(ທ່ານນາຍົກລັດຖະມົນຕີ ຫວຽດນາມ ຫງວຽນເຕີ໋ນຢຸງ ຕ້ອນຮັບ
ທ່ານປະທານທະນາຄານໂລກ Jim Yong Kim)
(vovworld) - ຕອນເຊົ້າວັນທີ 23/02, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີ໋ນຢຸງ ໄດ້ໃຫ້ການຕ້ອນຮັບທ່ານປະທານທະນາຄານໂລກ (WB) Jim Yong Kim ທີ່ພວມຢ້ຽມຢາມ ແລະ ເຮັດວຽກຢູ່ ຫວຽດນາມ. ທີ່ການຕ້ອນຮັບ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ປາດຖະໜາຢາກສືບຕໍ່ໄດ້ຮັບການຮ່ວມມືຂອງ WB, ພິເສດແມ່ນການໜູນຊ່ວຍແຫຼ່ງກຳລັງ, ໃຫ້ຄຳປຶກສາດ້ານນະໂຍບາຍ, ຊ່ວຍເຫຼືອດ້ານເຕັກນິກໃນວິວັດແຫ່ງການປະຕິບັດບັນດາຄາດໝາຍພັດທະນາໃຫ້ສຳເລັດ. ທ່ານນາຍົກລັດຖະມົນຕີ ຕີລາຄາສູງບັນດາອົງການກ່ຽວຂ້ອງຂອງ ຫວຽດນາມ ແລະ WB ທີ່ໄດ້ສົມທົບກັນຢ່າງແໜ້ນແຟ້ນໃນການສ້າງບົດລາຍງານ “ຫວຽດນາມ 2035 ມຸ່ງໄປເຖິງຄວາມວັດທະນາຖາວອນ, ມີຫົວຄິດປະດິດສ້າງ, ມີຄວາມຍຸຕິທຳ ແລະ ປະຊາທິປະໄຕ“ ດ້ວຍບັນດາຄາດໝາຍ, ຂໍ້ສະເໜີລະອຽດທີ່ສຸດ, ເໝາະສົມກັບທິດທາງພັດທະນາຂອງຫວຽດນາມ. ທ່ານນາຍົກລັດຖະມົນຕີ ຫງວຽນເຕີ໋ນຢຸງ ເນັ້ນໜັກວ່າ, ຫວຽດນາມປາຖະໜາຢາກສືບຕໍ່ໄດ້ຮັບການຮ່ວມມືຂອງ WB ໃນການປະຕິບັດຄາດໝາຍພັດທະນາຂອງຕົນໃຫ້ບັນລຸຜົນສຳເລັດ, ພິເສດແມ່ນໃນການໜູນຊ່ວຍດ້ານແຫຼ່ງກຳລັງ, ຊອກຫາ ສຳຜັດ ບັນດາແຫຼ່ງຊ່ວຍເຫຼືອພິເສດ, ໃຫ້ຄຳປຶກສາດ້ານນະໂຍບາຍ, ໜູນຊ່ວຍດ້ານເຕັກນິກ… ເພື່ອຊ່ວຍ ຫວຽດນາມຮັກສາຜົນງານໃນການພັດທະນາໄວ້ຢ່າງໝັ້ນຄົງ ກໍ່ຄືສືບຕໍ່ພັດທະນາໄວ ແລະ ໝັ້ນຄົງ.
ທ່ານປະທານ Jim Yong Kim ຢືນຢັນຄຳໝັ້ນສັນຍາຂອງ WB ສຳລັບວິວັດການພັດທະນາຂອງ ຫວຽດນາມ. ທ່ານກໍ່ໄດ້ຢືນຢັນວ່າ WB ຈະເອົາໃຈໃສ່ເຖິງການໜູນຊ່ວຍຫວຽດນາມໃນການສຳຜັດກັບແຫຼ່ງທຶນພິເສດ, ດ້ວຍດອກເບ້ຍຕຳ່, ໄລຍະເວລາໃຫ້ກູ້ຢືມຍາວ ເພື່ອພັດທະນາບັນດາແຫຼ່ງພະລັງງານຜະລິດຄືນໃໝ່, ພັດທະນາການສຶກສາ, ສາທາລະນະສຸກ, ໃນນັ້ນມີການຫຼຸດຜ່ອນອັດຕາສ່ວນເດັກນ້ອຍຂາດທາດບຳລຸງ, ທີ່ມີອາຍຸຕຳ່ກວ່າ 5 ປີ ເຊິ່ງປະຈຸບັນພວມຢູ່ໃນລະດັບສູງພໍສົມຄວນແມ່ນ 30%... ທ່ານປະທານ Jim Yong Kim ໃຫ້ຄຳໝັ້ນສັນຍາວ່າ, ສຳລັບບັນດາຄາດໝາຍນີ້, WB ຈະຊອກຫາບັນດາແຫຼ່ງກຳລັງພິເສດໃຫ້ແກ່ ຫວຽດນາມ.