ຕິດຕາມກວດກາຍົກສູງກຳລັງແກ່ງແຍ້ງໃນຂົງເຂດອາກອນ ແລະ ພາສີ
(ພາບປະກອບ: chinhphu.vn)
(vovworld) – ຕອນບ່າຍວັນທີ 07/04, ຢູ່ຮ່າໂນ້ຍ, ໄດ້ດຳເນີນພິທີລົງນາມໂຄງການຕິດຕາມກວດກາການປະຕິບັດໜ້າທີ່, ມາດຕະການແກ້ໄຂເພື່ອແນໃສ່ປັບປຸງສະພາບແວດລ້ອມແຫ່ງດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດໃນຂົງເຂດອາກອນ ແລະ ພາສີ. ໂຄງການຕິດຕາມກວດກາ ໄດ້ຮັບການປະຕິບັດລະຫວ່າງຄະນະກຳມະການສູນກາງແນວໂຮມປະເທດຊາດຫວຽດນາມ; ກະຊວງການເງິນ; ຫ້ອງການການຄ້າ ແລະ ອຸດສາຫະກຳຫວຽດນາມ; ຮ່ວມສຳພັນສະຫະກອນຫວຽດນາມ; ສະມາຄົມວິສາຫະກິດຂະໜາດນ້ອຍ ແລະ ຂະໜາດກາງຫວຽດນາມ ແລະ ສະມາຄົມນັກທຸລະກິດໜຸ່ມຫວຽດນາມ. ຈຸດປະສົງຂອງພິທີລົງນາມ ແມ່ນເພື່ອແນໃສ່ຮັບເອົາຄຳເຫັນ, ການຕີລາຄາຂອງວິສາຫະກິດກ່ຽວກັບໝາກຜົນການປະຕິຮູບລະບຽບການບໍລິຫານອາກອນ - ພາສີ; ຄົ້ນພົບ; ສະເໜີບັນດາລະບຽບການບໍລິຫານຕ້ອງໄດ້ຮັບການຄົ້ນຄວ້າ ແລະ ໃຫ້ບຸລິມະສິດແກ່ການປະຕິຮູບໃນໄລຍະຕໍ່ໄປ. ພ້ອມທັງສະເໜີມາດຕະການແກ້ໄຂເພື່ອປະກອບສ່ວນປັບປຸງສະພາບແວດລ້ອມແຫ່ງດຳເນີນທຸລະກິດ, ຫຼຸດຜ່ອນວິວັດການແກ້ໄຂ, ຫຼຸດຜ່ອນເວລາປະຕິບັດລະບຽບການບໍລິຫານ, ຮັບປະກັນລັກສະນະກະຈ່າງແຈ້ງ ແລະ ຍົກສູງໜ້າທີ່ຮັບຜິດຊອບຂອງບັນດາອົງການບໍລິຫານຂອງລັດ. ຕາມເນື້ອໃນທີ່ໄດ້ຮັບການລົງນາມ, ບັນດາຝ່າຍຈະເພີ່ມທະວີວຽກງານໂຄສະນາ, ຍົກສູງຄວາມຮູ້, ຄວາມຮັບຜິດຊອບຂອງບັນດາວິສາຫະກິດໃນການປະຕິບັດກົດໝາຍກ່ຽວກັບອາກອນ ແລະ ພາສີ; ຕິດຕາມກວດກາການປະຕິຮູບລະບຽບການບໍລິຫານທີ່ກ່ຽວຂ້ອງເຖິງການຫຼຸດຜ່ອນ, ປັບປຸງເພີ່ມເຕີມ, ປ່ຽນໃໝ່ບັນດາລະບຽບການທີ່ບໍ່ຈຳເປັນ, ແຈ້ງພາສີສິ້ນຄ້າສົ່ງອອກ - ນຳເຂົ້າ.