(vovworld) - ທີ່ງານພົບປະບັນດາປັນຍາຊົນ, ນັກວິທະຍາສາດ, ນັກສິນລະປິນເມື່ອຕອນເຊົ້າວັນທີ 12/2, ຕາງໜ້າການນຳພັກ, ລັດ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ໄດ້ເນັ້ນໜັກວ່າ:
“ພັກກອມມູນິດຫວຽດນາມຢືນຢັນວ່າ, ຄວາມຮູ້ຍາມໃດກໍ່ເປັນພື້ນຖານແຫ່ງຄວາມກ້າວໜ້າທາງສັງຄົມ. ຖັນແຖວປັນຍາຊົນແມ່ນກຳລັງຫຼັກແຫຼ່ງເພື່ອປະດິດສ້າງ ແລະ ໂຄສະນາເຜີຍແຜ່ຄວາມຮູ້ນີ້ໃນຊີວິດ. ໃນສະໄໝໃດກໍ່ເຊັ່ນກັນ. ໃນປີຜ່ານມາ ກໍ່ຄືໃນຊຸມປີຜ່ານມາ, ຖັນແຖວນັກສິນລະປິນ, ປັນຍາຊົນຂອງຫວຽດນາມ ໄດ້ສືບຕໍ່ຍົກສູງບົດບາດ, ທີ່ຕັ້ງຂອງຕົນ ແລະ ເສີມຂະຫຍາຍມູນເຊື້ອ, ບົດຮຽນ, ປະກອບສ່ວນສຳຄັນເຂົ້າໃນພາລະກິດພັດທະນາປະເທດຊາດ, ໃກ້ຊິດຕິດແທດກັບພຶດຕິກຳຕົວຈິງ, ຄົ້ນຄ້ວາວິທະຍາສາດ, ສະເໜີບັນດາກິດຈະກຳ, ນຳວິທະຍາສາດເຕັກໂນໂລຢີທີ່ກ້າວໜ້າເຂົ້າໃນວັນນະຄະດີ - ສິລະປະ, ມີບັນດາບົດປະພັນທີ່ມີຫົວຄິດປະດີດສ້າງຈຶ່ງໄດ້ຮັບການຊົມເຊີຍຈາກມະຫາຊົນ. ບໍ່ພຽງແຕ່ຄືແນວນັ້ນ, ເມື່ອເວົ້າເຖິງປັນຍາຊົນ ແມ່ນເວົ້າເຖິງຖັນແຖວຜູ້ທີ່ເຮັດວຽກງານວິທະຍາສາດ, ສັງຄົມ“.
ປີ 2015 ແມ່ນປີທີ່ມີຄວາມໝາຍສຳຄັນພິເສດຄື: ດຳເນີນກອງປະຊຸມໃຫຍ່ອົງຄະນະພັກທຸກຂັ້ນ, ມີເຫດການສຳຄັນໃຫຍ່ຂອງປະເທດຊາດ, ແມ່ນປະກົດການທີ່ມີຊີວິດຊີວາ, ສ້າງແຫຼ່ງສະອອນໃຈເພື່ອໃຫ້ບັນດານັກວິທະຍາສາດ, ນັກສິນລະປິນປະດິດສ້າງ. ທ່ານເລຂາທິການໃຫຍ່ຫວັງວ່າ, ຖັນແຖວປັນຍາຊົນ, ນັກວິທະຍາສາດ, ນັກສິນລະປິນຈະມີຫຼາຍກິດຈະກຳທີ່ມີຫົວຄິດປະດິດສ້າງ, ມີຄຸນຄ່າ, ພ້ອມທັງເນັ້ນໜັກເຖິງ 4 ໜ້າທີ່ຈຸດສຸມເຊິ່ງຫວຽດນາມ ຄວນສຸມໃສ່ປະຕິບັດໃນປີ 2015. ນັ້ນແມ່ນຕ້ອງສືບຕໍ່ປະຕິບັດບັນດາຄາດໝາຍ, ໜ້າທີ່ພັດທະນາເສດຖະກິດ - ສັງຄົມເຊິ່ງມະຕິກອງປະຊຸມໃຫຍ່ຄັ້ງທີ 11 ໄດ້ວາງອອກ, ສືບຕໍ່ຍູ້ແຮງການເຊື່ອມໂຍງເຂົ້າກັບສາກົນ, ເປີດກວ້າງການພົວພັນກັບຕ່າງປະເທດ, ຮັກສາເອກະລາດອະທິປະໄຕ, ຜືນແຜ່ນດິນອັນຄົບຖ້ວນ, ສິ່ງແວດລ້ອມສັນຕິພາບ, ສະຖຽນລະພາບ ເພື່ອພັດທະນາປະເທດຊາດ; ກະກຽມກອງປະຊຸມໃຫຍ່ອົງຄະນະພັກທຸກຂັ້ນເປັນຢ່າງດີ, ກ້າວໄປເຖິງກອງປະຊຸມໃຫຍ່ຄັ້ງທີ 12 ຂອງພັກ; ກໍ່ສ້າງພັກ, ກໍ່ສ້າງລະບົບການເມືອງໃຫ້ໝັ້ນຄົງ.