ພາບປະກອບ
|
(vovworld) – ຕ້ອງມີຄວາມຕັດສິນໃຈດ້ານການເມືອງເພື່ອນຳປະເທດຊາດພັດທະນາໃນໄລຍະໃໝ່ - ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຢັ້ງຢືນສິ່ງດັ່ງກ່າວເມື່ອສະຫລຸບ 1,5 ວັນຈັດກອງປະຊຸມໂດຍກົງຜ່ານເຄືອຂ່າຍ ອີນເຕີເນັດ ຂອງລັດຖະບານກັບການນຳຂອງ 63 ແຂວງ, ນະຄອນໃນວັນທີ 29/12. ນີ້ແມ່ນສານຂອງທ່ານນາຍົກລັດຖະມົນຕີ ທີ່ຢາກສົ່ງເຖິງການນຳທຸກຂັ້ນ, ບັນດາຂະແໜງການ ແລະ ທ້ອງຖິ່ນເພື່ອປະຕິບັດບັນດາຈຸດໝາຍພັດທະນາເສດຖະກິດ, ສັງຄົມປີ 2017. ທ່ານນາຍົກລັດຖະມົນຕີ ຊີ້ແຈ້ງວ່າ:
“ຂ້າພະເຈົ້າສະເໜີຕ້ອງເອົາໃຈໃສ່, ສຸມໃສ່ຊີ້ນຳການບໍລິຫານໃນປີ 2017 ແມ່ນຮັກສາສະຖຽນລະພາບດ້ານເສດຖະກິດມະຫາພາກ, ບັນລຸລະດັບເຕີບໂຕສູງກ່ວາປີ 2016, ຕິດພັນກັບການສ້າງໂຄງປະກອບເສດຖະກິດຄືນໃໝ່, ປ່ຽນໃໝ່ຮູບແບບການເຕີບໂຕ, ຍົກສູງສະມັດຕະພາບ, ຄຸນນະພາບ, ປະສິດທິຜົນ, ກຳລັງແກ່ງແຍ້ງ.ຖ້າຫາກບໍ່ສ້າງໂຄງປະກອບຢ່າງເດັດຂາດ, ບໍ່ຍົກສູງສະມັດຕະພາບ, ຄຸນນະພາບ ແລະ ກຳລັງແກ່ງແຍ້ງ, ພວກເຮົາຈະຖືກຖອຍຫຼັງ, ຈະບໍ່ສາມາດແກ້ໄຂບັນດາສິ່ງທ້າທາຍດ້ານເສດຖະກິດ - ສັງຄົມ, ສິ່ງແວດລ້ອມ, ການປ້ອງກັນຊາດປ້ອງກັນຄວາມສະຫງົບ, ການພົວພັນຕ່າງປະເທດ, ບໍ່ຮັດແຄບຊ່ອງຫວ່າງການພັດທະນາກັບບັນດາປະເທດ ແລະ ກໍ່ບໍ່ຫລຸດພົ້ນອອກຈາກລະດັບລາຍຮັບສະເລ່ຍປານກາງໄດ້”
ທ່ານນາຍົກລັດຖະມົນຕີ ໄດ້ຍົກອອກ 30 ໜ້າທີ່ລະອຽດສຳລັບບັນດາກະຊວງ, ຂະແໜງການ, ທ້ອງຖິ່ນເພື່ອຜັນຂະຫຍາຍການປະຕິບັດ, ໃນນັ້ນຕົ້ນຕໍແມ່ນບັນດາໜ້າທີ່ພັດທະນາເສດຖະກິດ.
ທ່ານນາຍົກລັດຖະມົນຕີ ເນັ້ນໜັກວ່າ ໃນວິວັດແຫ່ງການບໍລິຫານເສດຖະກິດໃນປີ 2017, ສິ່ງສຳຄັນແມ່ນຕ້ອງປັບປຸງຄວາມໄວ້ເນື້ອເຊື່ອໃຈຕໍ່ເງິນດົ່ງ ຫວຽດນາມ, ຮັບປະກັນກຳລັງຊື້ຂອງເງິນດົ່ງ ຫວຽດນາມ ໃນໄລຍະກາງ ແລະ ໄລຍະຍາວ, ສຸມໃສ່ປັບປຸບສະພາບແວດລ້ອມແຫ່ງການລົງທຶນ, ສູ້ຊົນຍົກລະດັບໃນເວທີສາກົນກ່ຽວກັບສະພາບແວດລ້ອມແຫ່ງການດຳເນີນທຸລະກິດ.