ.