(vovworld) - ວັນທີ 13/11, ແຫຼ່ງຂ່າວຈາກອົງການໄອຍະການສ.ເກົາຫຼີ ໃຫ້ຮູ້ວ່າ: ທ່ານນາງປະທານາທິບໍດີສ.ເກົາຫຼີ Park Geun hye ອາດຈະຖືກສອບຖາມ, ໄວ້ສຸດແມ່ນໃນອາທິດໜ້າ, ກ່ຽວກັບບົດບາດຂອງທ່ານນາງ ໃນເຫດສໍ້ຫຼາດບັງຫຼວງ. ຖ້າຫາກການສອບຖາມໄດ້ຮັບການປະຕິບັດ, ນີ້ຈະເປັນຄັ້ງທຳອິດໃນປະຫວັດສາດສ.ເກົາຫຼີ ມີປະທານາທິບໍດີພວມດຳລົງຕຳແໜ່ງ ຖືກນັກໄອຍະການສອບຖາມ. ລັດຖະທຳມະນູນສ.ເກົາຫຼີ ບໍ່ອະນຸຍາດໃຫ້ປະທານາທິບໍດີພວມດຳລົງຕຳແໜ່ງຖືກສັ່ງຟ້ອງ, ແຕ່ເລື່ອງສອບຖາມເພື່ອຮັບໃຊ້ການສືບສວນໃຫຍ່ກວ່າ ແມ່ນສາມາດປະຕິບັດໄດ້.
ທ່ານນາງປະທານາທິບໍດີ Park Geun hye ພວມປະເຊີນໜ້າກັບຄວາມສັບສົນດ້ານການເມືອງ ຍ້ອນເປີດເຜີຍບົດກ່າວປາໄສ ແລະ ເອກະສານຫຼາຍສະບັບໃຫ້ທ່ານນາງ Choi Soon Sil, ເຊິ່ງແມ່ນສ່ຽວຜູ້ສະໜິດສະໜົມຂອງທ່ານນາງປະທານາທິບໍດີ. ທ່ານນາງ Choi Soon Sil ຖືກສົງໄສໄດ້ສວຍໃຊ້ການພົວພັນນີ້ເພື່ອແຊກແຊງເຂົ້າວຽກງານຂອງປະເທດ ແລະ ພວມຖືກສືບສວນກ່ຽວກັບການສວຍໃຊ້ການພົວພັນທີ່ສະໜິດສະໜົມກັບປະທານາທິບໍດີເພື່ອກໍ່ຜົນກະທົບເຖິງບັນດາວິຫະກິດໃຫຍ່, ເຮັດໃຫ້ເຂົາເຈົ້າຕ້ອງປະກອບຈຳນວນເງິນ 44 ລ້ານ USD ເຂົ້າກອງທຶນປອດກຳໄລໂດຍທ່ານນາງສ້າງຕັ້ງ. ທ່ານນາງປະທານາທິບໍດີ Park Geun hye ໄດ້ອອກສຽງຍອມຮັບຄວາມຜິດ, ພ້ອມທັງຢືນຢັນວ່າ ພ້ອມແລ້ວທີ່ຈະຕອບທຸກຄຳຖາມເຊິ່ງຄະນະກຳມະການສືບສວນ ຂຶ້ນກັບກະຊວງຍຸຕິທຳໄດ້ວາງອອກ.