ຍູ້ໄວການປະຕິບັດການ ຊ່ວຍເຫຼືອບັນດາວິສາຫະກິດເພື່ອຮັບປະກັນການ ຜະລິດ, ດຳເນີນທຸລະກິດເປັນປົກກະຕິ
(ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ)
(vovworld) – ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ຫາກໍ່ອອກຄຳສັ່ງກ່ຽວກັບການຍູ້ໄວການປະຕິບັດບັນດາມາດຕະການ ແລະ ແກ້ໄຂບັນດາລະບຽບການຊ່ວຍເຫຼືອວິສາຫະກິດຕ່າງໆທີ່ຖືກເສຍຫາຍຢູ່ບາງທ້ອງຖິ່ນ. ຄຳສັ່ງຊີ້ແຈ້ງວ່າ: ມາຮອດປະຈຸບັນ, ສະພາບຄວາມເປັນລະບຽບຮຽບຮ້ອຍ ແລະ ຄວາມປອດໄພທາງສັງຄົມຢູ່ບັນດາທ້ອງຖິ່ນໄດ້ຮັບການຮັບປະກັນ; ມີວິສາຫະກິດຫຼາຍແຫ່ງໄດ້ກັບຄືນສູ່ການເຄື່ອນໄຫວເປັນປົກກະຕິ. ເພື່ອສືບຕໍ່ເຮັດແຈ້ງສະພາບການ, ໄຈ້ແຍກບັນດາບັນຫາເພື່ອດັດແກ້ຖືກຕາມກົດໝາຍຢ່າງລະອຽດ ແລະ ບັນດາຄຳໝັ້ນສັນຍາສາກົນ, ຮັບປະກັນຄວາມເປັນລະບຽບຮຽບຮ້ອຍ ແລະ ຟື້ນຟູຄວາມໄວ້ເນື້ອເຊື່ອໃຈຂອງບັນດານັກລົງທຶນຕ່າງປະເທດ, ທ່ານນາຍົກລັດຖະມົນຕີຮຽກຮ້ອງໃຫ້ລັດຖະມົນຕີ, ຫົວໜ້າບັນດາອົງການຂຶ້ນກັບລັດຖະບານ, ປະທານຄະນະກຳມະການປະຊາຊົນບັນດາແຂວງ, ນະຄອນຂຶ້ນກັບສູນກາງ ເພີ່ມທະວີການຊີ້ນຳ, ກວດກາ, ຊຸກຍູ້, ຮັບປະກັນການຈັດຕັ້ງປະຕິບັດການຮັບປະກັນຄວາມເປັນລະບຽບຮຽບຮ້ອຍ, ຊ່ວຍເຫຼືອບັນດາວິສາຫະກິດແກ້ໄຂຄວາມເສຍຫາຍ ເພື່ອກັບຄືນສູ່ການຜະລິດ, ດຳເນີນທຸລະກິດເປັນປົກກະຕິ.
ທ່ານນາຍົກລັດຖະມົນຕີ ຮຽກຮ້ອງໃຫ້ກະຊວງຕຳຫຼວດ ສືບຕໍ່ສົມທົບວຽກງານໜູນຊ່ວຍບັນດາທ້ອງຖິ່ນກ່ຽວກັບວຽກງານຮັບປະກັນຄວາມເປັນລະບຽບຮຽບຮ້ອຍຢູ່ບໍລິເວັນແຂວງ, ໂດຍສະເພາະແມ່ນຢູ່ບັນດາເຂດເສດຖະກິດ ແລະ ເຂດອຸດສາຫະກຳ; ຊອກຫາ ແລະສົ່ງຄືນບັນດາເຄື່ອງອຸປະກອນຖືກລັກເອົາໂດຍໄວ; ເພີ່ມທະວີວຽກງານຕິດຕາມກວດກາ ກຳແໜ້ນສະພາບການ, ຄົ້ນພົບ, ສະກັດກັ້ນຢ່າງທັນການ ບໍ່ປະໃຫ້ເກີດບັນດາເຫດການຄ້າຍຄືກັນອີກ.