ທ່ານນາງຫງວຽນທິກີມເງິນໄດ້ຮັບການເລືອກຕັ້ງເປັນປະທານສະພາແຫ່ງຊາດຫວຽດນາມຊຸດທີ14
ທ່ານນາງປະທານສະພາແຫ່ງຊາດ ຫງວຽນທິກີມເງິນ ກ່າວຄຳສາບານຕົວ
(vovworld) - ໂດຍສືບຕໍ່ການປະຕິບັດກອງປະຊຸມສະໄໝສາມັນຄັ້ງປະຖົມມະເລີກ, ສະພາແຫ່ງຊາດຊຸດທີ 14, ຕອນເຊົ້າວັນທີ 22/07 ບັນດາສະມາຊິກສະພາແຫ່ງຊາດໄດ້ເຮັດວຽກຢູ່ຫໍປະຊຸມ, ຮັບຟັງຄະນະນັບບັດປະກາດໝາກຜົນການນັບບັດເລືອກຕັ້ງປະທານສະພາແຫ່ງຊາດ, ບັນດາຮອງປະທານສະພາແຫ່ງຊາດ, ກຳມະການຄະນະປະຈຳສະພາແຫ່ງຊາດ. ທ່ານນາງ ຫງວຽນທິກີມເງິນ ສືບຕໍ່ໄດ້ຮັບການເລືອກຕັ້ງເປັນປະທານສະພາແຫ່ງຊາດຊຸດທີ 14.
ທ່ານນາງປະທານສະພາແຫ່ງຊາດ ຫງວຽນທິກີມເງິນ ໄດ້ກ່າວຄຳສາບານຕົວວ່າ: “ໃຕ້ທຸງແດງດາວຄຳທີ່ສັກກະລະບູຊາຂອງຊາດ, ຕໍ່ໜ້າສະພາແຫ່ງຊາດ, ຕໍ່ໜ້າພໍ່ແມ່ປະຊາຊົນ, ຜູ້ມີສິດເລືອກຕັ້ງໃນທົ່ວປະເທດ, ຂ້າພະເຈົ້າຂໍປະຕິຍານວ່າ: ຈົ່ງຮັກພັກດີຕໍ່ປະເທດຊາດ, ຕໍ່ປະຊາຊົນ, ຕໍ່ລັດຖະທຳມະນູນຂອງ ສສ ຫວຽດນາມ. ມານະພະຍາຍາມເຮັດຫລ້ອນໜ້າທີ່ໂດຍພັກ, ລັດ ແລະ ປະຊາຊົນມອບໝາຍໃຫ້ເປັນຢ່າງດີ.”
ພາຍຫລັງທີ່ຂຶ້ນສາບານຕົວ, ທ່ານນາງປະທານສະພາແຫ່ງຊາດຊຸດທີ 14 ຫງວຽນທິກີມເງິນ ມີບົດກ່າວປາໄສຕໍ່ໜ້າສະພາແຫ່ງຊາດ, ທ່ານນາງປະທານສະພາແຫ່ງຊາດໃຫ້ຮູ້ວ່າ: ຈະພ້ອມກັບບັນດາສະມາຊິກສະພາແຫ່ງຊາດສູ້ຊົນ ສືບຕໍ່ປ່ຽນໃໝ່ ເພື່ອຍົກສູງຄຸນນະພາບການເຄື່ອນໄຫວຂອງສະພາແຫ່ງຊາດ, ເພື່ອໃຫ້ສະພາແຫ່ງຊາດກາຍເປັນສະພາແຫ່ງຊາດສາມັກຄີ, ມີຫົວຄິດປະດິດສ້າງ ແລະ ກະທຳເພື່ອຜົນປະໂຫຍດຂອງປະຊາຊົນ, ເພື່ອຄວາມເປັນກຽດ ແລະ ຄວາມເອກອ້າງທະນົງໃຈຂອງປະເທດຊາດ, ເພື່ອການພັດທະນາແບບຍືນຍົງຂອງປະເທດຊາດ.