(vovworld) - ຕອນເຊົ້າວັນທີ່ 13/6, ພາຍໃຕ້ການເປັນປະທານຂອງທ່ານ Nguyen Sinh Hung ປະທານສະພາແຫ່ງຊາດ ຫວຽດນາມ, ສະພາແຫ່ງຊາດດຳເນີນວາລະຊັກຖາມຂອງບັນດາສະມາຊິກສະພາແຫ່ງຊາດ (ສສຊ) ຕໍ່ບັນດາສະມາຊິກລັດຖະບານກ່ຽວກັບບາງບັນຫາຊຶ່ງຜູ້ມີສິດເລືອກຕັ້ງ ພວມສົນໃຈ. ສະມາຊິກລັດຖະບານ 5 ທ່ານ ເຂົ້າຮ່ວມການຕອບຄຳຊັກຖາມ ນັ້ນແມ່ນ: ທ່ານ Nguyen Xuan Phuc ຮອງນາຍົກລັດຖະມົນຕີ ແລະ ລັດຖະມົນຕີ 4 ທ່ານ. ວັນທີ່ 13/6, ທ່ານລັດຖະມົນຕີກະຊວງແຜນການ ແລະ ລົງທຶນ Bui Quang Vinh ແລະ ທ່ານລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ Nguyen Minh Quang ໄດ້ຕອບຄຳຊັກຖາມຂອງ ສສຊ.
ແຜນຮ່າງສັງລວມສ້າງໂຄງປະກອບເສດຖະກິດຄືນໃໝ່ ແມ່ນໜຶ່ງໃນບັນດາບັນຫາທີ່ໄດ້ຮັບຄວາມສົນໃຈຈາກ ສສຊ ເມື່ອຊັກຖາມທ່ານລັດຖະມົນຕີກະຊວງແຜນການ ແລະ ລົງທຶນ Bui Quang Vinh. ກ່ຽວກັບບັນຫານີ້, ທ່ານລັດຖະມົນຕີ Bui Quang Vinh ໃຫ້ຮູ້ວ່າ.
ທ່ານລັດຖະມົນຕີກະຊວງແຜນການ ແລະ ລົງທຶນ Bui Quang Vinh
( ພາບ: thanhnien.com.vn )
“ນີ້ແມ່ນແຜນຮ່າງສັງລວມ. ພາຍຫຼັງສະພາແຫ່ງຊາດໃຫ້ຄຳເຫັນ, ລັດຖະບານຈະມອບໃຫ້ບັນດາກະຊວງ, ຂະແໜງການ ແລະ ທ້ອງຖິ່ນຕ່າງໆສ້າງບັນດາແຜນຮ່າງ ພາກສ່ວນ. ກອນອື່ນໝົດ, ລັດຖະບານໄດ້ສ້າງບັນດາແຜນຮ່າງພາກສ່ວນແມ່ນ ແຜນຮ່າງສ້າງໂຄງປະກອບການລົງທຶນ, ແຜນຮ່າງສ້າງໂຄງປະກອບຕະຫຼາດການເງິນ, ຫຼັກຊັບ, ແຜນຮ່າງສ້າງໂຄງປະກອບລັດວິສາຫະກິດຄືນໃໝ່. ພວກເຮົາຄວນເລືອກເຟັ້ນບັນດາບັນຫາຈຸດສຸມ ເຖິງວ່າທຸກຂົງເຂດລ້ວນແຕ່ຈຳເປັນໄດ້ຮັບການຜັນຂະຫຍາຍ”.
ສຳລັບການປ້ອງກັນຕ້ານສໍ້ລາດບັງຫຼວງໃນການລົງທຶນຂອງລັດ, ການຄຸ້ມຄອງ, ນຳໃຊ້ແຫຼ່ງທຶນ ODA, FDI, ທ່ານລັດຖະມົນຕີ Bui Quang Vinh ຢັ້ງຢືນວ່າ, ທາງກະຊວງຈະສົມທົບກັນບັນດາກະຊວງ, ຂະແໜງການກ່ຽວຂ້ອງໃນການຄຸ້ມຄອງແຫຼ່ງທຶນນີ້ຢ່າງແໜ້ນແຟ້ນ ແລະ ມີປະສິດທິຜົນກວ່າອີກ; ພ້ອມທັງຕັ້ງໜ້າຕໍ່ສູ້ປ້ອງກັນ ແລະ ຕ້ານສໍ້ລາດບັງຫຼວງ, ປະຕິບັດວິໄນບັນດາການກະທຳລະເມີດຢ່າງເຂັ້ມງວດ. ກ່ຽວກັບການປະຕິບັດບັນດາຈຸດໝາຍເສດຖະກິດ - ສັງຄົມປີ 2012 ໃຫ້ສຳເລັດ, ທ່ານລັດຖະມົນຕີ Bui Quang Vinh ໃຫ້ຮູ້ບຸລິມະສິດໃນຕໍ່ໜ້າແມ່ນຄວບຄຸມໄພເງິນເຟີ້, ຮັບປະກັນຊີວິດສັງຄົມ ແລະ ຮັກສາລະດັບເຕີບໂຕ GDP ຢ່າງເໝາະສົມ.
