ກໍ່າປັ່ນທ່ອງທ່ຽວ 5 ດາວ ຂອງ ບໍລິສັດກໍ່າປັ່ນ Royal Caribbean Cruise Lines ຂອງ ອາເມລິກາ

ຕອນເຊົ້າວັນທີ 27 ພະຈິກ, ມີແຂກທ່ອງທ່ຽວ ກວ່າ 3.000 ຄົນ ພ້ອມດ້ວຍ ລູກເຮືອໃນກໍ່າປັ່ນທ່ອງທ່ຽວ 5 ດາວ ຂອງ ບໍລິສັດກໍ່າປັ່ນ Royal Caribbean Cruise Lines ຂອງ ອາເມລິກາ ໄດ້ເຂົ້າທຽບທ່າກໍ່າປັ່ນຮັບແຂກທ່ອງທ່ຽວສາກົນ ຮ້າລອງ (ນະຄອນ ຮ້າລອງ, ແຂວງກວາງນິງ ຂອງຫວຽດນາມ) ເພື່ອມາຢ້ຽມຢາມອ່າວຮ້າລອງ ແລະ ບັນດາສະຖານທີ່ທ່ອງທ່ຽວຢູ່ແຂວງກວາງນິງ. ເຫດການຕ້ອນຮັບກໍ່າປັ່ນຂົນສົ່ງແຂກທ່ອງທ່ຽວສາກົນຖ້ຽວທໍາອິດນີ້ ໄດ້ສ້າງ ບາດລ້ຽວໃໝ່ໃຫ້ແກ່ຂະແໜງທ່ອງທ່ຽວຂອງແຂວງກວາງນິງ, ພິເສດແມ່ນແຂວງກວາງນິງ ໄດ້ນໍາ ທ່າກໍ່າປັ່ນສໍາລັບແຂກທ່ອງທ່ຽວສາກົນຮ້າລອງ ເຂົ້າໃຊ້ເຄື່ອນໄຫວ. ທ່ານຫງວຽນດຶກລອງ, ປະທານຄະນະກໍາມະການປະຊາຊົນແຂວງກວາງນິງ, ໃຫ້ຮູ້ວ່າ:

        “ທ່າກໍ່າປັ່ນຮັບແຂກທ່ອງທ່ຽວສາກົນຮ້າລອງ ໄດ້ນໍາເຂົ້າໃຊ້ເຄື່ອນໄຫວແມ່ນຂີດໝາຍສໍາຄັນ, ສ້າງເງື່ອນໄຂສະດວກທີ່ສຸດໃຫ້ແກ່ບັນດາກໍ່າປັນຂົນສົ່ງແຂກທ່ອງທ່ຽວ ເຂົ້າມາອ່າວ ຮ້າລອງ ໂດຍກົງ ອັນໄດ້ສ້າງຄວາມປອດໄພໃຫ້ແກ່ແຂກທ່ອງທ່ຽວ ແລະ ບັນດາບໍລິສັດກໍ່າປັນອື່ນ. ນີ້ແມ່ນ ທ່າກໍ່າປັ່ນສໍາລັບແຂກທ່ອງທ່ຽວສາກົນ ມີຄວາມໝາຍພິເສດໃນ ການພັດທະນາເສດຖະກິດ, ສັງຄົມ”.

        ທ່າກໍ່າປັ່ນຮັບແຂກທ່ອງທ່ຽວສາກົນຮ້າລອງ ແມ່ນ ທ່າຮັບໃຊ້ສະເພາະຜູ້ໂດຍສານທໍາອິດຂອງທົ່ວປະເທດ ໂດຍ ກົມການເດີນທະເລຫວຽດນາມ (ກະຊວງການຄົມມະນາຄົມ) ອອກໃບອະນຸຍາດໃຫ້ດໍາເນີນການເຄື່ອນໄຫວ. ກິດຈະກໍາດັ່ງກ່າວມີທຶນທັງໝົດເກືອບ 1.100 ຕື້ດົ່ງ, ໂດຍບໍລິສັດ ຕາເວັນຮ້າລອງ ຈໍາກັດ ລົງທຶນ ແລະ ສາມາດຮັບໃຊ້ຜູ້ໂດຍສານປະມານ 8.500 ຄົນ.