(vovworld) – ວັນທີ 12/5, ຢູ່ ຮ່າໂນ້ຍ, ກະຊວງການຕ່າງປະເທດ ຫວຽດນາມ ພ້ອມກັບກຸ່ມບໍລິສັດນ້ຳມັນອາຍແກດແຫ່ງຊາດ ຫວຽດນາມ ໄດ້ຈັດຕັ້ງການມອບຂອງຂວັນທີ່ມີມູນຄ່າ 1,2 ຕື້ດົ່ງເພື່ອລະດົມກຳລັງໃຈ ແລະ ໜູນຊ່ວຍດ້ານວັດຖຸສຳລັບກຳລັງຕຳຫຼວດທະເລ ແລະ ກຳລັງກວດກາການປະມົງ ຫວຽດນາມ ທີ່ໄດ້ ແລະ ພວມຕັ້ງໜ້າເຂົ້າຮ່ວມການປົກປ້ອງຊາວປະມົງ, ປົກປັກຮັກສາອະທິປະໄຕຂອງປະເທດຊາດບົນທະເລ.
ພົນຈັດຕະວາ ຮ່ວາງວັນດົ່ງ, ຮອງກຳມະການການເມືອງກອງບັນຊາການຕຳຫຼວດທະເລ ຫວຽດນາມ ແລະ ທ່ານ ຫງວຽນວັນຈູງ, ຮອງຫົວໜ້າກົມໃຫຍ່ກວດກາການປະມົງ ຫວຽດນາມ ໄດ້ຂອບອົກຂອບໃຈປະຊາຊົນ, ພໍ່ແມ່ປະຊາຊົນໃນທົ່ວປະເທດ, ຊາວ ຫວຽດນາມ ອາໄສຢູ່ຕ່າງປະເທດ ຍາມໃດກໍ່ລະດົມບັນດານັກຮົບ, ບັນດານັກກວດກາການປະມົງທີ່ໄດ້ຢືດໝັ້ນຕໍ່ສູ້ກັບບັນດາການກະທຳຂອງ ຈີນ ທີ່ລະເມີດອະທິປະໄຕ ແລະ ອຳນາດສານໃນເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ. ໃນໄລຍະຈະມາເຖິງ, ເຖິງວ່າມີຄວາມຫຍຸ້ງຍາກ, ລຳບາກ ແລະ ອັນຕະລາຍແນວໃດກໍ່ຕາມ, ຕຳຫຼວດທະເລ ແລະ ກຳລັງກວດກາການປະມົງແຕ່ລະຄົນ ກໍ່ຢືດໝັ້ນຕິດພັນກັບທະເລ ເພື່ອປົກປັກຮັກສາທະເລ, ໝູ່ເກາະຂອງປະເທດຊາດ.
ແລະກໍ່ໃນວັນດຽວກັນ, ຢູ່ແຂວງ ບ່າເຣ້ຍ - ຫວູງເຕົ່າ, ບໍລິສັດໃຫຍ່ຝຸ່ນ ແລະ ເຄມີນ້ຳມັນອາຍແກດ (PVFCCo) ໄດ້ມອບສົ່ງເຮືອອີໂມລາດຕາເວນ ໃຫ້ແກ່ກຳລັງຕຳຫຼວດທະເລ ຫວຽດນາມ.
ໃນວັນທີ 12/5, ຜູ້ຕາງໜ້າຄະນະກຳມະການແນວໂຮມປະເທດຊາດ ຫວຽດນາມ ແຂວງ ກວາງຫງາຍ, ຕາງໜ້າໃຫ້ກອງທຶນໜູນຊ່ວຍຊາວປະມົງ, ຄະນະຊາວໜຸ່ມແຂວງ, ສະມາຄົມນັກຮົບເກົ່າ ແລະ ສະມາຄົມແມ່ຍິງ ແຂວງ ກວາງຫງາຍ ໄດ້ໄປຢ້ຽມຢາມຖາມຂ່າວ, ລະດົມກຳລັງໃຈ, ມອບເງິນໜູນຊ່ວຍໃຫ້ຕຳຫຼວດທະເລເຂດ 2 ແລະ ຊາວປະມົງເມືອງ ຫຼີເຊີນ ທີ່ມີພາຫະນະຫາປາຖືກເປເພຍ້ອນກຳ່ປັນຂອງ ຈີນ ບຸກໂຈມຕີ. ຄະນະໄດ້ມອບຈຳນວນເງິນ 110 ລ້ານດົ່ງໃຫ້ແກ່ຕຳຫຼວດທະເລເຂດ 2 ແລະ ກ່ວາ 400 ລ້ານດົ່ງໃຫ້ຊາວປະມົງ ຫງວຽນໂລກ ຢູ່ຕາແສງ ອານຫວີງ, ເມືອງ ຫຼີເຊີນ, ເຊິ່ງແມ່ນເຈົ້າຂອງກຳ່ປັນ QNg 96416 ທີ່ຖືກເປເພຍ້ອນກຳ່ປັນ ຈີນ ຕຳ່ໃສ່.