ທ່ານ Nguyen Minh Quang ລັດຖະມົນຕີ
ກະຊວງຊັບພະຍາກອນ ແລະ ສິ່ງແວດລ້ອມ
ພາບ: baomoi.com
|
ສ່ວນບັນດາຄຳຖານສຳລັບທ່ານ Nguyen Minh Quang ລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ແມ່ນກ່ຽວຂ້ອງເຖິງການຄຸ້ມຄອງທີ່ດິນ, ການປົກປັກຮັກສາສິ່ງແວດລ້ອມ, ຖອນທີ່ດິນຄືນ, ການຊົດເຊີຍເມື່ອບຸກເບີກຫນ້າພຽງ, ການປົກປັກຮັກສາປ່າ, ແກ້ໄຂມົນລະພິດເຖິງສິ່ງແວດລ້ອມຢູ່ບັນດາໝູ່ບ້ານຫັດຖະກຳ. ກ່ຽວກັບບັນຫາໃບສະເຫນີ, ຮ້ອງທຸກ, ກ່າວຟ້ອງ ກ່ຽວກັບທີ່ດິນ, ທ່ານລັດຖະມົນຕີ Nguyen Minh Quang ຖືວ່າ: ນີ້ແມ່ນບັນຫາສັບສົນທີ່ສຸດ ພວມໄດ້ຮັບຄວາມສົນໃຈເປັນພິເສດ ຈາກຫາງສຽງຊຶ່ງສາຍເຫດຕົ້ນຕໍແມ່ນຄວາມຂັດແຍ້ງກັນລະຫວ່າງຜົນປະໂຫຍດຂອງລັດ, ຜົນປະໂຫຍດຂອງເຈົ້າຂອງລົງທຶນ ແລະ ຜົນປະໂຫຍດຂອງຜູ້ຖືກຖອນທີ່ດິນຄືນຫລືການຊົດເຊີຍ. ທ່ານ Nguyen Minh Quang ລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ໃຫ້ຮູ້ວ່າ: ກະຊວງຊັບພະຍາກອນ ແລະ ສິ່ງແວດລ້ອມ ໄດ້ເສນາທິການໃຫ້ແກ່ລັດຖະບານ ແລະ ລັດຖະບານປະກາດໃຊ້ດຳລັດເລກທີ 69 ເພື່ອແກ້ໄຂບັນຫາດັ່ງກ່າວແລ້ວ. ທ່ານກ່າວວ່າ:
“ພາຍຫລັງມີດຳລັດເລກທີ 69 ວຽກງານຊົດເຊີຍ, ບຸກເບີກຫນ້າພຽງມີບາດກ້າວດີພໍສົມຄວນແລ້ວ. ຂ້າພະເຈົ້າຖືວ່າ: ຜົນໄດ້ຮັບນັ້ນແມ່ນ ບັນຫາທີ່ປະຊາຊົນພວມສົນໃຈໃນປະຈຸບັນໄດ້ຮັບການແກ້ໄຂໂດຍພື້ນຖານ, ໃນນັ້ນມີຄ່າທີ່ດິນ, ການຊົດເຊີຍ ແລະ ຫນູນຊ່ວຍ. ສິດຜົນປະໂຫຍດຂອງຜູ້ຖືກຖອນທີ່ດິນຄືນນັ້ນ ເມື່ອທຽບກັບກ່ອນນີ້ແມ່ນໄດ້ຮັບການແກ້ໄຂດີກວ່າແລ້ວ, ປະຊາຊົນກໍສະຫນັບສະຫນູນກວ່າ. ບັນດາທ້ອງຖິ່ນໄດ້ພະຍາຍາມໃນການສຸມໃສ່ແກ້ໄຂໃບຮ້ອງທຸກ ກ່າວຟ້ອງ ຕາມການກຳນົດຂອງກົດໝາຍ. ”
ກ່ຽວຂ້ອງເຖິງສະພາບມົນລະພິດສິ່ງແວດລ້ອມຢູ່ບັນດາລ່ອງແມ່ນ້ຳ,ບັນດາໝູ່ບ້ານຫັດຖະກຳ, ໄພທຳລາຍປ່າ, ທ່ານ ລັດຖະມົນຕີ Nguyen Minh Quang ຍອມຮັບວ່າ ສະພາບການນີ້ຍັງຄົງເກີດຂຶ້ນຢູ່ຫລາຍທ້ອງຖິ່ນ ກາຍເປັນບັນຫາເຮັ່ງຮ້ອນໃນຫາງສຽງ ສັງຄົມ. ເພື່ອແກ້ໄຂບັນຫານີ້ຢ່າງເດັດຂາດ, ຕາມ ທ່ານ ລັດຖະມົນຕີ Nguyen Minh Quang ແລ້ວ ຄວນມີການເຂົ້າຮ່ວມປະຕິບັດຢ່າງຂ້ຽວຂາດລະຫວ່າງກະຊວງ ແລະ ບັນດາທ້ອງຖິ່ນ.