(ພາບປະກອບ)
(vovworld) – ມາດຕະການເພື່ອສ້າງໂຄງປະກອບພື້ນຖານກະສິກຳ ຫວຽດນາມ ຄືນໃໝ່ຢ່າງວ່ອງໄວ, ດັດປັບມາດຖານກໍ່ສ້າງຊົນນະບົດໃໝ່ ແມ່ນບັນດາບັນຫາເຊິ່ງສະມາຊິກສະພາແຫ່ງຊາດໄດ້ໄຈ້ແຍກ, ປຶກສາຫາລືຢ່າງລະອຽດຢູ່ວາລະປຶກສາຫາລືໃນວັນທີ 04/11 ກ່ຽວກັບໝາກຜົນແຫ່ງການຕິດຕາມກວດກາ “ການປະຕິບັດໂຄງການຈຸດໝາຍແຫ່ງຊາດ ກໍ່ສ້າງຊົນນະບົດໃໝ່ໄລຍະ 1 ຕິດພັນກັບການສ້າງໂຄງປະກອບຂະແໜງກະສິກຳຄືນໃໝ່.”
ທ່ານ ຫງວຽນຕ໋ວາແອງ, ສສຊ ແຂວງ ບີງເຟື໋ອກ ຍົກອອກບັນຫາຕົ້ນຕໍທີ່ມີຄວາມສຳຄັນແຖວໜ້າໃນພາລະກິດສ້າງໂຄງປະກອບຄືນໃໝ່ ແລະ ປ່ຽນໃໝ່ຮູບແບບການເຕີບໂຕໃນໄລຍະໃໝ່. ທ່ານເນັ້ນໜັກເຖິງສິ່ງທ້າທາຍອັນໃຫຍ່ຫລວງ ເມື່ອບັນດາທ້ອງຖິ່ນຍັງປະສົບກັບຄວາມທຸກຍາກ ແມ່ນຈະຕ້ອງອີງໃສ່ແຫຼ່ງການເງິນໃດ ແລະ ກຳລັງໃດ ທີ່ມີກຳລັງແຮງຢ່າງພຽງພໍ ເພື່ອຫັນປ່ຽນໂຄງປະກອບພື້ນຖານເສດຖະກິດໂດຍໄວ. ທ່ານ ຫງວຽນຕ໋ວນແອງ ສະເໜີວ່າ
“ລັດຖະບານຄວນໜູນຊ່ວຍທ້ອງຖີ່ນຕ່າງໆ, ພິເສດແມ່ນບັນດາທ້ອງຖີ່ນບໍ່ທັນພັດທະນາ, ແລະປະສົບກັບຄວາມຫຍຸ້ງຍາກໃນການສ້າງແຜນຮ່າງສ້າງໂຄງປະກອບຄືນໃໝ່ໃຫ້ເໝາະສົມກັບສະພາບຕົວຈິງຂອງທ້ອງຖີ່ນ. ພ້ອມກັນນັ້ນ, ທ້ອງຖີ່ນຕ່າງໆຄວນມີການສົມທົບກັນກັບບັນດານັກຊ່ຽວຊານ ໃນລະດັບສູງສຸດ ເພື່ອເປັນເຈົ້າການໃນການກໍ່ສ້າງແຜນຮ່າງສ້າງໂຄງປະກອບຄືນໃໝ່. ການສົມທົບນີ້ຈະຮັບປະກັນລັກສະນະສະເໝີຕົ້ນສະເໝີປາຍຂອງການສ້າງໂຄງປະກອບຂະແໜງກະສິກຳໃນການສ້າງໂຄງປະກອບພື້ນຖານເສດຖະກິດທົ່ວປະເທດ, ຊ່ວຍໃຫ້ແຜນຮ່າງສ້າງໂຄງປະກອບຂະແໜງກະສິກຳມີຄວາມເໝາະສົມກັ ບເງື່ອນໄຂ, ຈຸດພິເສດຂອງທ້ອງຖີ່ນ, ເສີມຂະຫຍາຍທ່າສະດວກ ແລະ ຂໍ້ລິເລີ່ມຂອງທ້ອງຖີ່ນ”.
