(vovworld) - ດັດຊະນີ PAPI ສືບຕໍ່ສ້າງບັນດາການກະທົບຫຼາຍພໍສົມຄວນຢູ່ຂັ້ນແຂວງແລະລະດັບຊາດ. ນີ້ແມ່ນຄຳຢືນຢັນຂອງທ່ານນາງປະລິຍາເອກ Pratibha Mahta, ຜູ້ປະສານງານຢູ່ສະຫະປະຊາຊາດ ແລະ ຜູ້ຕາງໜ້າຂອງ UNDP ປະຈຳຫວຽດນາມ, ໃນການປະຊຸມຂ່າວປະກາດດັດຊະນີປະສິດທິຜົນການຄຸ້ມຄອງ ແລະ ບໍລິຫານພາກລັດຂັ້ນແຂວງ (PAPI) 2015 ເຊິ່ງດຳເນີນໃນຕອນເຊົ້າວັນທີ 12/04 ຢູ່ຮ່າໂນ້ຍ. ທ່ານນາງ Pratibha Mahta ເນັ້ນໜັກວ່າ, ກ່ອນທີ່ດຳເນີນການເລືອກຕັ້ງສະພາແຫ່ງຊາດ ແລະ ສະພາປະຊາຊົນທົ່ວປະເທດ ເຊິ່ງຈະຈັດຕັ້ງໃນເດືອນ 05 ຈະມາເຖິງ, ບົດລາຍງານ PAPI ປີ 2015 ຈະສະໜອງແຫຼ່ງຂໍ້ມູນຂ່າວ ເພື່ອໃຫ້ກົງຈັກອຳນາດການປົກຄອງທຸກຂັ້ນ ສັງເກດກ່ຽວກັບປະສິດທິຜົນການປະຕິຮູບການຄຸ້ມຄອງ ແລະ ບໍລິຫານພາກລັດຂອງປະເທດ ໃນໄລຍະ 5 ປີຜ່ານມາ, ພ້ອມທັງກຳນົດມາດຕະຖານ, ຈຸດໝາຍໃນໄລຍະຈະມາເຖິງ.
“ຢູ່ລະດັບຊາດ, ມີຫຼາຍອົງການນຳສູນກາງໄດ້ໃຊ້ດັດຊະນີ PAPI ເພື່ອຊອກຮູ້ຄວາມມຸ່ງມາດປາດຖະໜາຂອງປະຊາຊົນ, ສົ່ງເສີມກົນໄກຮັບຜິດຊອບອະພິປາຍສັງຄົມ ແລະ ສືບຕໍ່ສະໜອງຂໍ້ມູນຂ່າວທີ່ມີຜົນປະໂຫຍດໃຫ້ບັນດາອົງການແຫ່ງລັດ, ລັດຖະບານ ແລະ ສະພາແຫ່ງຊາດ. ຄຽງຂ້າງນັ້ນ, ບົດລາຍງານ PAPI 2015 ກໍໄຈ້ແຍກຢ່າງລະອຽດປະສິດທິຜົນແຫ່ງການຄຸມຄອງ ແລະ ການບໍລິຫານພາກລັດຂັ້ນແຂວງ ໃນ 6 ເນື້ອໃນທີ່ຂຶ້ນກັບຂອບເຂດຄົ້ນຄວ້າ. ບັນດາຄວາມມານະພະຍາຍາມ ເພື່ອແນໃສ່ຕອບສະໜອງຄວາມມຸ່ງມາດປາດຖະໜາຂອງປະຊາຊົນ, ຂອງອຳນາດການປົກຄອງບັນດາແຂວງ ນາມດິ້ງ, ຮ່າຕີ້ງ, ກວາງຈິ້, ດ່ານັ້ງ ແລະ ລອງອານ ແມ່ນໜ້າຮັບຮູ້. 5 ແຂວງ, ນະຄອນນີ້ ຍາມໃດກໍ່ມີຊື່ໃນກຸ່ມແຂວງ, ນະຄອນບັນລຸຄະແນນສູງສຸດໃນຕະຫຼອດໄລຍະ 5 ປີຜ່ານມາ”.
ປະຈຸບັນ, ຢ່າງໜ້ອຍສຸດມີ 2/3 ຈຳນວນ 63 ແຂວງ/ນະຄອນໃນທົ່ວປະເທດ ພວມນຳໃຊ້ດັດຊະນີ PAPI ເພື່ອເປັນເຄື່ອງມືແນໃສ່ຕິດຕາມ ແລະ ຕິດຕາມກວດກາປະສິດທິຜົນການຄຸ້ມຄອງ ແລະ ບໍລິຫານຂອງລັດຢູ່ທ້ອງຖິ່ນ.
ຢືນຢັນກ່ຽວກັບການໜູນຊ່ວຍຫວຽດນາມ, ທ່ານນາງ Beatrice Maser Mallor, ເອກອັກຄະລັດຖະທູດສະວິດ ປະຈຳຫວຽດນາມ ຖືວ່າ.
“ປີ 2016 ໄດ້ເປັນຂີດໝາຍໄລຍະ 30 ປີແຫ່ງການປ່ຽນແປງໃໝ່ຂອງຫວຽດນາມ, ເຊິ່ງແມ່ນວິວັດແຫ່ງການປະຕິຮູບທີ່ໄດ້ນຳຫວຽດນາມ ກາຍເປັນປະເທດໄດ້ຮັບຜົນສຳເລັດກ່ຽວກັບການພັດທະນາ. ໜູນຊ່ວຍການປະຕິຮູບພື້ນຖານຄຸ້ມຄອງ ແລະ ບໍລິຫານຂອງລັດຍາມໃດກໍ່ແມ່ນບຸລິມະສິດໃນການເຄື່ອນໄຫວຮ່ວມມືລະຫວ່າງສະວິດ ແລະ ຫວຽດນາມຕະຫຼອດໄລຍະ 20 ປີຜ່ານມາ. ຂ້າພະເຈົ້າເຊື່ອໝັ້ນວ່າ, ຂໍ້ລິເລີມນີ້ໄດ້ ແລະ ພວມປະກອບສ່ວນປ່ຽນໃໝ່ພື້ຶ້ນຖານການຄຸ້ມຄອງຢູ່ຫວຽດນາມ, ຍ້ອນປະຕິບັດການຄຸ້ມຄອງເປັນຢ່າງດີ ຈະແມ່ນພື້ນຖານເພື່ອພັດທະນາກວ່າອີກ, ມຸ່ງໄປເຖິງຄວາມວັດທະນາຖາວອນ, ມີຫົວຄິດປະດິດສ້າງ, ທີຄວາມຍຸຕິທຳ ແລະ ປະຊາທິປະໄຕ.”