ສະພາຄວາມໝັ້ນຄົງສະຫະປະຊາຊາດ ປຶກສາຫາລືກ່ຽວກັບບັນຫາຊີຣີ
(ພາບ: dantri.com.vn)
( vovworld ) – ປະຊາຄົມໂລກສືບຕໍ່ມີຄວາມມານະພະຍາຍາມແກ້ໄຂສະພາບເສິກກາງເມືອງອັນນອງເລືອດທີ່ແກ່ຍາວຢູ່ປະເທດຊີຣີ. ວັນທີ 22/3, ທ່ານເລຂາທິການໃຫ່ຍສະຫະປະຊາຊາດ Ban Ki Moon ຖືວ່າສະພາຄວາມໝັ້ນຄົງສະຫະປະຊາຊາດ ໄດ້ສົ່ງສານເຖິງຊີຣີ ໂດຍຊີ້ແຈ້ງວ່າ ຕ້ອງຢຸດຕິທຸກໆຮູບການໃຊ້ຄວາມຮຸນແຮງ ແລະ ຕ້ອງມີການເຈລະຈາດ້ານການເມືອງຢ່າງກ້ວາງຂວາງ ກ່ຽວກັບມາດຕະການໃຫ້ແກ່ບັນຫາຊີຣີ. ໃນວັນດຽວກັນ, ຈີນ ປະກາດວ່າຈະສືບຕໍ່ສະໜັບສະໜູນບັນດາຄວາມມານະພະຍາຍາມໄກ່ເກັ່ຍປອງດອງຂອງໂລກ ໃຫ້ແກ່ບັນຫາຊີຣີ. ກ່າວຄຳເຫັນທີ່ການປະຊຸມຂ່າວປະຈຳເດືອນຢູ່ນະຄອນຫຼວງປັກກີງ, ທ່ານຫົງໂລຍ, ໂຄສົກກະຊວງການຕ່າງປະເທດຈີນ ໄດ້ສະແດງຄວາມຫວັງວ່າສະພາຄວາມໝັ້ນຄົງສະຫະປະຊາຊາດ ຈະສາມັກຄີ, ສະໜັບສະໜູນບັນດາຄວາມມານະພະຍາຍາມໄກ່ເກັ່ຍປອງດອງຢູ່ຊີຣີ ໂດຍທູດພິເສດ Koffi Annan ສະເໜີ. ສ່ວນທ່ານປະທານກຳມາທິການການຕ່າງປະເທດສະພາສູງລັດເຊຍ Mikhail Margelov ປະກາດວ່າ, ປະທານາທິບໍດີ ຊີຣີ Bashar al Assad ຄວນປະຕິບັດບາດກ້າວເດີນທຳອິດ ກ້າວໄປເຖິງການແກ້ໄຂການປະທະກັນຢູ່ປະເທດນີ້ ດ້ວຍວິທີຖອນກຳລັງອອກຈາກນະຄອນຕ່າງໆ ແລະ ອະນຸຍາດການຜັນຂະຫຍາຍການເຄື່ອນໄຫວຊ່ວຍເຫຼືອມະນຸດ ສະທຳ. ຄຳປະກາດດັ່ງກ່າວໄດ້ເປັນຂີດໝາຍຂອງການປ່ຽນແປງຫຼັກໝັ້ນຂອງລັດເຊຍ ກ່ຽວກັບບັນຫາຊີຣີ ຢ່າງຈະແຈ້ງ.
ໃນຂະນະນັ້ນ, ການປະທະກັນຄັ້ງຕ່າງໆຍັງສືບຕໍ່ເກີດຂຶ້ນຢູ່ຫຼາຍທ້ອງຖິ່ນຂອງຊີຣີ, ໂດຍບໍ່ຫົວຊາຕໍ່ເລື່ອງສະພາຄວາມໝັ້ນຄົງສະຫະປະຊາຊາດ ຮັບຮອງເອົາຖະແຫຼງການສະໜັບສະໜູນແຜນການແກ້ໄຂສະພາບຂາດສະຖຽນລະພາບທີ່ແກ່ຍາວຢູ່ປະເທດຕາເວັນອອກກາງນີ້.