ກອງປະຊຸມກ່ຽວກັບຜູ້ມີອາຍຸສູງຫວຽດນາມ
(ພາບ: qdnd.vn)
(vovworld) - ຕອນເຊົ້າວັນທີ 20 ສິງຫາ, ຢູ່ສຳນັກງານລັດຖະບານ, ຄະນະກຳມະການແຫ່ງຊາດກ່ຽວກັບຜູ້ມີອາຍຸສູງຫວຽດນາມ ໄດ້ຈັດກອງປະຊຸມຕີລາຄາການປະຕິບັດໂຄງການປະຕິບັດງານໃນຊຸມເດືອນຕົ້ນປີ ແລະ ຜັນຂະຫຍາຍໜ້າທີ່ແຕ່ນີ້ຮອດທ້າຍປີ 2013. ບົດລາຍງານຂອງຄະນະກຳມະການແຫ່ງຊາດກ່ຽວກັບຜູ້ມີອາຍຸສູງຫວຽດນາມ ຊີ້ແຈ້ງວ່າ: ວຽກງານຜູ້ມີອາຍຸສູງ ໄດ້ຮັບການເອົາໃຈໃສ່ ແລະ ຜັນຂະຫຍາຍຢ່າງຮອບດ້ານ, ອຸດົມສົມບູນ ແລະ ແທດຈິງຈາກບັນດາກະຊວງ, ຂະແໜງການຂັ້ນສູນກາງ ແລະ ທ້ອງຖິ່ນ, ບັນດາອົງການສັງຄົມ. ຍ້ອນເຫດນັ້ນ, ຊີວິດຂອງຜູ້ມີອາຍຸສູງນັບມື້ນັບໄດ້ຮັບການເບິ່ງແຍງດູແລດີກວ່າ ນັບທັງດ້ານວັດຖຸ ແລະ ຈິດໃຈ. ຜູ້ມີອາຍຸສູງນັບມື້ນັບມີເງື່ອນໄຂເຂົ້າຮ່ວມບັນດາການເຄື່ອນໄຫວສັງຄົມຢູ່ທ້ອງຖິ່ນ, ປະກອບສ່ວນຮັກສາສະຖຽນລະພາບດ້ານການເມືອງສັງຄົມ. ກ່າວຄຳເຫັນຢູ່ທີ່ນີ້, ທ່ານຮອງນາຍົກລັດຖະມົນຕີຫວຽດນາມ ຫງວຽນທ້ຽນເຍີນ ຊີ້ນຳບັນດາກະຊວງ, ຂະແໜງການທີ່ກ່ຽວຂ້ອງໂດຍກົງ ສືບຕໍ່ຜັນຂະຫຍາຍປະຕິບັດກົດໝາຍວ່າດ້ວຍຜູ້ມີອາຍຸສູງ, ກວດກາການປະຕິບັດນະໂຍບາຍສຳລັບຜູ້ມີອາຍຸສູງ, ຮັບປະກັນບັນດານະໂຍບາຍຖືກກັບເປົ້າໝາຍ; ຍູ້ແຮງວຽກງານເບິ່ງແຍງດູແລ ແລະ ເສີມຂະຫຍາຍບົດບາດຂອງຜູ້ມີອາຍຸສູງ.