(VOVWORLD) - ເມື່ອຕອບຮັບຄຳເຊີນຂອງທ່ານນາຍົກລັດຖະມົນຕີ ລາຊະອານາຈັກ ຊູແອັດ Ulf Kristersson, ແຕ່ວັນທີ 10 – 13 ພະຈິກ, ທ່ານນາງຮອງປະທານປະເທດ ຫວຽດນາມ ຫວໍທິແອັງຊວັນ ໄດ້ມີການຢ້ຽມຢາມ ລາຊະອານາຈັກ ຊູແອັດ ຢ່າງເປັນທາງການ.
 ທ່ານນາຍົກລັດຖະມົນຕີ ລາຊະອານາຈັກ ຊູແອັດ Ulf Kristersson ຕ້ອນຮັບທ່ານນາງຮອງປະທານປະເທດ ຫວຽດນາມ ຫວໍທິແອັງຊວັນ (ພາບ: TTXVN) |
ຢູ່ Stockholm, ຕອນບ່າຍວັນທີ 11 ພະຈິກ, ທ່ານນາງຮອງປະທານປະເທດ ຫວຽດນາມ ຫວໍທິແອັງຊວັນ ໄດ້ມີການພົບປະສົນທະນາກັບທ່ານນາຍົກລັດຖະມົນຕີ Ulf Kristersson. ນະທີ່ນີ້, ທ່ານນາງຮອງປະທານປະເທດ ຫວຽດນາມ ຫວໍທິແອັງຊວັນ ສະເໜີໃຫ້ລັດຖະບານ ຊູແອັດ ສືບຕໍ່ສົ່ງເສີມບັນດາວິສາຫະກິດ ຊູແອັດ ຍູ້ແຮງການລົງທຶນເຂົ້າ ຫວຽດນາມ ໃນບັນດາຂົງເຂດເຊິ່ງ ຊູແອັດ ມີທ່າແຮງ ແລະ ຫວຽດນາມ ມີຄວາມຕ້ອງການ; ພິເສດແມ່ນຊ່ວຍ ຫວຽດນາມ ປ່ຽນແປງໃໝ່ຮູບແບບການເຕີບໂຕເສດຖະກິດຕິດພັນກັບນະວັດຕະກຳ.
ກ່ຽວກັບການພົວພັນສອງຝ່າຍ, ທ່ານນາງຮອງປະທານປະເທດ ຫວໍທິແອັງຊວັນ ແລະ ທ່ານນາຍົກລັດຖະມົນຕີ Ulf Kristersson ໄດ້ເຫັນດີເປັນເອກະພາບເຮັດໃຫ້ການພົວພັນສອງປະເທດເລິກເຊິ່ງກວ່າອີກ, ສືບຕໍ່ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຂອງພາກພື້ນ ແລະ ສາກົນ; ເພີ່ມທະວີການຮ່ວມມືໃນຂົງເຂດນະວັດຕະກຳ, ວິທະຍາສາດ, ເຕັກໂນໂລຢີ, ວັດທະນະທຳ, ການທ່ອງທ່ຽວ, ການພົວພັນແລກປ່ຽນປະຊາຊົນ.
ທ່ານນາຍົກລັດຖະມົນຕີ ຊູແອັດ ຢັ້ງຢືນວ່າ ລັດຖະບານ ຊູແອັດ ຈະສືບຕໍ່ສ້າງເງື່ອນໄຂສະດວກເພື່ອໃຫ້ປະຊາຄົມຊາວ ຫວຽດນາມ ເຊື່ອມໂຍງຢ່າງກວ້າງຂວາງຢູ່ປະເທດປະຈຳຖິ່ນ, ປະກອບສ່ວນໃຫ້ຄວາມວັດທະນາຖາວອນ ແລະ ເຮັດໃຫ້ວັດທະນະທຳສັງຄົມຂອງ ຊູແອັດ ມີຄວາມຫຼາກຫຼາຍ, ເສີມຂະຫຍາຍບົດບາດເປັນຂົວຕໍ່ມິດຕະພາບຊຸກຍູ້ການພົວພັນຮ່ວມມືອັນດີງາມລະຫວ່າງສອງປະເທດ.