ທ່ານເລຂາທິການໃຫຍ່ຫງວຽນຟູ໋ຈ້ອງ ໃຫ້ການຕ້ອນຮັບ
ປະທານທະນາຄານໂລກJim Yong Kim
(vovworld) - ຕອນບ່າຍວັນທີ 23/2, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ໄດ້ໃຫ້ການຕ້ອນຮັບທ່ານ Jim Yong Kim, ປະທານທະນາຄານໂລກທີ່ພວມຢູ່ຢ້ຽມຢາມ ຫວຽດນາມ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຢືນຢັນວ່າ, ຫວຽດນາມຈະສືບຕໍ່ຍູ້ແຮງພາລະກິດປ່ຽນໃໝ່ຢ່າງຮອບດ້ານ, ຄົບຊຸດ, ສູ້ຊົນນຳປະເທດກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານ. ທ່ານເລຂາທິການໃຫຍ່ ຫງວຽນຟູ໋ຈ້ອງ ສະເໜີທະນາຄານໂລກ ເພີ່ມທະວີການໜູນຊ່ວຍ ຫວຽດນາມກວ່າອີກ, ປະກອບສ່ວນຊ່ວຍ ຫວຽດນາມປະຕິບັດສຳເລັດຄາດໝາຍສັງລວມ ແລະ ບັນດາໜ້າທີ່ເສດຖະກິດ - ສັງຄົມທີ່ໄດ້ວາງອອກ ກໍ່ຄືທິດທາງພັດທະນາໃນບົດລາຍງານຂອງ ຫວຽດນາມເຖິງປີ 2035. ທ່ານເລຂາທິການໃຫຍ່ ຫງວຽນຟູ໋ຈ້ອງ ສະເໜີທະນາຄານໂລກ ແລະ ທ່ານປະທານເອງໃຫ້ການໜູນຊ່ວຍ ແລະ ສະໜັບສະໜູນ, ເພື່ອໃຫ້ ຫວຽດນາມສືບຕໍ່ໄດ້ຮັບບ້ວງເງິນກູ້ຢືມພິເສດຈາກສະຫະສະມາຄົມພັດທະນາສາກົນ (IDA) ໃຫ້ເໝາະສົມກັບເງື່ອນໄຂ ແລະ ສະພາບຂອງຫວຽດນາມ
ສ່ວນທ່ານປະທານ Jim Yong Kim ກໍ່ຢືນຢັນວ່າ, ທະນາຄານໂລກ ຈະສືບຕໍ່ສະໜອງການໜູນຊ່ວຍທີ່ຈຳເປັນ, ພິເສດແມ່ນຄວາມມານະພະຍາຍາມເກ້ຍກ່ອມບັນດາອົງການການເງິນສາກົນສະໜອງແຫຼ່ງທຶນພິເສດ, ປະກອບສ່ວນຊ່ວຍ ຫວຽດນາມຍູ້ແຮງການປະຕິຮູບດ້ານເສດຖະກິດ, ຮັກສາສະຖຽນລະພາບດ້ານເສດຖະກິດມະຫາພາກໃຫ້ເໝາະສົມກັບການປ່ຽນແປງຂອງດິນຟ້າອາກາດ, ປະຕິບັດສຳເລັດບັນດາຄາດໝາຍພັດທະນາເສດຖະກິດທີ່ໄດ້ວາງອອກ.