(vovworld) – ຕອນບ່າຍວັນທີ 05/09, ຢູ່ສຳນັກງານສະພາແຫ່ງຊາດ, ທ່ານນາງຮອງປະທານສະພາແຫ່ງຊາດ ຫງວຽນທິກິມເງິນ ໄດ້ໃຫ້ການຕ້ອນຮັບທ່ານ Youssouf Adbel Jelil, ຫົວໜ້າຜູ້ຕາງໜ້າກອງທຶນເຍົາວະຊົນສະຫະປະຊາຊາດ (UNICEF) ປະຈຳຫວຽດນາມ. ທີ່ການຕ້ອນຮັບ, ທ່ານນາງຮອງປະທານສະພາແຫ່ງຊາດ ຫງວຽນທິກິມເງິນ ເນັ້ນໜັກວ່າ ສະພາແຫ່ງຊາດຫວຽດນາມ ໃຫ້ຄຳໝັ້ນສັນຍາຈະກໍ່ສ້າງ ແລະ ປັບປຸງລະບົບກົດໝາຍປົກປ້ອງສິດຜົນປະໂຫຍດຂອງເດັກ, ນຳເອົາສິດຂອງເດັກເຂົ້າບັນດາບັນຫາກ່ຽວຂ້ອງເຖິງເດັກໃນວິວັດການສ້າງກົດໝາຍ, ພ້ອມທັງຕິດຕາມກວດກາການປົກປ້ອງ ແລະ ຊຸກຍູ້ສິດຂອງເດັກ.
ທ່ານນາງຮອງປະທານສະພາແຫ່ງຊາດ ຫງວຽນທິກິມເງິນ ສະເໜີໃຫ້ UNICEF ສືບຕໍ່ເອົາໃຈໃສ່ສະຫງວນແຫຼ່ງກຳລັງໜູນຊ່ວຍຫວຽດນາມ ໃນການສ້າງ, ປັບປຸງກອບກົດໝາຍປົກປ້ອງ ແລະ ເບິ່ງແຍງດູແລເດັກ, ເພີ່ມທະວີກຳລັງຄວາມສາມາດໃຫ້ພະນັກງານສະພາແຫ່ງຊາດ, ເພີ່ມທະວີປະສິດທິຜົນວຽກງານຕິດຕາມກວດກາການປະຕິບັດສິດຂອງເດັກຢູ່ສະພາແຫ່ງຊາດ.