ເອົາໃຈໃສ່ເຖິງການປະຕິບັດປະມວນມາດຖານກ່ຽວກັບຊົນນະບົດໃໝ່, ທ່ານ ລ້າຍຊວນໂມນ, ສະມາຊິກສະພາແຫ່ງຊາດແຂວງ ບາກລຽວ ສະເໜີ
“ລັດຖະບານຄວນສຸມໃສ່ກວດກາຄືນບັນດາຄາດໝາຍກໍ່ສ້າງຊົນນະບົດໃໝ່ໃຫ້ເໝາະສົມ, ສາມາດເປັນໄປໄດ້. ຕາມນັ້ນແລ້ວ, ຄວນແບ່ງເປັນສອງມາດຖານ: ແຂງ ແລະ ອ່ອນ. ສຳລັບມາດຖານແຂງ, ແມ່ນເປັນເອກະພາບໃນທົ່ວປະເທດເພື່ອໃຫ້ທ້ອງຖີ່ນຕ່າງໆປະຕິບັດ. ສ່ວນມາດຖານອ່ອນແມ່ນຈຳເປັນຕ້ອງສ້າງໂດຍອີງຕາມການປັບປຸງ, ເສີມຂະຫຍາຍລັກສະນະເປັນເຈົ້າການ, ແລະ ອີງໃສ່ຕາມເງື່ອນໄຂຂອງແຕ່ລະທ້ອງຖີ່ນ“.
ອະພິປາຍຕໍ່ສະພາແຫ່ງຊາດ ກ່ຽວກັບບັນດາບັນຫາເຊິ່ງ ສະມາຊິກສະພາແຫ່ງຊາດເອົາໃຈໃສ່, ທ່ານ ຫງວຽນຊວນເກື່ອງ, ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ, ໃຫ້ຮູ້ວ່າ:
“ເພື່ອກໍ່ສ້າງຊົນນະບົດໃໝ່ຕິດພັນກັບການສ້າງໂຄງປະກອບກະສິກຳຕ້ອງຕິດພັນກັບການສ້າງໂຄງປະກອບເສດຖະກິດຢ່າງແໜ້ນແຟ້ນ. ນີ້ກໍ່ແມ່ນເນື້ອໃນຕົ້ນຕໍຂອງການຫັນກະສິກຳເປັນອຸດສາຫະກຳ , ດັ່ງນັ້ນຕ້ອງສຸມທຸກກຳລັງເພື່ອໜູນຊ່ວຍຂົງເຂດນີ້. ກໍ່ສ້າງຊົນນະບົດໃໝ່ຕິດພັນກັບການສ້າງໂຄງປະກອບກະສິກຳ ແມ່ນລາຍການຕ້ອງປະຕິບັດຢ່າງລຽນຕິດ, ແກ່ຍາວ, ດັ່ງນັ້ນຕ້ອງມີມາດຕະການຢ່າງເໝາະສົມກັບແຕ່ລະໄລຍະ. ຮອດເວລາແລ້ວທີ່ຕ້ອງຮັບຮູ້ກະສິກຳຊົນນະບົດແມ່ນພາກສ່ວນທີ່ມີຄວາມສາມາດບົ່ມຊ້ອນ, ດັ່ງນັ້ນສະເໜີຕ້ອງມີການລົງທຶນຢ່າງເໝາະສົມໃຫ້ຂົງເຂດນີ້“.
ທ່ານ ຫງວຽນຊວນເກື່ອງ ກໍ່ໃຫ້ຮູ້ວ່າ, ເຖິງວ່າແຫຼ່ງເງິນທີ່ລົງທຶນໃຫ້ໄລຍະກາງຍັງປະສົບກັບຄວາມຫຍຸ້ງຍາກກໍ່ຕາມ, ແຕ່ລັດຖະບານ ຫວຽດນາມ ຍັງຄົງຕັດສິນຮັກສາລະດັບລົງທຶນໃຫ້ໂຄງການກໍ່ສ້າງຊົນນະບົດໃໝ່ໄວ້ຄືເກົ່າ.