ທ່ານ Nguyen Sinh Hung ໃຫ້ການຕ້ອນຮັບຮອງປະທານປະເທດ ສປປ ລາວ
(ພາບປະກອບ:news.vnanet.vn)
( vovworld ) – ວັນທີ 18/7, ທ່ານປະທານສະພາແຫ່ງຊາດຫວຽດນາມ Nguyen Sinh Hung ໄດ້ໃຫ້ການຕ້ອນຮັບທ່ານ ບຸນຍັງວໍລະຈິດ ກຳມະການກົມການເມືອງ, ຜູ້ປະຈຳການຄະນເລຂາພັກປະຊາຊົນປະຕິວັດລາວ, ຮອງປະທານປະເທດ ສປປ ລາວ ຊື່ງພວມຢູ່ຢ້ຽມຢາມຫວຽດນາມ ຢ່າງເປັນທາງການ. ທ່ານປະທານສະພາແຫ່ງຊາດຫວຽດນາມ Nguyen Sinh Hung ເນັນໜັກວ່າ: ນ້ຳໃຈມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານຫວຽດນາມ-ລາວ ແມ່ນຊັບສົມບັດອັນລ້ຳຄ່າລະຫວ່າງສອງລັດ, ສອງຊາດ; ສອງພັກ, ສອງລັດຄວນສືບຕໍ່ຍູ້ແຮງການໂຄສະນາ, ສຶກສາອົບຮົມລຸ້ນໜຸ່ມ, ປະຕິບັດການປົກປັກຮັກສາ, ເສີມຂະຫຍາຍນ້ຳໃຈມິດຕະພາບແບບພິເສດນີ້ໃນໄລຍະຕໍ່ໄປໃຫ້ເປັນຢ່າງດີ, ເພື່ອຕອບສະໜອງຄວາມມຸ້ງຫວັງຂອງປະຊາຊົນສອງປະເທດ. ສ່ວນທ່ານຮອງປະທານປະເທດ ສປປລາວ ບຸນຍັງ ວໍລະຈິດ ໄດ້ສະແດງໃຫ້ເຫັນຄວາມພາກພູມໃຈ ທີ່ໄດ້ມາຢ້ຽມຢາມຫວຽດນາມ, ຕາງໜ້າໃຫ້ພັກ, ລັດລາວ ເຂົ້າຮ່ວມງານຊຸມນຸມມິດຕິງສະເຫຼີມສະຫຼອງ 35 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ແລະ 50 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດ. ທ່ານຮອງປະທານປະເທດ ສປປລາວ ບຸນຍັງ ວໍລະຈິດ ຖືວ່າ: ນີ້ແມ່ນຄວາມເປັນກຽດ, ມີຄວາມໝາຍພິເສດສຳລັບທ່ານ. ທ່ານຮອງປະທານປະເທດ ສປປລາວ ບຸນຍັງ ວໍລະຈິດ ຢືນຢັນວ່າ, ບັນດາການເຄື່ອນໄຫວນີ້ ໄດ້ສະແດງໃຫ້ເຫັນນ້ຳໃຈມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງສອງປະເທດຢ່າງຈະແຈ້ງ . ພາຍຫຼັງພິທີຕ້ອນຮັບ, ທ່ານປະທານສະພາແຫ່ງຊາດຫວຽດນາມ Nguyen Sinh Hung ໄດ້ເປັນປະທານງານລ້ຽງທ່ານຮອງປະທານປະເທດ ສປປລາວ ບຸນຍັງ ວໍລະຈິດ ແລະ ຄະນະຜູ້ແທນຂັ້ນສູງແຫ່ງລັດລາວ.