(vovworld) - ວັນທີ 29/07, ຫວຽດນາມ ແລະ ສະຫະພັນລາຊະອານາຈັກອັງກິດ ແລະ ໄອແລນເໜືອ ອອກຖະແຫຼງການຮ່ວມກ່ຽວກັບການຢ້ຽມຢາມຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີສະຫະພັນລາຊະອານາຈັກອັງກິດ ແລະ ໄອແລນເໜືອ David Cameron ໃນລະຫວ່າງວັນທີ 29 – 30/07. ຕາມນັ້ນແລ້ວ, ໃນຂອບເຂດການຢ້ຽມຢາມ, ທ່ານນາຍົກລັດຖະມົນຕີ David Cameron ໄດ້ມີການເຈລະຈາກັບທ່ານນາຍົກລັດຖະມົນຕີ ຫງວຽນເຕີນຢຸງ. ນາຍົກລັດຖະມົນຕີ 2 ທ່ານຢືນຢັນວ່າ ການຮ່ວມມືດ້ານເສດຖະກິດສືບຕໍ່ແມ່ນບູລິມະສິດໃນການພົວພັນ 2 ຝ່າຍ ແລະ ຊົມເຊີຍບັນດາບາດກ້າວທີ່ບັນລຸໄດ້ໃນວິວັດການເຈລະຈາສັນຍາການຄ້າເສລີລະຫວ່າງຫວຽດນາມ ສະຫະພາບເອີລົບ (EU) ແລະ ເຊື່ອໝັ້ນວ່າ ເມື່ອສັນຍາໄດ້ຮັບການລົງນາມແລ້ວ ຈະຍູ້ແຮງການພົວພັນຮ່ວມມືດ້ານການຄ້າ, ການລົງທຶນລະຫວ່າງຫວຽດນາມ ແລະ ລາຊະອານາຈັກອັງກິດ.
ນາຍົກລັດຖະມົນຕີ 2 ທ່ານ ໄດ້ຕີລາຄາການພົວພັນດ້ານປ້ອງກັນຊາດ, ປ້ອງກັນປະເທດລະຫວ່າງ 2 ປະເທດ ໄດ້ພັດທະນາຢ່າງຕັ້ງໜ້າ. ນາຍົກລັດຖະມົນຕີ 2 ທ່ານ ໄດ້ເຫັນດີຊຸກຍູ້ການສ້າງບົດບັນທຶກຊ່ວຍຈຳກ່ຽວກັບການຮ່ວມມືດ້ານປ້ອງກັນປະເທດ, ຮ່ວມມືໃນຂົງເຂດອຸດສາຫະກຳປ້ອງກັນປະເທດ, ຮ່ວມມືບຳລຸງສ້າງບັນດານາຍທະຫານ ແລະ ນັກຊ່ຽວຊານຂອງກະຊວງປ້ອງກັນປະເທດ, ເພີ່ມທະວີການແລກປ່ຽນຄະນະຜູ້ແທນດ້ານປ້ອງກັນຊາດ, ປ້ອງກັນຄວາມສະຫງົບ…
ນາຍົກລັດຖະມົນຕີ 2 ທ່ານ ໄດ້ເຫັນດີຍູ້ແຮງການຮ່ວມມືໃນການປ້ອງກັນ, ຕ້ານການປ່ຽນແປງຂອງດິນຟ້າອາກາດ, ພິເສດແມ່ນເລື່ອງສົມທົບກັນກ່ອນຈັດກອງປະຊຸມ ແລະ ໃນກອງປະຊຸມຄັ້ງທີ 21 ຂອງຝ່າຍຕ່າງໆທີ່ເຂົ້າຮ່ວມສົນທິສັນຍາຂອງສະຫະປະຊາຊາດກ່ຽວກັບການປ່ຽນແປງຂ້ອງດິນຟ້າອາກາດ (COP 21) ຢູ່ປາຣີ ໃນປີ 2015.
ນາຍົກລັດຖະມົນຕີ 2 ທ່ານໄດ້ປຶກສາຫາລືບັນດາບັນຫາຢູ່ພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ຢືນຢັນຄືນໃໝ່ຄຳໝັ້ນສັນຍາຮັກສາຄວາມເປັນລະບຽບຮຽບຮ້ອຍໃນການເດີນທະເລ ບົນພື້ນຖານບັນດາຫຼັກການຂອງກົດໝາຍສາກົນ, ພິເສດແມ່ນບັນດາຫຼັກການຂອງສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ, ເນັ້ນໜັກເຖິງຄວາມສຳຄັນຂອງເລື່ອງແກ້ໄຂບັນດາຄວາມຂັດແຍ້ງກັນໂດຍສັນຕິວິທີ ກໍຄືສິດເສລີນຳໃຊ້ຢ່າງຖືກຕ້ອງຕາມກົດໝາຍ, ບໍ່ຖືກກີດຂວາງຢູ່ບັນດາມະຫາສະມຸດໃນໂລກ. 2 ຝ່າຍກໍຢືນຢັນຄືນໃໝ່ຄວາມສຳຄັນຂອງການເຄົາລົບ ແລະ ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ທີ່ໄດ້ລົງນາມເມື່ອປີ 2002 ຢ່າງຄົບຖ້ວນ ແລະ ສ້າງປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ໃຫ້ສຳເລັດໂດຍໄວ.