( vovworld ) – ຕອນບ່າຍວັນທີ 14/5, ທີ່ສຳນັກງານລັດຖະບານ, ທ່ານຮອງນາຍົກລັດຖະມົນຕີ Nguyen Xuan Phuc ໄດ້ໃຫ້ການຕ້ອນຮັບຄະນະຜູ້ແທນຜູ້ມີຄຸນງາມຄວາມດີຕໍ່ການປະຕິວັດຂອງແຂວງ Gia Lai ແລະ ເມືອງ Nui Thanh ແຂວງ Quang Nam, ເນື່ອງໃນໂອກາດຄະນະມາຢ້ຽມຢາມນະຄອນຫຼວງຮ່າໂນ້ຍ ແລະ ເຂົ້າຢ້ຽມຂ່ຳນັບສຸສານລຸງໂຮ່. ທ່ານຮອງນາຍົກລັດຖະມົນຕີ Nguyen Xuan Phuc ຢືນຢັນວ່າ, ຍາມໃດ, ລັດກໍ່ໄດ້ເອົາໃຈໃສ່ ແລະ ເຮັດຈົນສຸດຄວາມສາມາດ ຂອງຕົນ ເພື່ອຍົກສູງຊີວິດດ້ານວັດຖຸ ແລະ ຈິດໃຈໃຫ້ແກ່ບັນດາຄອບຄົວນອນໃນເປົ້າໝາຍນະໂຍບາຍ, ຜູ້ມີຄຸນງາມຄວາມດີຕໍ່ການປະຕິວັດ. ທ່ານຮອງນາຍົກລັດຖະມົນຕີ Nguyen Xuan Phuc ຮຽກຮ້ອງໃຫ້ສອງທ້ອງຖິ່ນ ຈົ່ງສືບຕໍ່ຍູ້ແຮງບັນດາການເຄື່ອນໄຫວເບິ່ງແຍງດູແລ, ຕອບບຸນແທນຄຸນຜູ້ມີຄຸນງາມຄວາມດີຕໍ່ການປະຕິວັດ, ພ້ອມທັງສືບຕໍ່ຍູ້ແຮງການພັດທະນາເສດຖະກິດທ້ອງຖິ່ນ, ກໍ່ສ້າງພື້ນຖານໂຄງລ່າງ ຮັບໃຊ້ໃຫ້ແກ່ຄວາມຕ້ອງການຜະລິດ, ການດຳເນີນຊີວິດຂອງປະຊາຊົນ, ຍົກສູງຊີວິດການເປັນຢູ່ຂອງຜູ້ມີຄຸນງາມຄວາມດີຕໍ່ການປະຕິວັດເວົ້າສະເພາະ ກໍຄືປະຊາຊົນແຂວງ Gia Lai ແລະ Quang Nam ເວົ້າລວມ. ທ່ານຮອງນາຍົກລັດຖະມົນຕີ Nguyen Xuan Phuc ກໍ່ປາດຖະໜາວ່າ ບັນດາຜູ້ແທນທີ່ຕ່າງໜ້າໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດແຂວງ Gia Lai ແລະ ເມືອງ Nui Thanh ແຂວງ Quang Nam ຈະສືບຕໍ່ເສີມຂະຫຍາຍມູນເຊື້ອວິລະຊົນ, ຍາມໃດກໍແມ່ນແບບຢ່າງເພື່ອໃຫ້ລູກຫຼານຮ່ຳຮຽນຕາມ, ປະກອບສ່ວນສ້າງສາບ້ານເກີດເມືອງນອນ ແລະ ປະເທດຊາດໃຫ້ນັບມື້ນັບຮັ່ງມີເຂັ້ມແຂງ.