ທ່ານນາງ ຫງວຽນທິກິມເງິນ ເຮັດວຽກຢູ່ແຂວງ ບັກກ້ານ
(vovworld)- ໃນວັນທີ 22/6, ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ແລະ ຄະນະປະຕິບັດງານ ໄດ້ເຮັດວຽກກັບການນຳແຂວງບັກກ້ານ ກ່ຽວກັບສະພາບເສດຖະກິດ-ສັງຄົມ ແລະ ການປະຕິບັດໂຄງການເປົ້າໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່. ກ່າວຄວາມເຫັນທີ່ການເຮັດວຽກ, ທ່ານ ນາງ ຫງວຽນທິກິມເງິນ ປະທານສະພາແຫ່ງຊາດ ຖືວ່າ ແຂວງບັກກ້ານ ເປັນແຂວງເຂດພູດອຍ ພິເສດໜຶ່ງດຽວໃນທົ່ວປະເທດ ມີພົນລະເມືອງຕ່ຳກວ່າ 500.000 ຄົນ, ຄວາມໜາແໜ້ນຂອງພົນລະເມືອງສະເລ່ຍແມ່ນ 64ຄົນ/ຕາລາງກິໂລແມັດ. ທ່ານປະທານສະພາແຫ່ງຊາດ ຖືວ່າ: ແຂວງບັກກ້ານ ຈຳເປັນຕ້ອງນຳໜ້າ ກ່ຽວກັບການພັດທະນາເສັ້ນທາງຄົມມະນາຄົມ, ເສັ້ນທາງຄວາມໄວສູງ ເພື່ອພັດທະນາເສດຖະກິດລະຫວ່າງເຂດ ພ້ອມກັນນັ້ນ, ກໍ່ປະຕິບັດວຽກງານໜູນຊ່ວຍສັງຄົມໃຫ້ດີ ແລະ ຫຼຸດຜ່ອນຄວາມທຸກຫຍາກແບບຍືນຍົງ; ຕິດພັນກັບການກໍ່ສ້າງຊົນນະບົດໃໝ່ ດ້ວຍການຜະລິດຂອງປະຊາຊົນ; ເອົາໃຈໃສ່ເຖິງການສອນວິຊາຊີບ ໃຫ້ປະຊາຊົນຊາວເຜົ່າສ່ວນໜ້ອຍ; ປະຕິບັດວຽກງານຊົນເຜົ່າ, ສາດສະໜາໃຫ້ດີ ເພື່ອໃຫ້ປະຊາຊົນມີຊີວິດທີ່ສະຫງົບສຸກ.
ໃນຕອນບ່າຍ, ທ່ານ ນາງ ຫງວຽນທິກິມເງິນ ປະທານສະພາແຫ່ງຊາດ ໄດ້ເຮັດວຽກກັບການນຳເມືອງເຈີເມີຍ, ຢ້ຽມຢາມ ແລະ ມອບຂອງຂັວນ ໃຫ້ແມ່ຫວຽດນາມວິລະຊົນ , ທະຫານເສຍອົງຄະ.