ຕ້ອງນຳໃຊ້ມາດຕະການດ້ານນິຕິກຳ ແລະ ກົດໝາຍສາກົນເພື່ອແກ້ໄຂຄວາມບໍ່ລົງລອຍກັນບົນທະເລຕາເວັນອອກ
(ພາບປະກອບ)
(vovworld) – ໂດຍບໍ່ຫົວຊາຕໍ່ຫາງສຽງສາກົນ, ຈີນ ໄດ້ມີການກະທຳເຮັດໃຫ້ສະພາບຢູ່ເຂດທະເລຕາເວັນອອກເຄັ່ງຕຶງເພີ່ມຂຶ້ນ. ສື່ສານສາກົນສືບຕໍ່ເຕື້ອງເຖິງວຽກງານຕ່າງໆເຊິ່ງບັນດາປະເທດໃນພາກພື້ນ ແລະ ສາກົນຄວນເຮັດ, ເພື່ອແນໃສ່ສະກັດກັ້ນ “ຍຸດທະສາດຂະຫຍາຍອານາເຂດ” ຂອງຈີນ. ວັນທີ 30/06, ໜັງສືພິມ ຜົນປະໂຫຍດແຫ່ງຊາດຂອງອາເມລິກາ (The National Interest) ໄດ້ລົງພິມບົດຂຽນຂອງນັກຂ່າວ Harry J.Kazianis ຊີ້ແຈ້ງວ່າ ຈີນພວມປະຕິບັດກົນອຸບາຍປັບປຸງຍຸດທະສາດຢູ່ທະເລຕາເວັນອອກ, ດ້ວຍບັນດາວິທີໃໝ່ເພື່ອປັບປຸງທີ່ຕັ້ງຂອງຕົນຄື ຕັ້ງຮ້ານເຈາະນ້ຳມັນຢູ່ເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ, ຈຳໜ່າຍແຜນທີ່ໃໝ່, ລວບລວມເອົາບັນດາເຂດທະເລ, ໝູ່ເກາະຢູ່ທະເລຕາເວັນອອກເກືອບທັງໝົດເຂົ້າອັນທີ່ເອີ້ນວ່າ “ອະທິປະໄຕ” ຂອງປັກກິງ. ຕາມນັກຂ່າວ Kazianis ແລ້ວ, ເປັນທີ່ຈະແຈ້ງແລ້ວວ່າ, ນີ້ແມ່ນວິທີເພື່ອໃຫ້ຈີນ ປ່ຽນແປງສະພາບຕົວຈິງຢູ່ເຂດດິນຕໍ່ແຜ່ນ ແລະ ເຂດທະເລ, ເພື່ອເຮັດໃຫ້ຫາງສຽງສາກົນມີຄວາມຮັບຮູ້ຕາມທັດສະນະສະເພາະຂອງປະເທດນີ້. ນັກຂ່າວ Kazianis ກໍ່ໃຫ້ຮູ້ວ່າ ບັນດາການກະທຳຂອງຈີນ ໃນໄລຍະຜ່ານມາ ແມ່ນສິ່ງທ້າທ້າຍສຳລັບອາຊຽນຢ່າງຈະແຈ້ງ. ເລື່ອງຈີນຖະແຫຼງອະທິປະໄຕຢູ່ທະເລຕາເວັນອອກເຖິງ 90% ແມ່ນໄພຂົ່ມຂູ່ໂດຍກົງເຖິງບັນດາປະເທດທີ່ໄດ້ຮັບຜົນປະໂຫຍດຈາກເຂດທະເລລວມນີ້. ຖ້າຫາກບໍ່ມີບັນດາມາດຕະການເພື່ອສະກັດກັ້ນ, ສິ່ງດັ່ງກ່າວຈະສ້າງຄວາມຊິນເຄີຍທີ່ອັນຕະລາຍ. ນັກຂ່າວ Kazianis ຖືວ່າ ອາຊຽນ ຕ້ອງຄັດຄ້ານການກະທຳຂອງຈີນ ດ້ວຍທຸກວິທີ. ບັນດາປະເທດສາມາດນຳໃຊ້ມາດຕະການດ້ານນິຕິກຳ ແລະ ກົດໝາຍສາກົນ, ຄືເລື່ອງ ຟີລິບປິນ ຮ້ອງຟ້ອງຈີນ ຕໍ່ສານສາກົນ ເພື່ອແກ້ໄຂບັນດາຄວາມບໍ່ລົງລອຍກັນໃນປະຈຸບັນ. ສາກົນກໍ່ຕ້ອງມີບາດກ້າວເພື່ອກີດຂວາງການກະທຳນີ້ຂອງຈີນ ຍ້ອນບໍ່ມີໃຜແນ່ນອນໄດ້ວ່າ ຈີນ ຈະບໍ່ສືບຕໍ່ປະຕິບັດຍຸດທະສາດຂະຫຍາຍອານາເຂດຂອງຕົນຢູ່ພາກພື້ນອື່ນໆ ແລະ ບັນດາປະເທດໃນໂລກກໍ່ສາມາດນຳໃຊ້ວິທີຄືດັ່ງກ່າວເພື່ອຜົນປະໂຫຍດແຫ່ງຊາດຂອງປະເທດຕົນ.
ວັນທີ 30/06, ໜັງສື່ພິມເອເລກໂຕນິກ ໂລກດຳເນີນທຸລະກິດ (Bussiness world) ຂອງຟີລິບປິນ ໄດ້ລົງພິມຖະແຫຼງການຂອງກະຊວງການຕ່າງປະເທດຟິລິບປິນ, ໂດຍຫວນຄືນຫຼັກໝັ້ນຄັດຄ້ານຈີນ ປະກາດແຜນທີ່ໃໝ່, ຖືວ່າ ແຜນທີ່ດັ່ງກ່າວສະແດງໃຫ້ເຫັນຄຳຖະແຫຼງທີ່ໄຮ້ເຫດຜົນຂອງຈີນ ແລະ ໄປຝືນກັບກົດໝາຍາສາກົນ. ກ່ອນໜ້ານັ້ນ, ກະຊວງການຕ່າງປະເທດອີນເດຍ ກໍ່ຢືນຢັນວ່າ ແຜນທີ່ໃໝ່ຂອງຈີນ ຈະບໍ່ສາມາດປ່ຽນແປງສະພາບຕົວຈິງໃນປະຈຸບັນໄດ້.