ສະມາຄົມທ່າກຳ່ປັນເຂດໄຫຼ່ທະວີບ ຫວຽດນາມ, ຂຶ້ນກັບສະຫະພັນບັນດາສະມາຄົມວິທະຍາສາດ ແລະ ເຕັກນິກ ຫວຽດນາມ ຫາກໍ່ອອກຖະແຫຼງການຄັດຄ້ານການເຄື່ອນໄຫວຜິດກົດໝາຍຂອງບໍລິສັດໃຫຍ່ນ້ຳມັນອາຍແກດ ໄຮຢາງ, ປະເທດ ຈີນ ຢູ່ເຂດເສດຖະກິດຈຳເພາະໃນທະເລພາກກາງ ຫວຽດນາມ. ສະມາຄົມທ່າກຳ່ປັນເຂດໄຫຼ່ທະວີບ ຫວຽດນາມ ໄດ້ກ່າວປະນາມການກະທຳຜິດພາດດັ່ງກ່າວຂອງບໍລິສັດໃຫຍ່ນ້ຳມັນອາຍແກດ ໄຮຢາງ ແລະ ຮຽກຮ້ອງໃຫ້ບໍລິສັດໃຫຍ່ນ້ຳມັນອາຍແກດ ໄຮຢາງ ຂອງ ຈີນ ຢຸດຕິບັນດາການເຄື່ອນໄຫວຜິດກົດໝາຍ ແລະ ຖອນຮ້ານເຈາະນ້ຳມັນ ໄຮຢາງ 981 ອອກຈາກເຂດທະເລຂອງ ຫວຽດນາມ ໃນທັນທີ.
ແລະກໍ່ໃນວັນທີ 12/5, ສູນກາງສະພາກາແດງຫວຽດນາມ ສົມທົບກັບກອງບັນຊາການກອງທັບເຮືອໄປຢ້ຽມຢາມ, ມອບຂອງຂວັນໃຫ້ພະນັກງານ, ນັກຮົບ ແລະ ປະຊາຊົນທີ່ພວມປະຕິບັດໜ້າທີ່ຢູ່ເມືອງເກາະເຈື່ອງຊາ ແລະ ກຸ່ມເຮືອນຮ້ານ DK1. ການຢ້ຽມຢາມເພື່ອແນໃສ່ລະດົມກຳລັງໃຈ ແລະ ມອບຂອງຂວັນໃຫ້ພະນັກງານ, ນັກຮົບ ແລະ ປະຊາຊົນ ຍົກສູງສະຕິ, ນຳ້ໃຈຮັບຜິດຊອບ ກ່ຽວກັບອະທິປະໄຕທະເລ, ເກາະຂອງປະເທດຊາດໃຫ້ແກ່ພະນັກງານສະພາກາແດງຫວຽດນາມ. ປະກອບສ່ວນປະຕິບັດລາຍການສົມທົບລະຫວ່າງສູນກາງສະພາກາແດງ ແລະ ກົມໃຫຍ່ການເມືອງກອງທັບປະຊາຊົນຫວຽດນາມ ແລະ ກໍ່ໃນລາຍການນີ້, ສະພາກາແດງ 27 ແຂວງ, ນະຄອນ ໄດ້ຂົນຂວາຍການບໍລິຈາກເງິນສະໜັບສະໜູນທະຫານ ແລະ ປະຊາຊົນຢູ່ເກາະເຈື່ອງຊາ ແລະ ເຮືອນຮ້ານ DK1 ດ້ວຍຈຳນວນເງິນເກືອບ 600 ລ້ານດົ່ງ ເພື່ອມອບໃຫ້ພະນັກງານ, ນັກຮົບ ແລະ ປະຊາຊົນເມືອງເກາະເຈື່ອງຊາ.